រាជធានីភ្នំពេញ ៖ បុរសម្នាក់ជាមន្ត្រីយោធាជើងទឹកស័ក្តិ៤កន្លះម្នាក់ បានស្លាប់នៅនឹងកន្លែងកើតហេតុ ចំណែកស្ត្រីម្នាក់ទៀតរងរបួសធ្ងន់ ខណៈជនរងគ្រោះទាំង២នាក់ជិះម៉ូតូមួយគ្រឿងបំរុងនឹងបត់ចូលបន្ទាយ ក៏ត្រូវរថយន្តមួយគ្រឿងបើកបុកពីក្រោយយ៉ាងពេញទំហឹង ។ ហេតុការណ៍ខាងលើនេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី១៨ ខែតុលា…
រាជធានីភ្នំពេញ ៖ បុរសម្នាក់ជាមន្ត្រីយោធាជើងទឹកស័ក្តិ៤កន្លះម្នាក់ បានស្លាប់នៅនឹងកន្លែងកើតហេតុ ចំណែកស្ត្រីម្នាក់ទៀតរងរបួសធ្ងន់ ខណៈជនរងគ្រោះទាំង២នាក់ជិះម៉ូតូមួយគ្រឿងបំរុងនឹងបត់ចូលបន្ទាយ ក៏ត្រូវរថយន្តមួយគ្រឿងបើកបុកពីក្រោយយ៉ាងពេញទំហឹង ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី១៨ ខែតុលា ឆ្នាំ២០១៩ តាមបណ្តោយផ្លូវជាតិលេខ៦ នៅចំណុចមុខខារ៉ាអូខេណាហ្សាតូ ស្ថិតនៅក្នុងសង្កាត់ជ្រោយចង្វា ខណ្ឌជ្រោយចង្វា ។
ភាគីខាងម៉ូតូមួយគ្រឿងខាងលើជិះគ្នា២នាក់ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៧ពាក់ស្លាកលេខ ភ្នំពេញ ១GD-៦៧២៩ បើកបរដោយឈ្មោះឈឹម ស៊ីណាត ភេទប្រុស អាយុ៥៥ឆ្នាំ ជាមន្ត្រីយោធាស័ក្តិ៤កន្លះ មុខងារជានាយរងការិយាល័យទទួលផែនអធិការកិច្ច ស្នាក់នៅក្នុងបន្ទាយជើងទឹក មានស្រុកកំណើតនៅខេត្តកំពង់ឆ្នាំង បានស្លាប់នៅនឹងកន្លែងកើតហេតុ ។ រីឯស្ត្រីម្នាក់ជាអ្នករួមដំណើរដែលរងរបួសធ្ងន់មិនស្គាល់អត្តសញ្ញាណទេ ។
ចំណែកភាគីខាងរថយន្តមួយគ្រឿងខាងលើម៉ាកសាំយ៉ុង ពណ៌លឿង ពាក់ស្លាកលេខ ភ្នំពេញ ២S-៥៦៦៤ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេ ឃើញបុរសម្នាក់និងស្ត្រីម្នាក់ខាងលើ មិនដឹងថា ពួកគាត់ចេញមកពីកម្មពិធីនៅទីណានោះទេ បានជិះម៉ូតូមួយគ្រឿងធ្វើដំណើរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើនេះក៏បានបើកឆ្លងផ្លូវបត់ចូលក្នុងបន្ទាយជើងទឹក ។
តាមប្រភពដដែលបានបន្តថា ខណៈម៉ូតូរបស់ជនរងគ្រោះកំពុងតែបើកឆ្លងផ្លូវ ក៏ស្រាប់តែមានរថយន្តមួយគ្រឿងម៉ាកសាំយ៉ុងដែលធ្វើដំណើរស្របទិសគ្នាមិនបានប្រយ័ត្នក៏ជ្រុលទៅបុកពីក្រោយម៉ូតូជនរងគ្រោះយ៉ាងទំហឹង និងអូសម៉ូតូកៀបនៅជាប់ក្រោមរថយន្ត បណ្តាលឱ្យអ្នកបើកបរម៉ូតូបោកក្បាលនឹងថ្នល់ស្លាប់ភ្លាមៗនៅនឹងកន្លែងកើតហេតុ រីឯស្ត្រីម្នាក់ដែលរួមដំណើរបានរងរបួសធ្ងន់ត្រូវរថយន្តសង្គ្រោះរបស់មន្ទីរពេទ្យកាល់ម៉ែតដឹកយកទៅសង្គ្រោះ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចប្រគល់ទៅអោយក្រុមគ្រួសារ យកទៅធ្វើបុណ្យទៅតាមប្រពៃណីនៅឯស្រុកកំណើត រីឯម៉ូតូ និងរថយន្តវិញត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោករង់ចាំធ្វើការដោះស្រាយតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ