ទូតម៉ាឡេស៊ីបង្ហាញការចាប់អារម្មណ៍ពិព័រណ៍កម្ពុជាអន្តរជាតិលើកទី៣
លោក Eldeen Husaini Mohd Hashim ឯកអគ្គរដ្ឋទូតម៉ាឡេស៊ី ប្រចាំកម្ពុជាបានសម្តែងការចាប់អារម្មណ៍យ៉ាងខ្លាំងចំពោះការរៀបចំពិព័រណ៍ទេសចរណ៍កម្ពុជាអន្តរជាតិ ( CTM-2019 )…
លោក Eldeen Husaini Mohd Hashim ឯកអគ្គរដ្ឋទូតម៉ាឡេស៊ី ប្រចាំកម្ពុជាបានសម្តែងការចាប់អារម្មណ៍យ៉ាងខ្លាំងចំពោះការរៀបចំពិព័រណ៍ទេសចរណ៍កម្ពុជាអន្តរជាតិ ( CTM-2019 )…
លោក Eldeen Husaini Mohd Hashim ឯកអគ្គរដ្ឋទូតម៉ាឡេស៊ី ប្រចាំកម្ពុជាបានសម្តែងការចាប់អារម្មណ៍យ៉ាងខ្លាំងចំពោះការរៀបចំពិព័រណ៍ទេសចរណ៍កម្ពុជាអន្តរជាតិ ( CTM-2019 ) លើកទី៣ ឆ្នាំ២០១៩ នាពេលថ្មីៗនេះ នៅសណ្ឋាគារសុខាភ្នំពេញ ខណៈដែលលោកចាត់ទុក ព្រឹត្តិការណ៍នៃការរៀបចំពិព័រណ៍នោះ គឺជាការផ្សព្វផ្សាយបន្ថែមទៀតនូវសក្តានុពល និងឱ កាសវិនិយោគលើវិស័យទេសចរណ៍នៅកម្ពុជា ។
ការលើកឡើងបែបនេះ របស់ឯកអគ្គរដ្ឋទូទម៉ាឡេស៊ី បានធ្វើឡើងនៅក្នុងឱកាសដែលលោកបានផ្តល់បទសម្ភាសន៍ដល់ក្រុមអ្នកសារព័ត៌មាន នាព្រឡប់ថ្ងៃទី១១ ខែតុលានេះ ខណៈដែលលោកអញ្ជើញចូលរួមសម្ពោធពិព័រណ៍ទេសចរណ៍កម្ពុជាអន្តរជាតិលើកទី៣ (CTM-2019) នៅសណ្ឋាគារសុខាភ្នំពេញ ក្រោមវត្តមានលោក ថោង ខុន រដ្ឋមន្ត្រីក្រសួងទេសចរណ៍ ។
ទាក់ទងវិស័យទេសចរណ៍នេះផងដែរ លោកឯកអគ្គរាជទូតម៉ាឡេស៊ីក៏បានបានលើកឡើងថា រដ្ឋាភិបាលម៉ាឡេស៊ីក៏បានបង្កើតយុទ្ធសាស្ត្រផ្សេងៗ ព្រមទាំងជំរុញព្រឹត្តិការណ៍ឆ្នាំទស្សនា ម៉ាឡេស៊ី ២០២០ ត្រូវបានអនុវត្តដោយក្រសួងទេសចរណ៍ សិល្បៈ និងវប្បធម៌ ដើម្បីជំរុញការធ្វើដំណើរមកកាន់ប្រទេសម៉ាឡេស៊ី និងដើម្បីជំរុញកំណើន និងចំណូលពីភ្ញៀវទេសចរ ។ លោកបន្តថា ចន្លោះពីខែមករា ដល់ខែមិថុនា ឆ្នាំ២០១៩ ចំនួនភ្ញៀវទេសចរសរុបបានកើនឡើង៤.៩ភាគរយជាមួយនឹងចំនួនភ្ញៀវទេសចរ ១៣.៣៥លាននាក់ បើប្រៀបធៀបនឹងចំនួនភ្ញៀវទេសចរណ៍១២.៧៣ លាននាក់ក្នុងរយៈពេលដូចគ្នាកាលពីឆ្នាំមុន ។
កំណើនប្រាក់ចំណូលពីវិស័យទេសចរណ៍បានឈានដល់៤១.៦ ពាន់លានរីងហ្គីត ពោល គឺកើនឡើង ៦.៨ ភាគរយបើប្រៀបធៀបទៅនឹងរយៈពេលដូចគ្នាកាលពីឆ្នាំមុន ។ សម្រាប់តំបន់អាស៊ានក្នុងរយៈពេលដូចគ្នាមានកំណើន ៤.៧ ភាគរយជាមួយចំនួនភ្ញៀវទេសចរ៩.៣៥ លាននាក់ បើប្រៀបធៀបនឹងចំនួនភ្ញៀវទេសចរណ៍ ៨.៩៣ លាននាក់ ក្នុងរយៈពេលដូចគ្នា កាលពីឆ្នាំមុន ។ ទីផ្សារកម្ពុជាសម្រាប់យើងបានបង្ហាញពីកំណើនដ៏គួរឱ្យកត់សម្គាល់ គឺ១៨.១% ជាមួយនឹងចំនួនភ្ញៀវទេសចរ ៥១,០០៥ នាក់ បើប្រៀបធៀបទៅនឹងចំនួនភ្ញៀវទេសចរ ៤៣,២០៦ នាក់កាលពីឆ្នាំមុន ។
ដោយឡែកនៅឆ្នាំ២០១៨ ដោយមានភ្ញៀវទេសចរ ២៥.៨ លាននាក់ បានមកទស្សនាឆ្នេរសមុទ្ររបស់យើង ដែលប្រទេសម៉ាឡេស៊ីទទួលបានចំណាត់ថ្នាក់ទី១៥ ក្នុងចំណោមប្រទេសដែលមានចំនួនភ្ញៀវទេសចរច្រើនជាងគេ ។ ទន្ទឹមនឹងនេះដែរ ប្រទេសម៉ាឡេស៊ីជាប់ចំណាត់ថ្នាក់លេខ២១ ក្នុងចំណោមប្រទេសដែលមានប្រាក់ចំណូលខ្ពស់បំផុត ក្នុងវិស័យទេសចរណ៍ដោយនាំមកនូវចំណូលទេសចរណ៍៨៤,១ ពាន់លានរីងហ្គីតក្នុងឆ្នាំ២០១៨ ។
លោកថា ប្រទេសម៉ាឡេស៊ី បានដាក់គោលដៅ ដើម្បីស្រូបយកភ្ញៀវទេសចរឲ្យបាន ៣០លាននាក់ ហើយរំពឹងថានឹងទទួលបានចំណូលប្រមាណជា២៣ពាន់លានដុល្លារ នៅឆ្នាំ២០២០។ យោងតាមសេចក្ដីប្រកាសព័ត៌មានរបស់ម៉ាឡេស៊ីក៏បានបញ្ជាក់ដែរថា គោលដៅនៃឆ្នាំទស្សនាម៉េឡេស៊ី២០២០ គឺដើម្បីបង្រួបបង្រួមអ្នកចូលរួមពីគ្រប់ឧស្សាហកម្មសហគ្រាស ដើម្បីសម្រេចបាននូវគោលដៅរួមនេះ ស្របពេលដែលការទាក់ទាញភ្ញៀវទេសចរ មកពីពាសពេញពិភពលោកឲ្យមកទទួលនូវបដិសណ្ឋារកិច្ចកក់ក្ដៅ និងទាក់ទាញជាច្រើនដែលប្រទេសម៉ាឡេស៊ីមាន ។
ការបង្កើនយុទ្ធសាស្ត្រ និងគោលដៅច្បាស់លាស់នៃការទាក់ទាញទេសចរណ៍ គឺប្រទេសម៉ាឡេស៊ីបានជាប់ចំណាត់ថ្នាក់លេខ ២១ ក្នុងចំណោមប្រទេសដែលមានប្រាក់ចំណូលខ្ពស់បំផុតក្នុងវិស័យទេសចរណ៍ដោយនាំមកនូវចំណូលទេសចរណ៍ ៨៨,១ពាន់លានរីងហ្គីត (៣០.៩១ពាន់លានដុល្លារ) ក្នុងឆ្នាំ២០១៨ ។
ដោយឡែកនៅក្នុងយុទ្ធនាការរួមវិញអំឡុងពេលនេះ ម៉ាឡេស៊ីបាន និងកំពុងចាប់ផ្ដើមផែនការ យុទ្ធនាការស្រូបទាញទេសចរណ៍អន្តរជាតិទៅប្រទេសរបស់ខ្លួនសម្រាប់ឆ្នាំ២០២០ ជាមួយពាក្យ«Visit truly Asia Malaysia 2020» ។ ចំណែកលោក NOR SHAZLY AZMI ជំនួយការនាយកទីផ្សារជាន់ខ្ពស់ប្រចាំទីផ្សារអាស៊ីនៃក្រុមព្រឹក្សាទេសចរណ៍ម៉ាឡេស៊ី បានបញ្ជាក់ផងដែរថា នៅក្នុងស្តង់ក្រុមព្រឹក្សាទេសចរណម៉ាឡេស៊ីដែលតាំងនៅក្នុងពិព័រណ៍ខាងលើនេះក៏មាន ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ និង៣ក្រុមហ៊ុនទេសចរណ៍ក្នុងស្រុកចូលរួមលក់កញ្ចប់សេវាកម្មទេសចរណ៍ទៅប្រទេសម៉ាឡេស៊ីនូវទីកន្លែងថ្មីៗដល់អតិថិជិនខ្មែរ ដើម្បីទស្សនាផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ