ខេត្តស្វាយរៀង ៖ សេចក្តីរាយការណ៍បឋមបានឲ្យដឹងថា ជនសង្ស័យជាជនជាតិចិន២នាក់ត្រូវកងរាជអាវុធហត្ថខេត្តស្វាយរៀង សហការជាមួយកងរាជអាវុធហត្ថក្រុងបាវិតចុះបង្ក្រាប និងចាប់ខ្លួនពីបទចាប់បង្ខាំងមនុស្ស និងធ្វើទារណកម្មជំរិតទាប្រាក់១ម៉ឺនដុល្លារពីជនជាតិចិន២នាក់ នៅក្នុងបន្ទប់លេខ២៣ នៃផ្ទះសំណាក់មហាជ័យ ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ។
បើតាមលោកវរៈសេនីយ៍ត្រីគង់កាន នាយការិយាល័យបទល្មើសព្រហ្មទណ្ឌនៃបញ្ជាការដ្ឋានកងរាជអាវុធហត្ថខេត្តស្វាយរៀងបានឲ្យដឹងថា ជនសង្ស័យទី១ ឈ្មោះ ហ្វង់ ឈឺឆឹង ហៅម៉ឹងគ័រ ភេទប្រុស អាយុ៤៥ឆ្នាំ ជនជាតិចិន មុខរបរចងការប្រាក់ ។ ទី២ ឈ្មោះ ធឹងចាស៊ាង ភេទប្រុស អាយុ២៨ឆ្នាំ ជាជនជាតិចិន អ្នកយាមបន្ទប់បង្ខាំងជនរងគ្រោះ ។
ប្រភពដដែលបន្តទៀតថា ដោយមានការបញ្ជាផ្ទាល់ពីលោកឧត្តមសេនីយ៍ត្រី សែវុទ្ធី មេបញ្ជាការកងរាជអាវុធហត្ថខេត្តបានឲ្យរូបលោក (គង់កាន) ដឹកនាំកម្លាំងកងរាជអាវុធហត្ថខេត្តសហការជាមួយកងរាជអាវុធហត្ថក្រុងបាវិតចុះបង្ក្រាបជនសង្ស័យដល់បន្ទប់កើតហេតុនៅវេលាម៉ោង៧និង០០នាទីយប់ ថ្ងៃទី១៤ តុលា ២០១៩ នៅក្នុងបន្ទប់លេខ២៣ ផ្ទះសំណាក់មហាជ័យ ចាប់ខ្លួនជនសង្ស័យបាន២នាក់ និងបានជួយសង្គ្រោះជនរងគ្រោះចំនួន២នាក់ ជាជនជាតិចិន ហើយបានបញ្ជូនជនរងគ្រោះទៅសង្គ្រោះនៅមន្ទីរពេទ្យឯកជន យីហោសោភណ្ឌ័អូវ៉ាង នៅក្រុងបាវិត ។
ប្រភពបន្តទៀតថា បើតាមជនរងគ្រោះប្រាប់ឲ្យដឹងថា កាលពីថ្ងៃទី១១ តុលា ២០១៩ ជនសង្ស័យបានចាប់ខ្លួនជនរងគ្រោះម្នាក់មកឃុំខ្លួននៅក្នុងបន្ទប់ខាងលើ និងវាយធ្វើទារណកម្ម ក្រោយមកទៀតនៅវេលាម៉ោង១និង០០នាទីយប់រំលងអធ្រាត្រឈានចូលថ្ងៃទី១៤តុលា ២០១៩ ក្រុមជនសង្ស័យបានចាប់ខ្លួនជនរងគ្រោះម្នាក់ទៀត មកឃុំក្នុងបន្ទប់លេខ២៣ ជាមួយគ្នា ទាំង២នាក់យកមកបង្ខាំងក្នុងបន្ទប់ ហើយចងវាយធ្វើទារណកម្មរួចយកទូរស័ព្ទរបស់ជនរងគ្រោះថតរូបភាពបង្ហោះឲ្យសាច់ញាតិជនរងគ្រោះមើល រួចជំរិតទាប្រាក់ពីក្រុមគ្រួសារជនរងគ្រោះចំនួន១ម៉ឺនដុល្លារ ។
បន្ទាប់ពីក្រុមគ្រួសារជនរងគ្រោះបានឃើញរូបភាពធ្វើទារណកម្មលើសាច់ញាតិរបស់ខ្លួនក៏បានដាក់ពាក្យបណ្តឹងមកសមត្ថកិច្ចឲ្យជួយអន្តរាគមន៍ និងសង្គ្រោះជនរងគ្រោះ ។ ក្រោយពីទទួលពាក្យបណ្តឹងពីក្រុមគ្រួសារជនរងគ្រោះសមត្ថកិច្ចបានធ្វើការស្រាវជ្រាវរហូតកំណត់ទីតាំងមុខសញ្ញាបង្ខាំងជនរងគ្រោះ និងចុះបង្ក្រាបចាប់ខ្លួនជនសង្ស័យបាន២នាក់បញ្ជូនមកអយ្យការអមសាលាដំបូងខេត្តចាត់ការតាមនីតិវិធី នៅថ្ងៃទី១៨ តុលា ២០១៩នេះ ។
ជនជាតិចិននៅតែមានធ្វើសកម្មភាពចាប់ជំរិតទាប្រាក់ពីជនជាតិចិនដូចគ្នា នៅក្រុងបាវិតតែទោះបីយ៉ាងណាក៏ត្រូវសមត្ថកិច្ចបង្ក្រាបបានយកមកផ្តន្ទាទោសតាមច្បាប់ដែរ ៕ កែសម្រួលដោយ ៖ សុឃាក់
ចែករំលែកព័តមាននេះ