ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា សពពលករ2នាក់ត្រូវភាគីថៃបញ្ជូនត្រឡប់មកកម្ពុជាវិញតាមច្រកទ្វារអន្តរជាតិប៉ោយប៉ែត កាលពីយប់ថ្ងៃទី17 ខែតុលា ឆ្នាំ2019 ដោយក្នុងនោះពលករម្នាក់ដេកស្លាប់ និងពលករម្នាក់ទៀតលោតទឹកសម្លាប់ខ្លួននៅលើទឹកដីថៃ ។…
ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា សពពលករ2នាក់ត្រូវភាគីថៃបញ្ជូនត្រឡប់មកកម្ពុជាវិញតាមច្រកទ្វារអន្តរជាតិប៉ោយប៉ែត កាលពីយប់ថ្ងៃទី17 ខែតុលា ឆ្នាំ2019 ដោយក្នុងនោះពលករម្នាក់ដេកស្លាប់ និងពលករម្នាក់ទៀតលោតទឹកសម្លាប់ខ្លួននៅលើទឹកដីថៃ ។
សេចក្តីរាយការណ៍បន្តថា ជនរងគ្រោះដែលលោតទឹកសម្លាប់ខ្លួនមានឈ្មោះ ចង់ តាក់ ភេទប្រុស អាយុ28ឆ្នាំ ជាជាងកាត់កញ្ចក់ និងមានទីលំនៅភូមិខ្វំ ឃុំក្តាញ់ ស្រុកព្រៃកបាស់ខេត្តតាកែវ។ ហើយបានធ្វើអត្តឃាតលោតទឹកសម្លាប់ខ្លួនកាលពីរសៀលថ្ងៃទី14 ខែតុលានេះ ស្ថិតនៅខេត្តឆាក់ឆឺនសៅ ប្រទេសថៃ ។
បើតាមសាច់ញាតិប្រាប់ថា មុនកើតហេតុ1ថ្ងៃ ជនរងគ្រោះបានទូរស័ព្ទពីដីថៃមកប្រាប់ថា «ខ្ញុំលាហើយបងៗ ឲ្យប្អូនសុំទោសផង» លុះស្អែកឡើងស្រាប់តែទទួលព័ត៌មានអរកុសលតាមទូរស័ព្ទពីកម្មកររួមអាជីពថា ជនរងគ្រោះបានលោតទឹកសម្លាប់ខ្លួនហើយ។ ពេលសាកសួររកមូលហេតុ ក្រុមសាច់ញាតិអះអាងថា មិនបានដឹងនោះទេ ហើយថា ជនរងគ្រោះនៅលីវ និងជាមនុស្សកំព្រា មានតែបងៗប៉ុណ្ណោះ។ ហើយដោយសារតែលំនៅដ្ឋាននៅឆ្ងាយម្យ៉ាងតម្លៃរថយន្តដឹកសពថ្លៃ សាច់ញាតិបានបង្ខំចិត្តបូជាសពនៅវត្តបាលិលេយ្យ ដើម្បីយកធាតុទៅស្រុកធ្វើបុណ្យតាមប្រពៃណី។
ដោយឡែកករណីពលករម្នាក់ទៀតដែលដេកស្លាប់ឈ្មោះ ណោក ណាង ភេទប្រុស អាយុ46ឆ្នាំ ជាកម្មករសំណង់ និងមានទីលំនៅភូមិគោកត្រប់ ឃុំអំពិល ស្រុកបន្ទាយអំពិល ខេត្តឧត្តរមានជ័យ។ ជនរងគ្រោះបានដេកស្លាប់នៅក្រុងបាងកក កាលពីវេលាទៀបភ្លឺឈានចូលព្រឹកថ្ងៃទី16 ខែតុលា។
បើតាមសម្តីប្រពន្ធជនរងគ្រោះឈ្មោះ ដេត ណី អាយុ45ឆ្នាំ បានប្រាប់ថា គាត់មិនបានដឹងថា ប្តីស្លាប់ម៉ោងប៉ុន្មាននោះទេ លុះដល់ម៉ោងប្រហែល2ទៀបភ្លឺ គាត់ក្រោកបត់ជើងតូចយកដៃប៉ះ ស្រាប់តែប្តីគាត់រឹងទៅហើយ ហៅលែងឆ្លើយ ទើបដឹងថាគាត់ស្លាប់។
សូមបញ្ជាក់ថា សពជនរងគ្រោះខាងលើ ក្រោយពីបញ្ជូនដល់កម្ពុជាវិញហើយ ត្រូវបានសាច់ញាតិជួលរថយន្តដឹកបន្តទៅលំនៅដ្ឋាន ដើម្បីធ្វើបុណ្យតាមប្រពៃណី។ (កែសម្រួលដោយ ៖ បុប្ផា)
ចែករំលែកព័តមាននេះ