រាជធានីភ្នំពេញ ៖ សំណង់ខ្ទមមិនរៀបរយចំនួន១០ខ្នង ដែលអាជ្ញាធរអះអាងថា ជាកន្លែងប្រមូលផ្តុំប្រើប្រាស់គ្រឿងញៀន បានត្រូវអាជ្ញាធរខណ្ឌជ្រោយចង្វា ប្រើកម្លាំងរុះរើវាយកម្ទេចចោលក្នុងមួយប៉ប្រិចភ្នែក បន្ទាប់ពីជូនដំណឹងឲ្យរុះរើចេញជាច្រើនលើក មិនព្រមរុះរើ ។…
រាជធានីភ្នំពេញ ៖ សំណង់ខ្ទមមិនរៀបរយចំនួន១០ខ្នង ដែលអាជ្ញាធរអះអាងថា ជាកន្លែងប្រមូលផ្តុំប្រើប្រាស់គ្រឿងញៀន បានត្រូវអាជ្ញាធរខណ្ឌជ្រោយចង្វា ប្រើកម្លាំងរុះរើវាយកម្ទេចចោលក្នុងមួយប៉ប្រិចភ្នែក បន្ទាប់ពីជូនដំណឹងឲ្យរុះរើចេញជាច្រើនលើក មិនព្រមរុះរើ ។
ការប្រើវិធានការរដ្ឋបាលនេះ ធ្វើឡើងកាលពីព្រឹកថ្ងៃទី១៧ ខែតុលា ឆ្នាំ២០១៩ នៅដីឡូត៍មួយកន្លែងជាប់របងវត្តប្រជុំសាគរ ហៅវត្តថ្មី ក្នុងភូមិទី១ សង្កាត់ជ្រោយចង្វា ខណ្ឌជ្រោយចង្វា ដឹកនាំដោយលោក កៅ សារ៉ាវុធ អភិបាលរងខណ្ឌជ្រោយចង្វា ។ លោក កៅ សារ៉ាវុធ បានឲ្យដឹងថា សំណង់ដែលអាជ្ញាធររុះរើនេះជាសំណង់មិនរៀបរយ ដែលប្រជាពលរដ្ឋមករស់នៅក្នុងដីឡូត៍របស់ឈ្មោះ ប៊ុន ជេស្ឋ ហើយធ្លាប់ជាទីតាំងប្រមូលផ្តុំប្រើប្រាស់ និងចែកចាយគ្រឿងញៀន ដែលត្រូវបានសមត្ថកិច្ចបង្ក្រាបជាបន្តបន្ទាប់ ។
លោកអភិបាលរងខណ្ឌបានឲ្យដឹងទៀតថា ដោយហេតុផលជាកន្លែងប្រមូលផ្តុំជួញដូរ និងប្រើប្រាស់គ្រឿងញៀន និងមានការស្នើសុំពីម្ចាស់ដីឡូត៍ អាជ្ញាធរក៏បានជួនដំណឹងដល់ប្រជាពលរដ្ឋ ឲ្យរុះរើសំណង់មិនរៀបរយនោះដោយខ្លួនឯង ហើយប្រជាពលរដ្ឋចំនួន៣គ្រួសារក៏បានរុះរើ នៅសល់ប្រមាណ១០គ្រួសារមិនស្តាប់តាមការណែនាំ ទើបរដ្ឋបាលខណ្ឌសម្រេចអនុវត្តវិធានការរដ្ឋបាលតែម្តង ។ ទន្ទឹមនោះ ប្រជាពលរដ្ឋដែលរស់នៅជុំវិញក៏មានការអបអរសាទរផងដែរ ។
លោក ប៊ុន ជេស្ឋ បានឲ្យអ្នកយកព័ត៌មានដឹងថា ដីនោះមិនមែនជារបស់គាត់ទេ ជាដីរបស់មិត្តភក្តិលោកឈ្មោះ លី អេរ៉ូ ដែលឲ្យឈរឈ្មោះទិញឲ្យ ។ លុះក្រោយមក កម្មកររបស់គាត់សុំស្នាក់នៅក៏បានបង្កើតជាសំណង់មិនរៀបរយតែម្តង ៕
ចែករំលែកព័តមាននេះ