បើមាននរណាម្នាក់ឲ្យលុយអ្នកដើម្បីឲ្យអ្នកប្តូរលំនៅដ្ឋានតើអ្នកទៅទេ? អ្នកប្រហែលជាភ្ញាក់ផ្អើលនឹងដឹងថា ជុំវិញពិភពលោកនេះមានកន្លែងជាច្រើនដែលធ្វើដូច្នេះដោយមានមូលហេតុសមហេតុសមផល។ ភាគច្រើនកន្លែងទាំងនេះជួបប្រទះនឹងបញ្ហាធ្លាក់ចុះនៃកំណើនប្រជាជន ដូច្នេះពួកគេចង់ជំរុញដល់ការធ្វើអន្តោប្រវេសន៍ដើម្បីអភិវឌ្ឍន៍សហគមន៍ និងបង្កើនការវិនិយោគជាដើម។ ខាងក្រោមនេះគឺជាកន្លែងមួយចំនួនដែលផ្តល់ថវិកាដល់អ្នកដែលប្តូរទៅរស់នៅ៖
១. Alaska នៃសហរដ្ឋអាមេរិក ៖
រដ្ឋាភិបាលក្នុងរដ្ឋ Alaska បានផ្តល់ថវិកាដល់គ្រប់មនុស្សដែលជាពលរដ្ឋរស់នៅក្នុងរដ្ឋខ្លួនតំឫងពីឆ្នាំ ១៩៨២មកម្ល៉េះ ហើយលុយទាំងនេះមានប្រភពមកពីចំណូលក្នុងវិស័យប្រេង។ ថ្លៃជាក់ស្តែងមានភាពខុសគ្នាទៅតាមបេក្ខជន និងកម្រិតនៃប្រាក់ចំណូល។កាលពីឆ្នាំ ២០១៨ ពលរដ្ឋម្នាក់ទទួលបាន ១,៦០០ដុល្លារក្នុងមួយឆ្នាំ។ ប៉ុន្តែដើម្បីទទួលបានប្រាក់នេះ ពលរដ្ឋត្រូវតែរស់នៅរដ្ឋនេះមួយឆ្នាំពេញជាមុនសិន និងមានគោលបំណងធ្វើជាពលរដ្ឋអចិន្ត្រៃយ៍របស់រដ្ឋនេះ។
២. Vermont នៃសហរដ្ឋអាមេរិក៖
រដ្ឋ Vermont មានកម្មវិធីមួយដែលទើបតែត្រូវបានបង្កើតឡើងក្នុងមករាឆ្នាំ ២០១៩ នេះ ដែលផ្តល់ថវិកាឲ្យមនុស្សចំនួន ១០០ នាក់ដល់ទៅ ១០,០០០ដុល្លារដើម្បីឲ្យពួកគេប្តូរលំនៅដ្ឋាន ហើយចំនួននឹងធ្លាក់មក ២០នាក់ក្នុងមួយឆ្នាំនៅឆ្នាំក្រោយ។ អ្នកដែលអាចចូលរួមកម្មវិធីនេះត្រូវតែស្នាក់នៅរដ្ឋ Vermont និងមានការងារពេញម៉ោងនៅក្រៅរដ្ឋ Vermont។ រដ្ឋាភិបាលនឹងបង់ថ្លៃសម្រាប់ការប្តូរលំនៅដ្ឋាន ថ្លៃការិយាល័យរួម កម្មវិធី Hardware ឬ Software សម្រាប់កុំព្យូទ័រ និងថ្លៃអ៊ីនធើណែតដល់ទៅប្រមាណ៥ពាន់ដុល្លារក្នុងមួយឆ្នាំក្នុងរយៈពេល២ឆ្នាំផងដែរ។
៣. Albinen នៃប្រទេសស្វ៊ីស៖
ភូមិ Albinen នៃជួរភ្នំស្វ៊ីសឲ្យថវិកាប្រមាណ២៥,០០០ដុល្លារសម្រាប់មនុស្សពេញវ័យម្នាក់ និង ១០,០០០សម្រាប់ក្មេងម្នាក់ដើម្បីប្តូរទៅរស់នៅក្នុងភូមិនេះប្រសិនបើពួកគេឆ្លងផុតស្តង់ដារដ៏ខ្ពស់ក្នុងការជ្រើសរើស។ អ្នកត្រូវតែប្តេជ្ញារស់នៅទីនោះឲ្យបានយ៉ាងតិច ១០ឆ្នាំ មានអាយុក្រោម ៤៥ឆ្នាំ ទិញផ្ទះមួយដែលមានតម្លៃយ៉ាងតិច ២០០,០០០ដុល្លារ និងមានសិទ្ធិក្នុងការស្នាក់នៅអចិន្ត្រៃយ៍។
រដ្ឋាភិបាលមានគោលដៅនាំយកគ្រួសារប្រមាណពី ៥ទៅ ១០គ្រួសារប៉ុណ្ណោះ។
៤. កោះ Antikythera នៃប្រទេសក្រិច៖
កោះនេះមានបញ្ហាប្រជាជនយ៉ាងធ្ងន់ធ្ងរជាងគេក្នុងចំណោមទីកន្លែងក្នុងអត្ថបទនេះ។ នៅឆ្នាំ ២០១៨ កោះនេះមានប្រជាជនស្នាក់នៅអចិន្ត្រៃយ៍តែ ២៤នាក់ប៉ុណ្ណោះហើយភាគច្រើនពួកគេមានអាយុលើស ៧០ឆ្នាំទៅទៀត។ ដើម្បីដោះស្រាយបញ្ហានេះរដ្ឋាភិបាលមានកម្មវិធីមួយដែលផ្តល់ផ្ទះដល់ប្រជាជនថ្មីៗ ដីមួយដុំ និងប្រាក់ចាយវាយប្រមាណ ៥៥៥ដុល្លារក្នុងមួយខែក្នុងរយៈពេល ៣ឆ្នាំដំបូង ៕ កែសម្រួលដោយ ៖សុឃាក់
ចែករំលែកព័តមាននេះ