រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា នៅក្នុងសាលាបឋមសិក្សាទួលសង្កែ ត្រូវបានភ្លើងឆាបឆេះនៅរោងឈើមួយកន្លែង បង្កឲ្យផ្អើលទៅដល់សមត្ថកិច្ច រួមជាមួយរថយន្តពន្លត់អគ្គិភ័យមកចំនួន៣គ្រឿងទើបបាញ់រលត់អស់ទាំងស្រុង ហេតុការណ៍នេះបានកើតឡើង កាលពីវេលាម៉ោង៨និង១៥នាទីយប់ថ្ងៃទី២០ ខែតុលានេះ តាមបណ្តោយផ្លូវ907នៅចំណុចក្នុងសាលាបឋមសិក្សាទួលសង្កែ ដែលស្ថិតនៅក្នុងសង្កាត់ទួលសង្កែទី1 ខណ្ឌឬស្សីកែវ ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុខាងលើនេះ គេបានឃើញផ្សែងហ៊ុយចេញមកពីខាងក្នុងសាលាទួលសង្កែយ៉ាងខ្លាំង ហើយគួបផ្សំមានអណ្តាតភ្លើងយ៉ាងសន្ធោសន្ធៅថែមទៀត ទើបភ្លាមៗនោះដែរក៏មានសមត្ថកិច្ចបានចុះមកដល់ទីតាំងខាងលើ ហើយក៏រាយការណ៍ទៅឲ្យខាងរថយន្តពន្លត់អគ្គិភ័យចុះមកអន្តរាគមន៍បាញ់ពន្លត់អស់ចំនួន៣គ្រឿងទើបរលត់អស់ទាំងស្រុងតែម្តង មិនបង្កឲ្យរាលដាលដល់កន្លែងផ្សេងនោះទេ ហើយខូចខាតសម្ភារដូចជា គ្រឿងឈើធ្វើកៅអីតែប៉ុណ្ណោះ ។
ក្នុងហេតុការណ៍នេះមានវត្តមានលោកអភិបាលខណ្ឌឬស្សីកែវក៏បានចុះមកជួយអន្តរាគមន៍ផងដែរ ហើយមូលហេតុបង្កឲ្យមានអគ្គិភ័យឆាបឆេះខាងលើនេះ គឺបណ្តាលមកពីទុស្សេខ្សែភ្លើង ៕ កែសម្រួលដោយ ៖ សុឃាក់
ចែករំលែកព័តមាននេះ