បះបោរ! ប្រធានាធិបតីប្រកាសថា ប្រទេសស្ថិតក្នុងស្ថានភាពសង្គ្រាម (វីដេអូ)
ប្រទេសស៊ីលី ៖ ប្រធានាធិបតីស៊ីលី លោក SEBASTIAN PINERA កាលពីថ្ងៃទី២០ ខែតុលា ឆ្នាំ២០១៩ បានប្រកាសថា…
ប្រទេសស៊ីលី ៖ ប្រធានាធិបតីស៊ីលី លោក SEBASTIAN PINERA កាលពីថ្ងៃទី២០ ខែតុលា ឆ្នាំ២០១៩ បានប្រកាសថា…
ប្រទេសស៊ីលី ៖ ប្រធានាធិបតីស៊ីលី លោក SEBASTIAN PINERA កាលពីថ្ងៃទី២០ ខែតុលា ឆ្នាំ២០១៩ បានប្រកាសថា ប្រទេសស្ថិតក្នុងស្ថានភាពនៃសង្គ្រាម ក្រោយផ្ទុះការបះបោរហិង្សាយ៉ាងអាក្រក់បំផុត ដែលប្រទេសពុំធ្លាប់ជួបប្រទះចាប់តាំងពីច្រើនទសវត្សមកហើយ។ ចំណែករដ្ឋាភិបាលវិញបានពង្រីកការប្រកាសភាពអាសន្ន។
២យប់ជាប់ៗគ្នាវិធានការបំរាមគោចរត្រូវបានដាក់នៅរដ្ឋធានីសាន់ត្យាហ្គោ រវាងពីម៉ោង១៩ដល់ម៉ោង៦ព្រឹកម៉ោងក្នុងស្រុក។ ការប្រកាសអាសន្នក៏មានជាធរមានដែរ ក្នុងតំបន់ជាច្រើនក្នុងនោះមាននៅរដ្ឋធានីដែលមានប្រជាជន៧លាននាក់ ហើយនាយប់ថ្ងៃទី២០តុលាបានពង្រីក ដល់ទីក្រុងធំៗជាច្រើនទៀតនៅភាគខាងត្បូងនិងភាគខាងជើងប្រទេស។
បន្ទាប់ពីកិច្ចប្រជុំមួយជាមួយប្រធានសភា ប្រធានព្រឹទ្ធសភានិងប្រធានតុលាការកំពូលលោកSEBASTIAN PINERAថ្លែងថា លទ្ធិប្រជាធិបតេយ្យមានកាតព្វកិច្ចត្រូវការពារខ្លួន។ ចំណែកឧត្ដមសេនីយJAVIER ITURRIYAGA ដែលប្រធានាធិបតី កាលពីថ្ងៃទី១៨តុលាចាត់ឲ្យទទួលបន្ទុកការពារសន្តិសុខសាធារណៈ បានអំពាវនាវដល់ប្រជាជនឲ្យស្ថិតក្នុងភាពស្ងប់ស្ងាត់ ហើយកុំចេញក្រៅផ្ទះ។
ការបះបោរដែលដើមចមថាប្រឆាំងនឹងការដំឡើងថ្លៃសំបុត្រមេត្រូនៅក្នុងរដ្ឋធានី ក៏ទោះជាប្រធានាធិបតីប្រកាសលុបចោលវិញ ក៏នៅបន្តដល់ថ្ងៃទី២០តុលា។ ការប៉ះទង្គិចគ្នាកើតមានរវាងពួកបាតុករនិងកងកម្លាំងប៉ូលិស នារសៀលថ្ងៃទី២០តុលានៅកណ្ដាលក្រុងសាន់ត្យាហ្គោ ចំណែកការលុកប្លន់យកឥវ៉ាន់នានា កើតមានតាមកន្លែងជាច្រើននៃរដ្ឋធានី។
មនុស្ស៧នាក់ហើយបានត្រូវស្លាប់ក្នុងការបះបោរនៅស៊ីលី។ មនុស្ស៥នាក់ស្លាប់ក្នុងភ្លើងដែលគេដុតរោងចក្រកាត់ដេរមួយពេលមានការលុកចូលប្លន់យកសម្លៀកបំពាក់ នៅភាគខាងជើងរដ្ឋធានី។
មនុស្ស២នាក់ទៀតបានស្លាប់រួចហើយកាលពីយប់ថ្ងៃទី១៩មក២០តុលា ក្នុងភ្លើងដែលគេដុតផ្សារទំនើបមួយពេលលុកចូលប្លន់យករបស់របរ ពីសំណាក់ពួកបាតុករខណៈមនុស្សម្នាក់ទៀតភ្លើងឆេះរលាកធ្ងន់ធ្ងរមិនសង្ឃឹមរស់។
មនុស្ស២នាក់ក៏ត្រូវរបួសដោយគ្រាប់កាំភ្លើងបញ្ជូនទៅមន្ទីរពេទ្យក្នុងស្ថានភាពធ្ងន់ធ្ងរ ពេលប៉ះទង្គិចជាមួយប៉ូលិសពេលពួកគេលុកចូលប្លន់ប្រមូលយកឥវ៉ាន់នៅភាគខាងត្បូងរដ្ឋធានី។
ប៉ូលិសនិងទាហានជិត១០.០០០នាក់់ត្រូវបានដាក់ពង្រាយ។ កងយោធាបានល្បាតតាមដងវិថីនានា ដែលនោះជាលើកដំបូងចាប់តាំងពីបញ្ចប់របបផ្ដាច់ការ របស់ឧត្ដមសេនីយអូហ្គូស្តូពីណូជេ(១៩៧៣-១៩៩០)មក។
យោងតាមអាជ្ញាធរថាមនុស្ស១៤៦២នាក់បានត្រូវចាប់ខ្លួន ក្នុងនោះ៦៤៤នាក់ក្នុងរដ្ឋធានីនិង៨៤៨នាក់នៅកន្លែងឯទៀតៗរបស់ប្រទេស៕ (កែសម្រួលដោយ ៖ បុប្ផា) (ប្រភពវីដេអូ ៖ Orietta Retamales G. & Sputnik France &Le Huffington Post)
ចែករំលែកព័តមាននេះ