ខេត្តកំពត ៖ ម្ចាស់រមណីយដ្ឋានសំខាន់ៗមួយចំនួននៅខេត្តកំពត បានអះអាងប្រាប់លោកថោង ខុន រដ្ឋមន្ត្រីក្រសួងទេសចរណ៍ យ៉ាងដូច្នេះថា ពួកគាត់នឹងខិតខំរៀបចំការងារពាក់ព័ន្ធបន្ថែមទៀតនៅក្នុងរមណីយដ្ឋាន ដើម្បីត្រៀមចាំទទួលភ្ញៀវទេសចរឱ្យបានរួចរាល់ មុនពិធីបុណ្យសមុទ្រមកដល់នាចុងឆ្នាំខាងមុខនេះ ។
ដោយចុះតាមរមណីយដ្ឋានជាច្រើនកន្លែងនាថ្ងៃទី១៩ ខែតុលា ឆ្នាំ២០១៩ លោករដ្ឋមន្ត្រី ថោង ខុន និងក្រុមមន្ត្រីបានទៅដល់រមណីយដ្ឋានទេសចរណ៍«ឧទ្យានដងព្រែក» ស្ថិតក្នុងភូមិបត់ក្បាលដំរីឃុំម៉ាក់ប្រាង្គ ស្រុកទឹកឈូ និងបានបន្តទៅដល់រមណីយដ្ឋាន «ដូងទេរ» រមណីយដ្ឋានទេសចរណ៍ធម្មជាតិ«កោះតាដា» និងរមណីយដ្ឋានទេសចរណ៍ធម្មជាតិ «ទឹកឈូ» ដែលសុទ្ធតែស្ថិតក្នុងភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ។
លោក លី រតនា ម្ចាស់រមណីយដ្ឋាន «ដូងទេរ»និងលោក Alexis ម្ចាស់រមណីយដ្ឋានទេសចរណ៍
«ឧទ្យានដងព្រែក» សុទ្ធតែបានអះអាងចំពោះលោករដ្ឋមន្ត្រី ថោង ខុន ថាពួកគាត់នឹងខិតខំរៀបចំ
ការងារពាក់ព័ន្ធបន្ថែមទៀតក្នុងរមណីយដ្ឋាន ដើម្បីត្រៀមចាំទទួលភ្ញៀវទេសចរឱ្យបានរួចរាល់ មុនពិធីបុណ្យសមុទ្រមកដល់នាចុងឆ្នាំខាងមុខនេះ ។ ក្នុងពេលចុះពិនិត្យនោះ លោករដ្ឋមន្ត្រី ថោង ខុន បានមើលឃើញបញ្ហាមួយចំនួនដូចជាបញ្ហាសំរាម ការដក់ទឹកថ្លុក និងបញ្ហាអនាម័យជាដើមដោយក្នុងនោះលោកបានណែនាំឱ្យម្ចាស់រមណីយដ្ឋាន ពិសេសមន្ទីរទេសចរណ៍ត្រូវចូលរួមកែ
សម្រួលឱ្យល្អប្រសើរឡើងវិញ ។
លោករដ្ឋមន្ត្រីបានវាយតម្លៃចំពោះការរៀបចំ និងការទទួលភ្ញៀវនៅតាមរមណីយដ្ឋានទាំងនោះ គឺមានភាពល្អ ប្រសើរច្រើនហើយ ប៉ុន្តែសូមឱ្យមានការយកចិត្ត ទុកដាក់ចំពោះបញ្ហាសំរាម ដែលនៅរាយប៉ាយតាមទីធ្លាមួយចំនួននៃរមណីយដ្ឋាន ។ ត្រង់ចំណុចនេះ លោករដ្ឋមន្ត្រីក៏បានកោតសរសើរពីការរៀបចំទទួលភ្ញៀវទេសចរ និងការសម្អាតអនាម័យនៅរមណីយដ្ឋានដូងទេរ និង ឧទ្យានដងព្រែកផងដែរ ។ លោកបានណែនាំបន្ថែមឱ្យម្ចាស់ និងអ្នកមើលការនៅតាមរមណីយដ្ឋានទាំងនោះ ត្រូវពង្រឹងការយកចិត្តទុកដាក់លើបញ្ហាអនាម័យចំណីអាហារ បរិស្ថាន សន្តិសុខ សណ្ដាប់ធ្នាប់ និងត្រូវពង្រឹងគុណភាពសេវាកម្ម ពិសេសសូមកុំដំឡើងថ្លៃសេវាកម្មហួសហេតុពេក នៅពេលពិធីបុណ្យសមុទ្រមកដល់ ។
ក្រៅពីនេះ លោករដ្ឋមន្ត្រីបានពិនិត្យឃើញបញ្ហាដក់ទឹកថ្លុក និងបញ្ហាអនាម័យមួយចំនួនទៀត ប៉ុន្តែក៏មិនមែនចោទជាបញ្ហាខ្លាំងពេកដែរខណៈផ្លូវធ្វើដំណើរចូលទៅកាន់រមណីយដ្ឋានទាំងនោះ គឺអាចធ្វើដំណើរទៅបានដោយងាយស្រួល ពិសេសនៅកន្លែងកម្សាន្តទាំងនោះ ។ លក្ខណៈពិសេសមួយផងដែរ សម្រាប់រមណីយដ្ឋានទេសចរណ៍ទាំង៤សំខាន់ៗខាងលើនេះ ដោយវាស្ថិតនៅបន្តបន្ទាប់គ្នាតាមផ្លូវតែមួយ ដែលអាចឱ្យភ្ញៀវទេសចរធ្វើដំណើរទៅលេងកម្សាន្តបានសព្វហើយក៏ស្ថិតនៅមិនឆ្ងាយពីគ្នាប៉ុន្មានឡើយ ។
សូមជម្រាបថា ពិធីបុណ្យសមុទ្រលើកទី៨ ជុំទី២ នៅខេត្តកំពត នឹងប្រារព្ធធ្វើចាប់ពីថ្ងៃទី២០-២២ ខែធ្នូខាងមុខ ។ ដូច្នេះហើយ បានជាលោករដ្ឋមន្ត្រី ថោង ខុន មានការជំរុញយ៉ាងម៉ឺងម៉ាត់ដល់មន្ទីរទេសចរណ៍ខេត្ត កំពត ក៏ដូចជាម្ចាស់រមណីយដ្ឋាននីមួយៗ ត្រូវត្រៀមខ្លួនឱ្យបានរួចរាល់ មុនព្រឹត្តិការណ៍ទេសចរណ៍ដ៏ធំនេះឈានចូលមកដល់ ៕
ចែករំលែកព័តមាននេះ