រាជធានីភ្នំពេញ ៖ បុរសជនជាតិចិនម្នាក់បានបើកបររថយន្តមួយគ្រឿងម៉ាករ៉េវហ្វ័រ (RAV4) ក្នុងទិសដៅបញ្ច្រាសទិសចរាចរណ៍បោះពួយក្នុងល្បឿនលឿនជ្រុលទៅបុកជាមួយរថយន្តបែនដឹកខ្សាច់១គ្រឿងចំពីមុខយ៉ាងពេញទំហឹង បណ្ដាលឲ្យរងការខូចខាតទាំងសងខាង ប៉ុន្តែមិនបណ្ដាលឲ្យនរណាម្នាក់រងរបួសឬស្លាប់នោះឡើយ បន្ទាប់មកនគរបាលចុះទៅធ្វើការវាស់វែងនិងនាំយករថយន្តទាំង២គ្រឿងទៅរក្សាទុករង់ចាំការដោះស្រាយគ្នានៅពេលក្រោយ។
ហេតុកាណ៍ខាងលើនេះបានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី២០ ខែតុលា ឆ្នាំ២០១៩ ស្ថិតនៅលើកំណាត់ផ្លូវជាតិលេខ៣ ស្ថិតនៅក្នុងភូមិព្រៃព្រីងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ភាគីខាងរថយន្តមួយគ្រឿងម៉ាករ៉េវហ្វ័រ (RAV4) ពណ៌ទឹកមាស ពាក់ស្លាកលេខ ភ្នំពេញ ២Y-៨៨៣២បើកបរដោយបុរសជនជាតិចិនម្នាក់ មិនត្រូវបានស្គាល់ឈ្មោះឡើយ ។ ចំណែកភាគីរថយន្តបែនដឹកខ្សាច់មួយគ្រឿង ពណ៌ស ពាក់ស្លាកលេខ ភ្នំពេញ ៣D-៨១៧៧ បើកបរដោយបុរសម្នាក់មិនស្គាល់ឈ្មោះ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញបុរសជនជាតិចិនម្នាក់ បើកបររថយន្តមួយគ្រឿងម៉ាករ៉េវហ្វ័រ ធ្វើដំណើរក្នុងទិសដៅពីជើងទៅត្បូង បញ្ច្រាសទិស ដោយមិនបានបើកបរប្រកាន់ស្តាំឡើយ ។ លុះពេលទៅដល់ត្រង់ចំណុចកើតហេតុក៏បានជ្រុលទៅបុកចំពីមុខរថយន្តបែនដឹកខ្សាច់យ៉ាងពេញទំហឹងតែម្ដង។
តាមប្រភពព័ត៌មានបានឱ្យដឹងបន្តថា ក្នុងហេតុការណ៍ខាងលើនេះបានបណ្ដាលឲ្យរថយន្តទាំង២គ្រឿងរងការខូចខាតដូចគ្នា ប៉ុន្តែរថយន្តម៉ាករ៉េវហ្វ័រ រងការខូចខាតខ្លាំងជាងរថយន្តបែនដឹកខ្សាច់ ប៉ុន្តែមិនបានបណ្ដាលឲ្យមានគ្រោះថ្នាក់ដល់មនុស្សណាម្នាក់ឡើយ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅនិងនគរបាលចរាចរណ៍ខណ្ឌពោធិ៍សែនជ័យបានចុះទៅធ្វើការវាស់វែងនិងនាំយករថយន្តទាំង២គ្រឿងទៅរក្សាទុករង់ចាំការដោះស្រាយគ្នានៅពេលក្រោយ៕ (កែសម្រួលដោយ ៖ ធីតា)
ចែករំលែកព័តមាននេះ