ខេត្តសៀមរាប ៖ ពលរដ្ឋបានលើកឡើងថា ជារៀងរាល់ព្រឹកព្រលឹម មានរថយន្តកូរ៉េខ្នាតធំមួយគ្រឿង និងរថយន្តក្រុងដែលគេដឹងថា «ជារថយន្តដឹកត្រី» បានឈប់មកចតនៅតាមបណ្ដោយផ្លូវជាតិលេខ៦ ពីខាងកើតផ្សារលើប្រហែលជាង១០០ម៉ែត្រ និងនៅមុខផ្សារលើធំថ្មី…
ខេត្តសៀមរាប ៖ ពលរដ្ឋបានលើកឡើងថា ជារៀងរាល់ព្រឹកព្រលឹម មានរថយន្តកូរ៉េខ្នាតធំមួយគ្រឿង
និងរថយន្តក្រុងដែលគេដឹងថា «ជារថយន្តដឹកត្រី» បានឈប់មកចតនៅតាមបណ្ដោយផ្លូវជាតិលេខ៦ ពីខាងកើតផ្សារលើប្រហែលជាង១០០ម៉ែត្រ និងនៅមុខផ្សារលើធំថ្មី នៃក្រុងសៀមរាប ដើម្បីសាងត្រីទម្លាក់ឲ្យម៉ូយនានាក្នុងក្រុងយកទៅលក់បន្ត ។
ប្រភពបានបន្តថា រថយន្តដឹកត្រីនោះ ត្រូវបានគេដឹងថា ជារាល់ពេលដាក់ម្តងៗ គឺហូរទឹកឆ្អាបប្រឡាក់ពេញលើផ្លូវជារៀងរាល់ថ្ងៃ ហើយក៏គ្មានឃើញមន្ត្រីពាក់ព័ន្ធណាម្នាក់បានយកចិត្តទុកដាក់ និងបញ្ចៀសនូវបញ្ហានេះឡើយ ។
ប្រភពឱ្យដឹងថា កត្តាទាំងអស់នេះ ត្រូវបានគេសង្ស័យថា ប្រហែលខាងជំនាញមួយចំនួន ទទួលបានផលប្រយោជន៍ចូលហោប៉ៅហើយ ទើបធ្វើមិនដឹងមិនឃើញបែបនេះ ។ ប្រភពពីប្រជាពលរដ្ឋ អ្នករស់នៅក្បែរកន្លែងនោះ បានលើកឡើងថា រថយន្តដឹកត្រីដែលមានទឹកហូរឆ្អាប មកលើផ្លូវរាល់ព្រឹកនេះ មិនគួរណាមកចតសាងនៅទីប្រជុំជន ឬនៅផ្លូវដែលមានភ្ញៀវទេសចរជាតិ និងអន្តរជាតិនោះទេ ជាពិសេសផ្លូវជាតិនេះក៏មានរថយន្តគណ:ប្រតិភូឆ្លងកាត់រាល់ដងផងដែរ បើបណ្ដែតបណ្ដោយយូៗទៅកន្លែងចតនោះ កាន់តែមានសភាពស្អុយឆ្អាបខ្លាំងឡើងៗ។
ពាក់ព័ន្ធករណីនេះដែរ ភ្នាក់ងារកោះសន្តិភាពបានទាក់ទងទៅ លោក ទៀ សីហា អភិបាលខេត្រួចហើយ តាមប្រព័ន្ធតេឡេក្រាម ប៉ុន្តែមិនទាន់ឃើញតបមកវិញនោះទេ ។ ចំណែកលោក នួន ពុធ្ធារ៉ា អភិបាលក្រុងសៀមរាប បានបញ្ជាក់ថា ជុំវិញការរថយន្តចតសាងត្រីនេះ ចាំលោកឲ្យអ្នកពាក់ព័ន្ធ ចុះទៅពិនិត្យមើល។
ទោះបីយ៉ាងណា លោក នួន ពុទ្ធារ៉ា មិនបានអត្ថាធិប្បាយលម្អិតបាននោះទេ ។ សូមបញ្ជាក់ថា រថយន្តដឹកត្រី ខ្នាតធំ ដែលចតសឹងពាក់កណ្ដាលផ្លូវជាតិលេខ៦ នៅពីខាងកើតផ្សារលើធំថ្មី និងថយន្តក្រុង ដឹកត្រីចាប និង លេសមកចតនៅមុខផ្សារលើធំថ្មី ដាក់ពាក់កណ្ដាលផ្លូវជារៀងរាល់ព្រឹកនេះ គេមិនទាន់ដឹងថា ដឹកត្រីមកពីប្រទេសណា ឬខេត្តណានោះឡើយ ។
ប្រភពបានលើកឡើងបន្ថែមថា ការដែលមានរថយន្តដឹកត្រីចតសាង លើទីតាំងខាងលើនោះ អាចបណ្ដាលឲ្យប៉ះពាល់យ៉ាងខ្លាំងដល់ បរិស្ថាន ដូច្នេះ ពួកគាត់សង្ឃឹមថា អាជ្ញាធរជំនាញនិងមិនបណ្ដែតបណ្ដោយឲ្យមានតទៅទៀតទេ។
ជុំវិញការលើកឡើងខាងលើនោះដែរ ភ្នាក់ងារកោះសន្តិភាព មិនអាចសុំការពន្យល់ពីលោកប្រធានមន្ទីរបរិស្ថានខេត្ត និងលោក ប្រធានមន្ទីរកសិកម្មរុក្ខាប្រមាញ់និងនេសាទ បានទេរសៀលថ្ងៃទី១៧ តុលា ដោយសារទូរស័ព្ទរបស់លោកនៅក្រៅតំបន់សេវា ។
ចែករំលែកព័តមាននេះ