ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា រឿងនឹកស្មានមិនដល់ ដោយចោរមួយក្រុមលួចគោរបស់អ្នកភូមិជាច្រើនក្បាល ហើយដឹកតាមរថយន្តកូរ៉េមួយគ្រឿង តែចៃដន្យអាក្រក់បើកធ្លាក់ផ្លូវទៅមុខមិនរួច ក៏នាំគ្នារត់គេចខ្លួនបាត់ស្រមោលតែម្តង។ សេចក្តីរាយការណ៍បន្តថា ករណីខាងលើនេះ…
ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា រឿងនឹកស្មានមិនដល់ ដោយចោរមួយក្រុមលួចគោរបស់អ្នកភូមិជាច្រើនក្បាល ហើយដឹកតាមរថយន្តកូរ៉េមួយគ្រឿង តែចៃដន្យអាក្រក់បើកធ្លាក់ផ្លូវទៅមុខមិនរួច ក៏នាំគ្នារត់គេចខ្លួនបាត់ស្រមោលតែម្តង។
សេចក្តីរាយការណ៍បន្តថា ករណីខាងលើនេះ កើតឡើងនៅម៉ោង១និង១០នាទីយប់ឈានចូលថ្ងៃទី១៩ ខែតុលា ឆ្នាំ២០១៩ ខណៈគោរបស់ប្រជាពលរដ្ឋចំនួន៤ក្បាលត្រូវក្រុមចោរលួចទៅបាត់ ស្ថិតនៅចំណុចចក់ចារ ភូមិព្រះ ឃុំស្រែឈូក ស្រុកកែវសីមា ខេត្តមណ្ឌលគិរី ។
សេចក្តីរាយការណ៍បន្តទៀតថា ម្ចាស់គោខាងលើមាន ១-ឈ្មោះ លេង ទយ ភេទប្រុស អាយុ២៥ឆ្នាំ ជនជាតិ ភ្នង មុខរបបកសិករ បាត់គោចំនួន២ក្បាល។ ២-ឈ្មោះ គី ប៉ោង ភេទប្រុស អាយុ២៣ឆ្នាំ ជនជាតិភ្នង មុខរបបកសិករ បាត់គោចំនួន២ក្បាល ។ ម្ចាស់គោទាំង២នាក់ គឺជាប្រជាពលរដ្ឋរស់នៅភូមិ-ឃុំកើតហេតុខាងលើ ។
ប្រភពដដែលបានឲ្យដឹងថា កម្លាំងនគរបាលប៉ុស្តិ៍ស្រែឈូក និងកម្លាំងប្រជាការពារ រួមទាំងម្ចាស់គោ បានធ្វើការស្វែងរកគោដែលត្រូវចោរលួចបាត់ លុះរហូតដល់ម៉ោង១១និង៤០នាទីព្រឹក ថ្ងៃទី១៩ ខែតុលា ឆ្នាំ២០១៩ ទើបរកឃើញនៅចំណុចអូរបោះរបង ឃុំស្វាយជ្រះ ស្រុកស្នួល ខេត្តក្រចេះ ។
ហើយពេលទៅដល់ គោទាំង៤ ក្បាលនោះបានស្ថិតនៅលើឡានមួយគ្រឿង ម៉ាក Hyundai ២តោនកន្លះ គ្មានស្លាកលេខ ក្បាលពណ៌ស ទ្រុងពណ៌ខៀវ បើកធ្លាក់ផ្លូវ ដោយម្ចាស់រថយន្តរត់គេចខ្លួនបាត់ នៅពេលដែលកម្លាំងប៉ុស្តិ៍រដ្ឋបាលស្វាយជ្រះស្រុកស្នួល ខេត្តក្រចេះ កំពុងឃាត់រថយន្តនោះ ។
បច្ចុប្បន្នកម្លាំងនគរបាលប៉ុស្តិ៍ស្វាយជ្រះរបស់ខេត្តក្រចេះ បានប្រគល់វត្ថុតាង រួមមានរថយន្ត និងគោ៤ក្បាលជូនកម្លាំងប៉ុស្តិ៍ស្រែឈូក ស្រុកកែវសីមា ខេត្តមណ្ឌលគិរី ដើម្បីបន្តនីតិវិធី។ (កែសម្រួលដោយ ៖ បុប្ផា)
ចែករំលែកព័តមាននេះ