ខេត្តព្រះសីហនុ ៖ តាមសេចក្តីរាយការណ៍បឋមបានឱ្យដឹងថា មានករណីនារីម្នាក់បានស្លាប់ភ្លាមៗនៅនឹងកន្លែងកើតហេតុ ក្នុងគ្រោះថ្នាក់ចរាចរណ៍រវាងរថយន្តបុកជាមួយម៉ូតូ បណ្ដាលឲ្យកិនបែកក្បាលនារីរងគ្រោះស្លាប់ បន្ទាប់ពីកើតហេតុរថយន្តបង្កបានបើកគេចបាត់ ។
ហេតុការណ៍គួរឱ្យរន្ធត់ខាងលើនេះបានកើតឡើងកាលពីវេលាម៉ោង៧ព្រឹកថ្ងៃទី១៨ តុលា ឆ្នាំ២០១៩ ត្រង់ចំណុចជិតរោងចក្រញូវស្តារ តាមបណ្ដោយផ្លូវជាតិលេខ៤ ភូមិ១ សង្កាត់លេខ១ ក្រុងព្រះសីហនុ ។
តាមរយៈអត្តសញ្ញាណប័ណ្ណបានឱ្យដឹងថា នារីរងគ្រោះដែលស្លាប់ឈ្មោះសុខ លីណា អាយុ២៧ឆ្នាំ មានទីលំនៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ជាអ្នកបើកបរម៉ូតូគ្រឿង មិនស្គាល់ម៉ាក ។ ចំណែករថយន្តបង្កមួយគ្រឿងខាងលើមិនស្គាល់ម៉ាក អ្នកបើកបរមិនស្គាល់អត្តសញ្ញាណ បានបើកគេចបាត់ ។
ក្រោយពេលកើតហេតុ គេឃើញសមត្ថកិច្ចចុះមកពិនិត្យកន្លែងកើតហេតុ និងកំពុងស្រាវជ្រាវតាមរករថយន្តបង្កហេតុដើម្បីយកមកចាត់ការតាមច្បាប់ ។ ចំណែកសពនារីរងគ្រោះត្រូវបានសាច់ញាតិមកទទួលយកទៅធ្វើបុណ្យតាមប្រពៃណីហើយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ