រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា មានហេតុការណ៍ភ្ញាក់ផ្អើលមួយបានកើតឡើងទាំងកណ្ដាលរាត្រី ផ្អើលអស់ប្រជាពលរដ្ឋ និងសមត្ថកិច្ចព្យាយាមអន្តរាគមន៍ ខណៈមាននារីម្នាក់យកផ្លែឡាមយ៉ាងមុតស្រួចមកអារដៃខ្លួនឯងរយះសាច់ជាច្រើនកន្លែងហូរឈាមស្រោចពេញខ្លួន ព្រោះតែតូចចិត្តនឹងគូស្នេហ៍ដែលគាត់ស្រឡាញ់ស្មើជីវិតអស់ជាច្រើនឆ្នាំ បែរជាក្បត់ចិត្តគាត់លួចលាក់មានស្នេហ៍ថ្មី។ ហេតុការណ៍នេះបានឱ្យមានការភ្ញាក់ផ្អើលកាលពីម៉ោង12និង30នាទីរំលងអធ្រាត្រឈានចូលថ្ងៃទី21 ខែតុលា នៅទល់មុខនឹង «ហ្សូក ក្លឹប» ផ្លូវ1986 សង្កាត់ទឹកថ្លា ខណ្ឌសែនសុខ ។
សេចក្តីរាយការណ៍បន្តថា នារីខាងលើនេះត្រូវបានគេស្គាល់ថា ឈ្មោះលីន អាយុ26ឆ្នាំ ស្នាក់នៅផ្ទះជួល ផ្លូវ2002 ក្នុងសង្កាត់ទឹកថ្លា ខណ្ឌសែនសុខ មុខរបរលក់ផលិតផលអនឡាញ។ ចំណែកបុរសជាសង្សារត្រូវបាននារីរងគ្រោះបញ្ជាក់ថា ឈ្មោះ ឡឹក បុរី អាយុ28ឆ្នាំ មុខរបរបុគ្គលិកក្លឹប ហ្សូក ស្នាក់នៅកន្លែងធ្វើការ។
តាមសម្តីរៀបរាប់របស់នារីរងគ្រោះឱ្យដឹងថា គាត់និងបុរសខាងលើនោះមិនមែនជាប្តីប្រពន្ធស្របច្បាប់នឹងគ្នាទេ តែលើសពីពាក្យសង្សារ គឺពួកគាត់រស់នៅដូចជាប្តីប្រពន្ធអញ្ចឹងអស់រយៈពេលជាច្រើនឆ្នាំ (គឺ3ឆ្នាំ) រហូតមានកូនប្រុសម្នាក់ទៀតដែលទើបតែអាយុ3ខែ ក៏ស្លាប់បាត់បង់ជីវិតទៅ ដោយសារជំងឺកាចសាហាវនៅប៉ុន្មានថ្ងៃមុននេះទេ។
នារីខាងលើបញ្ជាក់ទៀតថា គាត់ស្រឡាញ់សង្សារស្មើនឹងអាយុជីវិត គាត់តែងសង្ឃឹមថាបុរសជាសង្សាររូបនោះនឹងធ្វើជាប្តីល្អមើលថែគាត់ទៅថ្ងៃខាងមុខបាន។ តែក្តីសង្ឃឹមទាំងប៉ុន្មានប្រែជារលាយសូន្យឈឹងដូចអំបិលត្រូវទឹក ខណៈកូនដែលកើតចេញពីឈាមបុរសនោះគេមិនទទួលស្គាល់ ហើយបែរជាអាយុខ្លីស្លាប់ដោយសារជំងឺទៀត។ មិនតែប៉ុណ្ណោះបុរសជាសង្សារដែលគាត់ស្រឡាញ់ស្មើកែវភ្នែកទាំងគូរនេះ បែរជាលួចលាក់បង្កើតស្នេហ៍ថ្មី ជាមួយនារីម្នាក់ដែលធ្វើការនៅក្នុងក្លឹបជាមួយគ្នា រហូតគាត់តាមទាន់ជាច្រើនលើកច្រើនសារតែបុរសនោះតែងនិយាយថា គ្រាន់តែរ៉ាប់អានគ្នាធម្មតាទេ តែផ្ទុយពីពាក្យបុរសនោះនិយាយ គឺនៅពីក្រោយខ្នង ពួកគេតែងណាត់ជួបគ្នាបង្កាត់ភ្លើងស្នេហ៍ជាច្រើនលើកច្រើនសារមកហើយ។
ប្រភពដដែលបន្តថា លុះនៅយប់កើតហេតុនេះ គឺគាត់មករកសង្សារដល់កន្លែងធ្វើការនេះ គឺគ្រាន់តែចង់សួរឱ្យច្បាស់ថា តើសង្សារគាត់ចង់ទទួលខុសត្រូវចំពោះគាត់បែបណា ឬក៏ចង់បញ្ចប់ដោយគ្មានចម្លើយបែបនេះ? តែពេលមកដល់ក្លឹបក៏ត្រូវសន្តិសុខហាមឃាត់មិនឲ្យចូល គាត់ក៏ឱ្យគេហៅសង្សារគាត់ចេញមកក្រៅជួបនិយាយគ្នាឱ្យដឹង.ស និងខ្មៅតែម្តង ។ តែខាងប្រុសមិនចេញមកទេធ្វើឲ្យគាត់ឈឺចិត្តជាខ្លាំង ទើបសម្រេចចិត្តយកឡាមមកអារដៃខ្លួនឯងជាច្រើនកន្លែងឈាមស្រោចពេញខ្លួនបែបនេះ ដើម្បីចង់បញ្ជាក់ថា «គាត់ឈឺកាយ មិនស្មើនឹងគាត់ឈឺចិត្តនោះទេ» ។
ប្រភពដដែលបញ្ជាក់ថា អ្នកដែលធ្លាប់ជួបអារម្មណ៍ដែលមនុស្សយើងស្រឡាញ់ គេបោះបង់យើងចោលប្រាកដជាយល់អារម្មណ៍នេះច្បាស់ ។ គាត់បញ្ជាក់ទៀតថា « អ្នកផ្សេងអាចមើលមកខ្ញុំថា ខ្ញុំឆ្កួតដែលធ្វើបែបនេះ តែបើសិនជាអ្នកជួបរឿងនេះដូចខ្ញុំ ឬក៏អ្នកជារូបខ្ញុំផ្ទាល់ ខ្ញុំសង្ឃឹមថាអ្នកនឹងយល់» នេះជាសម្តីនារីរងគ្រោះបានបញ្ជាក់ប្រាប់ឱ្យដឹង។
ភ្លាមៗបន្ទាប់ពីនារីរងគ្រោះបង្កភាពភ្ញាក់ផ្អើល សមត្ថកិច្ចមូលដ្ឋានក៏មកដល់ជួយអន្តរាគមន៍ដែល តែមិនអាចហាមឃាត់នារីរងគ្រោះបានទេ បើចាប់គាត់ គាត់ខាំអណ្តាតសម្លាប់ខ្លួនឯង អ៊ីចឹងហើយមានតែបណ្តោយតាមនារីរងគ្រោះនោះទៅ។
ក្រោយពេលកើតហេតុ បុរសជាសង្សារមិនបានចេញមកជួបនារីរងគ្រោះទេ ថែមទាំងផ្តាំតាមគេថា ឈប់ឱ្យនារីរងគ្រោះរូបនោះមកជួបគាត់ទៀត ព្រោះនេះមិនមែនជាលើកទីមួយ ដែលនារីរងគ្រោះធ្វើបែបនេះទេ។ ហើយនារីរងគ្រោះបានបញ្ជាក់ថា បើខាងប្រុសមិនព្រម ចេញមកជួបគាត់ទេ គាត់មិនទៅណាដែល គឺនៅអង្គុយចាំទល់ភ្លឺ ។ (កែសម្រួលដោយ ៖ បុប្ផា)
ចែករំលែកព័តមាននេះ