សហរដ្ឋអាមេរិក ៖ សេតវិមានកាលពីថ្ងៃទី១៧តុលាបានទទួលស្គាល់ជាលើកដំបូងថា ប្រធានាធិបតីលោកដូណាល់ត្រាំពិតជាទាក់ទិននឹងការភ្ជាប់ជំនួយដល់អ៊ុយក្រែន ទៅនឹងនយោបាយផ្ទៃក្នុងអាមេរិក ដែលបែបនេះជាការផ្ដល់លទ្ធភាពថ្មីដល់ពួកអ្នកប្រជាធិបតេយ្យ ដែលស៊ើបអង្កេតសំដៅទម្លាក់ប្រធានាធិបតី។ ប្រមុខខុន្ទកាល័យសេតវិមាន លោកMICK MULVANEYបានបង្កើតការភ្ញាក់ផ្អើលដោយបញ្ចេញការសារភាពនោះ…
សហរដ្ឋអាមេរិក ៖ សេតវិមានកាលពីថ្ងៃទី១៧តុលាបានទទួលស្គាល់ជាលើកដំបូងថា ប្រធានាធិបតីលោកដូណាល់ត្រាំពិតជាទាក់ទិននឹងការភ្ជាប់ជំនួយដល់អ៊ុយក្រែន ទៅនឹងនយោបាយផ្ទៃក្នុងអាមេរិក ដែលបែបនេះជាការផ្ដល់លទ្ធភាពថ្មីដល់ពួកអ្នកប្រជាធិបតេយ្យ ដែលស៊ើបអង្កេតសំដៅទម្លាក់ប្រធានាធិបតី។
ប្រមុខខុន្ទកាល័យសេតវិមាន លោកMICK MULVANEYបានបង្កើតការភ្ញាក់ផ្អើលដោយបញ្ចេញការសារភាពនោះ ក្នុងឱកាសនៃសន្និសីទសារព័ត៌មានមួយស្ពីពីG7។ ប៉ុន្តែលោកអះអាងថាប្រការនោះពិតជាមិនមានអ្វីទាក់ទិនជាមួយអតីតប្រធានាធិបតី លោកJOE BIDEN ដែលអាចក្លាយជាគូប្រជែងរបស់លោកត្រាំក្នុងការបោះឆ្នោតប្រធានាធិបតីឆ្នាំ២០២០ឡើយ។
កាលពីខែកក្កដាលោកដូណាល់ត្រាំធ្លាប់ស្នើដល់សមភាគីអ៊ុយក្រែន លោកVOLODYMYR ZELENSKYឲ្យស៊ើបអង្កេតលើលោកJOE BIDEN និងលើរឿងរកស៊ីរបស់កូនប្រុសលោក គឺលោកHUNTERនៅអ៊ុយក្រែន។មុននេះរដ្ឋការអាមេរិកបានផ្អាកជំនួយយោធា មានទឹកប្រាក់ជិត៤០០លានដុល្លារឲ្យអ៊ុយក្រែន។
ការសម្រេចនេះជាកម្មវត្ថុនៃការស៊ើបអង្កេតដែលបើកធ្វើចាប់តាំងពី៣សប្ដាហ៍មកហើយដោយបណ្ដាសមាជិកសភានៃគណបក្សប្រជាធិបតេយ្យ ក្នុងក្របខណ្ឌនៃនីតិវិធីដកតំណែងលោកត្រាំ។
ពួកប្រជាធិបតេយ្យចង់ដឹងថា តើលោកត្រាំពិតជារំលោភបំពានអំណាចក្នុងគោលដៅផ្ទាល់ខ្លួន ពិសេសដោយផ្អាកជំនួយដល់កងយោធាអ៊ុយក្រែន ដើម្បីចាប់បង្ខំក្រុងកៀវឲ្យរួមសហការ។
លោកដូណាល់ត្រាំអះអាងថា លោកពុំបានធ្វើការគាបសង្កត់ណាមួយ លើលោកប្រធានាធិបតីZELENSKYឡើយ និងថាជំនួយត្រូវផ្អាកក្នុងពេលធ្វើការវាយតម្លៃលើជំនួយដល់អ៊ុយក្រែន ពីសំណាក់ដៃគូលោកខាងលិចឯទៀតៗ។ នាថ្ងៃទី១៧តុលាជាលើកដំបូងសេតវិមានទទួលស្គាល់ថា លោកត្រាំមានហេតុផលដទៃៗទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ