រាជធានីភ្នំពេញ ៖ កំលាំងនគរបាលអន្តរាគមន៍ខណ្ឌពោធិ៍សែនជ័យសហការជាមួយកំលាំងនគរបាលប៉ុស្តិ៍ចោមចៅទី២បានចុះល្បាតក្នុងមូលដ្ឋាន និងឃាត់ជនសង្ស័យចំនួន៥នាក់ និងឆែកឆេររកឃើញថ្នាំញៀនចំនួន២៧កញ្ចប់ ព្រមទាំងដកហូតម៉ូតូមួយគ្រឿងម៉ាកឌូក ពណ៌ខ្មៅលាយស ពាក់ស្លាកលេខ ភ្នំពេញ ១BW-០៧៣១…
រាជធានីភ្នំពេញ ៖ កំលាំងនគរបាលអន្តរាគមន៍ខណ្ឌពោធិ៍សែនជ័យសហការជាមួយកំលាំងនគរបាលប៉ុស្តិ៍ចោមចៅទី២បានចុះល្បាតក្នុងមូលដ្ឋាន និងឃាត់ជនសង្ស័យចំនួន៥នាក់ និងឆែកឆេររកឃើញថ្នាំញៀនចំនួន២៧កញ្ចប់ ព្រមទាំងដកហូតម៉ូតូមួយគ្រឿងម៉ាកឌូក ពណ៌ខ្មៅលាយស ពាក់ស្លាកលេខ ភ្នំពេញ ១BW-០៧៣១ ។
ហេតុការណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី១៧ ខែតុលា ឆ្នាំ២០១៩ នៅតាមបណ្ដោយផ្លូវបេតុង ជាប់ការដ្ឋានសំណង់ ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
ជនសង្ស័យចំនួន៥នាក់ខាងលើដែលសមត្ថកិច្ចឃាត់ខ្លួន រួមមាន ១-ឈ្មោះ ណេង ភារិទ្ធ ភេទប្រុស អាយុ២៣ឆ្នាំ មុខរបរកម្មកររោងចក្រ រស់នៅភូមិជ្រៃកោងសង្កាត់ចោមចៅទី២ខណ្ឌពោធិ៍សែនជ័យ (រកឃើញថ្នាំញៀន២៧កញ្ចប់ជាប់ខ្លួន) ទី២-ឈ្មោះ ឆាយ គីមហុង ភេទប្រុស អាយុ២៤ឆ្នាំ មុខរបរបើកបររថយន្ត រស់នៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែន ។
៣-ឈ្មោះ ផុន គិត ភេទប្រុស អាយុ១៩ឆ្នាំ មុខរបរកម្មកររោងចក្រ រស់នៅភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ ៤-ឈ្មោះ ពិន ណារ៉ា ភេទប្រុស អាយុ១៨ឆ្នាំ មុខរបរ កម្មកររោងចក្រ ស្នាក់នៅភូមិថ្មគោល សង្កាត់ចោមចៅទី២ ខណ្ឌពោធិ៍សែនជ័យ និង៥-ឈ្មោះ ផល សុវណ្ណ ភេទប្រុស អាយុ២៣ឆ្នាំ មុខរបរកម្មករសំណង់ រស់នៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
តាមប្រភពព័ត៌មានពីកំលាំងនគរបាលអន្តរាគមន៍ខណ្ឌពោធិ៍សែនជ័យបានអោយដឹងថា នៅមុនពេលកើតហេតុ កំលាំងពិសេសនៃអធិការខណ្ឌពោធិ៍សែនជ័យចុះល្បាតនៅក្នុងមូលដ្ឋានដោយមានកំលាំងអន្តរាគមន៍ចំនួន៨នាក់ជិះម៉ូតូ៤គ្រឿង ចេញពីអធិការដ្ឋានខណ្ឌ ពោធិ៍សែនជ័យធ្វើដំណើរតាមផ្លូវសហព័ន្ធរុស្ស៊ីទល់មុខព្រលានយន្តហោះអន្តរជាតិភ្នំពេញ និងតាមបណ្តាសង្កាត់ផ្សេងៗទៀត ។
តាមប្រភពដដែលបានបន្តថា បន្ទាប់មកកំលាំងនគរបាលអន្តរាគមន៍ខណ្ឌបានសហការជាមួយកំលាំងនគរបាលប៉ុស្តិ៍ចោមចៅទី២ បានចេញល្បាតនៅក្នុងភូមិសាស្ត្រខាងលើក៏ប្រទះជនសង្ស័យមួយក្រុមខាងលើ និងមានម៉ូតូមួយគ្រឿងម៉ាកឌូកផងដែរ ដោយមានការសង្ស័យ ដោយបានឃាត់សួរនាំ ស្រាប់តែជនសង្ស័យម្មាក់បានទំលាក់ថ្នាំញៀនចុះ ពេលនោះសមត្ថកិច្ចបានរកឃើញមួយកញ្ចប់ធំ ដោយច្រកជាកញ្ចប់តូចៗចំនួន២៧កញ្ចប់តូច ។
តាមប្រភពព័ត៌មានពីសមត្ថកិច្ចបានបន្តទៀតថា ភ្លាមៗនោះសមត្ថកិច្ចបាននាំជនសង្ស័យទាំង៥នាក់ខាងលើទៅផ្នែកជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធីបន្តភ្លាមៗផងដែរ ។
បន្ទាប់ពីសមត្ថកិច្ចបានសាកសួរ ជនសង្ស័យម្នាក់ឈ្មោះ ណេង ភារិទ្ធ បានទទួលស្គាល់ថា ថ្នាំញៀនដែលខ្លួនទំលាក់ចោលខាងលើនោះពិតជាថ្នាំញៀនរបស់ខ្លួនប្រាកដមែន និងកំពុងរៀបចំចែកចាយនៅទីតាំងកន្លែងកើតហេតុខាងលើ តែត្រូវកំលាំងនគរបាលចុះឃាត់បានភ្លាមៗតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ