ប្រទេសឥណ្ឌូណេស៊ី ៖ ប្រធានាធិបតីឥណ្ឌូណេស៊ីលោក JOKO WIDODO បានធ្វើសច្ចាប្រណិធានកាលពីថ្ងៃទី២០តុលា សម្រាប់អាណត្តិទី២របស់លោករយៈពេល៥ឆ្នាំទៀត ក្នុងពិធីមួយដោយមានវត្តមានរបស់បណ្ដាឥស្សរជននិងបណ្ដាបេសកជនពិសេសរបស់បរទេស។ ពិធីធ្វើសចា្ចប្រណិធាននោះប្រព្រឹត្តទៅក្នុងសភាឥណ្ឌូណេស៊ីក្រុងហ្សាការតា ដោយមានកិច្ចការពារសន្តិសុខយ៉ាងរឹងមាំបំផុត។…
ប្រទេសឥណ្ឌូណេស៊ី ៖ ប្រធានាធិបតីឥណ្ឌូណេស៊ីលោក JOKO WIDODO បានធ្វើសច្ចាប្រណិធានកាលពីថ្ងៃទី២០តុលា សម្រាប់អាណត្តិទី២របស់លោករយៈពេល៥ឆ្នាំទៀត ក្នុងពិធីមួយដោយមានវត្តមានរបស់បណ្ដាឥស្សរជននិងបណ្ដាបេសកជនពិសេសរបស់បរទេស។
ពិធីធ្វើសចា្ចប្រណិធាននោះប្រព្រឹត្តទៅក្នុងសភាឥណ្ឌូណេស៊ីក្រុងហ្សាការតា ដោយមានកិច្ចការពារសន្តិសុខយ៉ាងរឹងមាំបំផុត។ ក្នុងចំណោមមេដឹកនាំបរទេសដែលចូលរួមក្នុងពិធីនេះមានជាពិសេសអនុប្រធានាធិបតីចិនលោកវ៉ាងគីសាន នាយករដ្ឋមន្ត្រីកម្ពុជាសម្ដេចតេជោហ៊ុនសែន នាយករដ្ឋមន្ត្រីម៉ាឡេស៊ីលោកមហាធៀរមហាម៉ាត់ នាយករដ្ឋមន្ត្រីអូស្ត្រាលីលោកSCOTT MORRISON នាយករដ្ឋមន្ត្រីសិង្ហបុរីលោកLEE HSIEN LOONG ព្រះចៅស៊ុលតង់ព្រុយណេDARUSSALAM HASSANAL BOLKIAHនិងរដ្ឋមន្ត្រីដឹកជញ្ជូនអាមេរិកលោកស្រីELAINE CHAO។
ក្នុងសុន្ទរកថាមួយប្រធានាធិបតីឥណ្ឌូណេស៊ីលោកWIDODOអាយុ៥៨ឆ្នាំ បានបង្ហាញបណ្ដាទិសដៅសម្រាប់អាណត្តិទី២របស់លោក សំដៅជួយប្រទេសឲ្យចាកផុតពីចំណូលមធ្យមក្នុងឆ្នាំ២០៤៥។
លោកគូសបញ្ជាក់ថាក្ដីស្រមៃរបស់យើងគឹដល់ឆ្នាំ២០៤៥ឥណ្ឌូណេស៊ី នឹងចាកផុតពីក្រុមប្រទេសមានប្រាក់ចំណូលមធ្យម និងប្រែក្លាយទៅជាប្រទេសរីកចម្រើនមួយ។ ម្យ៉ាងទៀតប្រធានាធិបតីបានសម្ដែងពីបំណងចង់ឃើញផលទុនជាតិសរុបរបស់ប្រទេស កើនដល់៧០០០ពាន់លានដុល្លារ ហើយប្រាក់ចំណូលរបស់ប្រជាជនម្នាក់ឡើងដល់៣២០លានរូពី ប្រមាណជា២២.៦៥២ដុល្លារ ក្នុងមួយឆ្នាំ ហើយអត្រានៃភាពក្រីក្រធ្លាក់ដល់០%។
សម្រាប់រយៈពេល៥ឆ្នាំខាងមុខ លោកWIDODOអះអាងថា លោកបានសម្រេចផ្ដល់អាទិភាពដល់ការអនុវត្ត បណ្ដាគម្រោងហេដ្ឋារចនាសម្ព័ន្ធសំខាន់ៗ និងធ្វើយ៉ាងណាកុំឲ្យសេដ្ឋកិច្ចរបស់ប្រទេសពឹងផ្អែកតែលើការនាំចេញ បណ្ដា ធនធានធម្មជាតិទៅកាន់ផលិតកម្ម ពិសេសការផលិតបណ្ដាផលិតផលដែលមានតម្លៃខ្ពស់។
លោកWIDODOនិងអនុប្រធានាធិបតីរបស់លោក MA’RUF AMINដណ្ដើមបានជ័យជម្នះ ក្នុងការបោះឆ្នោតប្រធានាធិបតីកាលពីថ្ងៃទី១៧មេសាកន្លងទៅ ជាមួយសំឡេងគាំទ្រដល់ទៅ៥៥,៥% គឺប្រមាណជា៨៥,៦៧លានសំឡេង ឈ្នះគូប្រជែងអតីតឧត្ដមសេនីយPRABOVO SUBIANTO៕ (កែសម្រួលដោយ ៖ បុប្ផា)
ចែករំលែកព័តមាននេះ