រាជធានីភ្នំពេញ ៖ ស្ត្រីម្នាក់មិនស្គាល់អត្តសញ្ញាណម្នាក់បើករថយន្តមួយគ្រឿងម៉ាកCRVក្នុងល្បឿនលឿនក៏ជ្រុលទៅបុកគូទរថយន្តមួយគ្រឿងម៉ាកKiNយ៉ាងពេញទំហឹងបណ្តាលអោយរងការខូចខាតយ៉ាងដំណំ ហើយដោយសារតែរថយន្តបង្កមានល្បឿនលឿនពេកទើបវិល២ជុំរ៉ីយ៉ែទបុកចូលឃ្លាំងមួយកន្លែងថែមទៀត បង្កការភ្ញាក់ផ្អើលកាលពីវេលាម៉ោង១ និង៣០នាទីរំលងអធ្រាត្រឈានចូលថ្ងៃទី១៩ ខែតុលា ឆ្នាំ២០១៩ តាមបណ្តោយផ្លូវហាណូយ នៅចំណុចក្បែរប៉ុស្តិ៍រដ្ឋបាលឃ្មួញ ស្ថិតនៅក្នុងសង្កាត់ឃ្មួញ ខណ្ឌសែនសុខ ។
រថយន្តបង្កមួយគ្រឿងខាងលើម៉ាក CRV ពណ៌ខ្មៅ ពាក់ស្លាកលេខ ភ្នំពេញ ២B-២៦៣៦
បើកបរដោយស្ត្រីម្នាក់មិនស្គាល់អត្តសញ្ញាណ ។ ចំណែករថយន្តមួយគ្រឿងទៀតម៉ាកKiN ពណ៌ស
ពាក់ស្លាកលេខ ភ្នំពេញ ២BB-១២៧១ បើកបរដោយជនជាតិចិន
។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេឃើញរថយន្តស៊េរីទំនើបមួយគ្រឿងម៉ាកKiN បើកបរដោយជនជាតិចិន ធ្វើដំណើរតាមបណ្តោយផ្លូវហាណូយក្នុងទិសដៅពីត្បូងទៅជើង លុះពេលមកដល់ចំណុចកើតហេតុខាងលើនេះ ក៏ស្រាប់តែមានស្ត្រីម្នាក់មិនស្គាល់អត្តសញ្ញាណនោះទេ បើករថយន្តមួយគ្រឿងម៉ាកCRV ធ្វើដំណើរក្នុងទិសដៅស្របគ្នាក្នុងល្បឿនយ៉ាងលឿនដូចហោះ ទំនងជាអ្នកបើកបររថយន្តងោកមួយភាំងក៏រេចង្កូតជ្រុលទៅបុកគូទរថយន្តម៉ាកKin យ៉ាងពេញទំហឹង បណ្តាលអោយខ្ទេចអស់មួយកំណាត់ខាងក្រោយរួញចូលគ្នាតែម្តង ។
តាមប្រភពដដែលបានបន្តថា បន្ទាប់មករថយន្តបង្កដែលខ្ទេចអស់មួយកំណាត់ខាងមុខ និងផ្ទុះពោងទាំងសងខាង ប៉ុន្តែដោយសាររថយន្តបង្កដែលមានល្បឿនលឿនពេកទើបវិល២ជុំក៏រ៉ីយ៉ែទៅបុកចូលឃ្លាំងមួយកន្លែងទៀតយ៉ាងពេញទំហឹង បណ្តាលអោយវៀចទ្វារអស់មួយផ្ទាំង និងប៉ះជាមួយរ៉ឺម៉កមួយគ្រឿងទៀត បណ្តាលអោយវៀចបូមខាងមុខ ។ ភ្លាមៗនោះដែរ ក៏មានសមត្ថកិច្ចជំនាញរបស់ផ្នែកចរាចរណ៍នៃអធិការរដ្ឋាននគរបាលខណ្ឌសែនសុខចុះមកដល់កន្លែងកើតហេតុ និងជួយសម្រួលអោយចរចាគ្នា ។
ក្រោយពេលកើតហេតុ ភាគីខាងរថយន្តបង្កសុំធានាជួសជុលអោយម៉ាស្អាតដូចដើមឡើងវិញទៅអោយភាគីខាងរថយន្តរងគ្រោះដើម្បីបញ្ចប់រឿងនៅនឹងកន្លែងកើតហេតុតែម្តង៕
(កែសម្រួលដោយ ៖ ធីតា)
ចែករំលែកព័តមាននេះ