ខេត្តប៉ៃលិន ៖ មានការលើកឡើងចំពោះករណីសមត្ថកិច្ចចម្រុះឆ្មក់ចុះបង្ក្រាបឈើប្រណីតបានជាង១០០ដុំ។ តែប្រភពពីអ្នករស់នៅក្បែរកន្លែងកើតហេតុ បាននាំគ្នានិយាយបង្ហើបតាមហាងកាហ្វេ គុយទាវ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅថា ឈើទាំងអស់នោះមានរហូតដល់ទៅជាង៣០០ដុំឯណោះ…
ខេត្តប៉ៃលិន ៖ មានការលើកឡើងចំពោះករណីសមត្ថកិច្ចចម្រុះឆ្មក់ចុះបង្ក្រាបឈើប្រណីតបានជាង១០០ដុំ។ តែប្រភពពីអ្នករស់នៅក្បែរកន្លែងកើតហេតុ បាននាំគ្នានិយាយបង្ហើបតាមហាងកាហ្វេ គុយទាវ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅថា ឈើទាំងអស់នោះមានរហូតដល់ទៅជាង៣០០ដុំឯណោះ ហើយការចាប់នេះ ស្ថិតនៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ចំពោះការបង្ក្រាបចាប់ឈើកាលពីវេលាម៉ោង៩ និង៣០នាទីយប់ ថ្ងៃទី១៧ ខែតុលា ឆ្នាំ២០១៩ សមត្ថកិច្ចហាក់ដូចជាមានការលាក់លៀម មិនឲ្យបែកធ្លាយចេញនូវព័ត៌មាននៃការបង្ក្រាបឈើប្រណីតមកខាងក្រៅនោះឡើយ ដោយមិនដឹងថា មានរឿងអ្វីនៅពីក្រោយករណីការចាប់ឈើប្រណីតនោះទេ ហើយកន្លងមកខាងសមត្ថកិច្ចក៏មិនដែលឃាត់បានម្ចាស់ ឬអ្នកទទួលខុសត្រូវទៅលើបទល្មើសឈើប្រណីតនោះដែរ។
ប្រភពព័ត៌មានពីនគរបាលបានលួចបញ្ចេញឲ្យភ្នាក់ងារព័ត៌មានដឹងថា កាលពីម៉ោង៩និង៣០នាទីយប់ ថ្ងៃទី១៧ ខែតុលា ឆ្នាំ២០១៩ ក្រុមសមត្ថកិច្ចបានចុះបង្ក្រាបករណីរកស៊ីឈើខុសច្បាប់ ហើយត្រូវបានដឹកទៅកាន់ស្នងការដ្ឋាននគរបាលខេត្តប៉ៃលិន នៅព្រឹកថ្ងៃទី១៨ ខែតុលានេះ ដោយមានការអនុញ្ញាតពីលោក តូច សុភក្តី ព្រះរាជអាជ្ញាអមសាលាដំបូងខេត្ត ហើយដឹកនាំបញ្ជាផ្ទាល់ដោយលោកឧត្តមសេនីយ៍ត្រី ស៊ិន សុភាលក្ម្ស៊ី ស្នងការស្តីទី (ដោយមានការឯកភាពពីលោកស្នងការ)។
ប្រភពបន្តថា លោកវរសេនីយ៍ឯក ម៉ែ រិទ្ធី ស្នងការរង ផែនការងារនគរបាលប្រឆាំងបទល្មើសសេដ្ឋកិច្ច បានដឹកនាំជំនាញការិយាល័យនគរបាលប្រឆាំងបទល្មើសសេដ្ឋកិច្ចសហការជាមួយកម្លាំងកងរាជអាវុធហត្ថខេត្ត កម្លាំនគរបាលប្រចាំការនៅទីស្នាក់ការព្រំដែន និងកម្លាំងប៉ុស្ដិ៍នគរបាលការពារព្រំដែនគោកអូរឈើក្រំ នៃវរៈសេនាតូចការពារព្រំដែនលេខ៨២១ ចុះបង្ក្រាបករណីដឹកជញ្ជូនឈើឆ្លងដែនខុសច្បាប់ពីព្រំដែនថៃមកកម្ពុជា នៅចំណុចដីចំការរបស់ឈ្មោះ តឹក វណ្ណឌី ហៅថា ភេទប្រុស អាយុ៥៣ឆ្នាំ ជាសមាជិកក្រុមប្រឹក្សាឃុំស្ទឹងកាច់ ស្ថិតក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ប្រភពដដែលបន្តថា ចំពោះលទ្ធផលបង្ក្រាបបានរួមមាន ៖ ទី១-ឈើចំនួន១០៥ដុំ (មិនទាន់ញែកប្រភេទ និងថ្លឹងនៅឡើយ) ទី២- ទូរស័ព្ទចំនួន០២គ្រឿង ទី៣- សោឡាន ចំនួន០២ និងទី៤- ម៉ូតូចំនួន០១គ្រឿង។ ចំពោះវត្ថុតាងខាងលើ ដោយមានការឯកភាពពីលោក តូច សុភក្ដី ព្រះរាជអាជ្ញាអមសាលាដំបូងខេត្ត បានឲ្យសមត្ថកិច្ចយកទៅរក្សាទុកនៅស្នងការដ្ឋាននគរបាលខេត្ត។
បើតាមសម្តីលោក មិន រ៉ាវុធ នាយផ្នែករដ្ឋបាលព្រៃឈើប៉ៃលិន បានឱ្យដឹងថា ខាងសមត្ថកិច្ចចម្រុះបានចុះបង្ក្រាបករណីឈ្មួញរកស៊ីឈើខុសច្បាប់ ដោយខាងលោកអត់ដឹងរឿងនោះទេ តាមការសង្កេតមើល នេះជាលើកទី៥ហើយ ដែលគេមិនឱ្យខាងមន្ទីរជំនាញរដ្ឋបាលព្រៃឈើដឹង ក៏មិនទាន់ឃើញគេបញ្ជូនឈើមកខាងលោក ដើម្បីពិនិត្យដែរ ពោលគឺរំលងរហូតតែម្តង។
ពាក់ព័ន្ធនឹងបញ្ហាខាងលើនេះ លោក ម៉ែ រីទ្ធី ស្នងការរង ផែនការងារនគរបាលប្រឆាំងបទល្មើសសេដ្ឋកិច្ច បានឱ្យដឹងថា ខាងលោកកំពុងរៀបចំសំណុំរឿង ហើយរង់ចាំលោកស្នងការត្រឡប់មកពីបំពេញភារកិច្ចវិញ នឹងបញ្ជូនឈើខាងលើ។ លោកបន្តទៀតថា ចំពោះព័ត៌មានថា ខាងសមត្ថកិច្ចចាប់ឈើប្រណិតរហូតដល់ជាង៣០០ដុំនោះជារឿងភូតកុហកបោកប្រាស់ទេ ពោលគឺមិនពិតនោះឡើយ ព្រោះការបង្ក្រាបនេះ មានមន្ត្រីជំនាញពាក់ព័ន្ធចូលរួមជាច្រើនស្ថាប័ន។ (កែសម្រួលដោយ ៖ បុប្ផា)
ចែករំលែកព័តមាននេះ