សង្គ្រាម​ពាណិជ្ជកម្ម​រវាង​អាមេរិក​និង​ចិន​ កំពុង​បង្ខំ​ឱ្យ​អាជីវកម្ម​​​មួយ​ចំនួន​ផ្លាស់​​ប្តូរ​ទីតាំង


ហុងកុង ៖ បើ​ទោះបីជា​មានការ​រីក​ចម្រើន​តិចតួច​នៅ​ទីក្រុង​វ៉ា​ស៊ី​ន​តោន​កាលពី​ស​ប្តា​ហ៍​មុន​លើ​កិច្ចព្រមព្រៀង​ពាណិជ្ជកម្ម​បណ្តោះអាសន្ន​រវាង​មហាអំណាច​អា​មេ​រិ​ក​និង​ចិន​ក៏​ពិតមែន តែ​ពុំ​មាន​សញ្ញា​ណាមួយ​ថា សង្គ្រាម​ពាណិជ្ជកម្ម​ក្តៅ​គគុក​ចិន​-​អា​មេ​រិ​ក​នឹង​អាច ឈាន​កិច្ច​ឈប់​បាញ់​ឆាប់​នោះ បាន​បង្ខំ​ឱ្យ​អាជីវកម្ម​ហុងកុង​មួយ​ចំនួន​ផ្លាស់​ប្តូរ​ទីតាំង​ប្រតិបត្តិការ​ផ្នែក​ផលិតកម្ម​របស់​ពួក​គេ​ចេញពី​ទីក្រុង​ចិនដីគោក​ត្រឡប់​ទៅ​ទីក្រុង​ហុងកុង​វិញ​ដើម្បី​ចៀសវាង​ពន្ធគយ​ធ្ងន់ធ្ងរ​របស់​អា​មេ​រិ​ក ។

ក្នុង​ន័យ​នេះ​ក្រុមហ៊ុន​ហុងកុង​មួយ​ចំនួន​ធំ​កំពុង​ចាប់ផ្តើម​អភិវឌ្ឍ​យីហោ​ផ្ទាល់ខ្លួន​របស់​ពួក​គេ ដោយ​ប្រើ​ស្លាក «​ផលិត​នៅ​ហុងកុង​» មិនមែន «​ផលិត​នៅ​ចិន​» ទៀត​ទេ ដើម្បី​សម្រប​ខ្លួន​ទៅ​នឹង​ការ​ផ្លាស់​ប្តូរ​ខ្សែ​សង្វា​ក់​ផ្គត់ផ្គង់​ពិភពលោក ដោយសារ​តែ​ទំនិញ​របស់​ចិន​ជា​ច្រើន​មុខ​កំពុង​រង​គ្រោះ​នឹង​ការ​យកពន្ធ​ឡើង​ធ្ងន់​ក ពី​រដ្ឋបាល​របស់​លោក​ប្រធានាធិបតី​អា​មេ​រិ​ក ដូ​ណា​ល់​ត្រាំ ។ នេះ​បើ​យោង​តាម​ការ​ចុះ​ផ្សាយ​របស់​ភ្នាក់ងារ South China Morning Post ចុះ​ថ្ងៃ​ទី​១៧ ខែតុលា​ម្សិលមិញ ។

ប្រធានាធិបតី​អា​មេ​រិ​ក​ដូ​ណា​ល់​ត្រាំ​បាន​ប្រកាស​ដំឡើង​ពន្ធគយ​ចំនួន​៤​លើក​ចាប់តាំងពី​ខែកក្កដា​ឆ្នាំ​មុន​ដែល​ជំរុញ​ឱ្យ​ក្រុមហ៊ុន​ចិន​ជា​ច្រើន​ផ្លាស់​ប្តូរ​ទីតាំង​ផលិតកម្ម​របស់​ខ្លួន​ទៅ​កាន់​អាស៊ី​អាគ្នេយ៍​នា​ពេល​កន្លង​មក ។ សម្រាប់​ម្ចាស់​ក្រុមហ៊ុន​ដើម​កំណើត​ហុងកុង​ពេល​នេះ​ក៏​កំពុង​ផ្លាស់​ប្តូរ​ទីតាំង​ផលិក​ម្ម​របស់​ខ្លូ​ន​ចេញពី​ចិនដីគោក​សំដៅ​ទៅ​ហុងកុង​វិញ ។

ជាក់ស្តែង​លោក Arthur Lee Kam-hung វិស្វករ​និង​ជា​ពាណិជ្ជករ​មាន​ដើម​កំណើត​នៅ​ហុងកុង​ក៏​មិន​អាច​គេច​ចេញពី​ជម្លោះ​របស់​ប្រទេស​មហាអំណាច​ទាំង​ពីរ​ដែល​កំពុង​ប្រជែង​គ្នា ដោយ​ខ្លាច​ថា​សង្គ្រាម​ពាណិជ្ជកម្ម​ដែល​អូស​បន្លាយ​រវាង​សហរដ្ឋអាមេរិក​និង​ចិន​អាច​ធ្វើ​ឱ្យ​អន្តរាយ​ដល់​អនាគត​ឧស្សាហកម្ម​អេ​ឡិច​ត្រូ​និ​ច​របស់​ទីក្រុង​ហុងកុង ។

លោក Lee បាន​សំរេចចិត្ត​ត្រលប់​ទៅ​ហុងកុង​វិញ​ដោយ​ហេតុផល​ជាក់ស្តែង​មួយ​ចំនួន រួម​ទាំង​កម្លាំង​ពលកម្ម​ជំនាញ​និង​ភស្ដុ​ភារ​លំដាប់​ពិភពលោក​របស់​ទីក្រុង​ហុងកុង​។ ហើយ​តាម​រយៈ​ការ​បង្កើត​សមត្ថភាព​ផលិត​នៅ​ទីក្រុង​ហុងកុង ម្ចាស់​អាជីវកម្ម​ជឿជាក់​ថា​ប្រាកដជា​អាច​ជួយ​ពួក​គេ​ចៀសវាង​បាន ឬ​ជៀស​ផុត​ពី​ពន្ធគយ​របស់​សហរដ្ឋអាមេរិក​ដែល​នឹង​អនុវត្ត​ចំពោះ​ផលិតកម្ម​របស់​ពួក​គេ​ដែល​ផលិត​លើ​ឈ្មោះ​ថា ផលិតផល​ផលិត​នៅ​ចិនដីគោក ។

ក្រុមហ៊ុន​របស់​លោក Lee គ្រោង​នឹង​ផ្លាស់​ប្តូរ​ការ​ផលិត​ផលិតផល​ដែល​មាន​កម្រិត​ខ្ពស់​ដែល​ត្រូវ​បាន​ប្រើ​នៅ​ក្នុង​ស្ថានីយ៍​មូលដ្ឋាន 5G និង​យានយន្ត​ស្វយ័ត​ទៅ Tsuen Wan ក្នុងស្រុក New Territories នៃ​ទីក្រុង​ពាក់កណ្តាល​ស្វយ័ត​។

លោក Lee ដែល​ជានា​យក​ប្រតិបត្តិ​របស់ Hong Kong X’tals បាន​និយាយ​ថា «​ក្រុមហ៊ុន​របស់​យើង​ធ្វើ​អាជីវកម្ម​ផ្នែក​បច្ចេកវិទ្យា​និង​មិន​ធ្វើ​នយោបាយ​ទេ​។ យើង​មិន​ចង់​ជ្រើសរើស​ទីផ្សារ​មួយ​នៅ​លើ​ទីផ្សារ​មួយ​ផ្សេង​ទៀត​ទេ​។ លោក​បាន​បន្ត​ថា «​ដូច្នេះ​ការ​បង្កើត​រោងចក្រ​មួយ​នៅ​ហុងកុង យើង​សង្ឃឹមថានឹង​បង្ហាញ​យ៉ាង​ច្បាស់​ថា​យើង​មាន​អព្យាក្រឹតភាព​នយោបាយ​» ។

អាជីវកម្ម​បែប​ប្រពៃណី​របស់​ក្រុមហ៊ុន​ដែល​ផលិត​គ្រី​ស្តា​ល់​រ៉ែ​ថ្ម​ខៀវ​និង​ត្រូវ​បាន​ប្រើ​ក្នុង​គ្រឿង​អេ​ឡិច​ត្រូ​និ​ច​និង​គ្រឿង​ម៉ាស៊ីន​ពាក់ព័ន្ធ នឹង​បន្ត​នៅ​រោងចក្រ​មួយ​នៅ​ហ៊ូ​ចូ​វ (Huizhou) ភាគ​អាគ្នេយ៍​នៃ​ប្រទេស​ចិន ។ ប៉ុន្តែ​តាម​រយៈ​ការ​បង្កើត​មូលដ្ឋាន​ផលិតកម្ម​ពីរ​នៅ​ហុងកុង​ផង​និង​ចិន​ផង​នោះ លោក Lee បាន​និយាយ​ថា លោក​កំពុង​បញ្ចុះ​ថ្លៃដើម​នៃ​កម្លាំង​ពលកម្ម​ដោយ​ស្វ័យ​ប្រវត្តិកម្ម​និង​បង្កើន​បរិមាណ​ផលិតកម្ម ខណៈ​ត្រូវ​រក្សា​ឲ្យ​បាន​នូវ​គុណភាព​ផលិតផល​។

លោក Lee ក៏​បាន​ចង្អុលបង្ហាញ​ពី​ទំនុកចិត្ត​ដែល​លោក​មាន​ចំពោះ​ភាព​ស្មោះត្រង់​នៃ​ទេព​កោសល្យ​ស្រាវជ្រាវ​និង​រចនា​នៅ​ហុងកុង បន្ទាប់​ពី​ក្រុមហ៊ុន​របស់​លោក​បាន​ខាតបង់​ប្រាក់​ដល់​ទៅ ១៧ លាន​ដុល្លារ​ហុងកុង (២​លាន​ដុល្លារ​អា​មេរិ​ក​) ពី​ចោរកម្ម​បញ្ញា​នៅ​ឯ​រោងចក្រ​ផលិត​នៅ​ចិន​របស់​លោក ។

ការ​នាំ​ចេញ​របស់​ហុងកុង​បាន​កើនឡើង​យ៉ាង​ឆាប់រហ័ស​ក្នុង​រយៈពេល​ពីរ​ទស​វត្ស​ចុង​ក្រោយ​នេះ​ដោយសារ​កំណើនសេដ្ឋកិច្ច​យ៉ាង​ឆាប់រហ័ស​របស់​ប្រទេស​ចិន​និង​ការ​រឹត​បន្តឹង​ទំនាក់ទំនង​របស់​ទីក្រុង​ហុងកុង​ជាមួយ​ចិនដីគោក​។ ការ​នាំ​ចេញ​ភាគច្រើន​នៃ​ទីក្រុង​ហុងកុង​គឺ​ការ​នាំ​ចេញ​ឡើង​វិញ – ទំនិញ​ដែល​ក្រុមហ៊ុន​ចិនដីគោក​លក់​ទៅ​ឱ្យ​សាខា​ហុងកុង​ក្នុង​តម្លៃ​ថ្លៃ ដែល​បន្ទាប់​មក​ត្រូវ​បាន​ដឹក​ជញ្ជូន​ទៅ​បរទេស​ក្នុង​តម្លៃ​ខ្ពស់​។ យុទ្ធសាស្ត្រ​នេះ​អនុញ្ញាត​ឱ្យ​កត់ត្រា​ប្រាក់​ចំណេញ​នៅ​ក្នុង​ទីក្រុង​ក្នុង​អត្រា ១៦.៥​ភាគរយ​នៃ​អត្រាពន្ធ​សាជីវកម្ម ។

ក្នុង​នោះ​ផង​ដែរ​១៩​ភាគរយ​នៃ​ការ​នាំ​ចេញ​របស់​ហុងកុង​ទៅ​សហរដ្ឋអាមេរិក​មាន​ផលិតផល​ទូរគមនាគមន៍ ខណៈ​គ្រឿងអលង្ការ​មាសប្រាក់​រួមចំណែក​១៨​ភាគរយ​។ គ្រឿង​អេ​ឡិច​ត្រូ​និក​និង​គ្រឿងអគ្គិសនី​មាន​១៧​ភាគរយ​និង​សម្លៀក​បំពាក់​១២​ភាគរយ​។ លោក Alicia Garcia-Herrero ប្រធាន​សេដ្ឋវិទូ​នៅ​អាស៊ី​ប៉ា​ស៊ី​ហ្វិ​ក​នៅ Natixis បាន​និយាយ​ថា «​ហុងកុង​ហាក់​ដូចជា​និទាឃ​រដូវ​សម្រាប់​ការ​នាំ​ចេញ​របស់​ចិនដីគោក​ទៅ​កាន់​សហរដ្ឋអាមេរិក​។ តួនាទី​របស់​ស្ថាប័ន​នេះ (​ហុងកុង​) បាន​បម្រើ​ដល់​អ្នក​ពាក់ព័ន្ធ​ផ្សេង​ៗ​គ្នា​រហូត​មក​ទល់​ពេល​នេះ ប៉ុន្តែ​បញ្ហា​នេះ​អាច​ផ្លាស់​ប្តូរ​ដោយសារ​តែ​ការ​កើនឡើង​នូវ​ហានិភ័យ​នៃ​សង្គ្រាមត្រជាក់​នៅ​ពេល​នេះ​រវាង​សហរដ្ឋអាមេរិក​និង​ចិន​» ។

ទិន្នន័យ​ចុង​ក្រោយ​ពី​នាយកដ្ឋាន​ជំរឿន​និង​ស្ថិតិ​ហុងកុង​បាន​បង្ហាញ​ថា​ចំនួន​ប្រជាជន​ហុងកុង​ដែល​បាន​ធ្វើការ​នៅ​ចិនដីគោក​ភាគច្រើន​ដោយសារ​ហេតុផល​ការងារ​បាន​កើនឡើង​ទ្វេ​ដង​ពី​១២២.៣០០ ក្នុង​ឆ្នាំ​១៩៩៥ ដល់​កម្រិត​ខ្ពស់​បំផុត​២៤៤,០០០ ក្នុង​ឆ្នាំ​២០០៤ មុន​ពេល​ថយ​ចុះ​មក​១៧៥.១០០ ក្នុង​ឆ្នាំ​២០១០ ។

យោង​តាម​លោក Louis Chan ជំនួយការ​សេដ្ឋវិទូ​នៅ​ក្រុមប្រឹក្សា​អភិវឌ្ឍ​ពាណិជ្ជកម្ម​ហុងកុង​បានឱ្យ​ដឹង​ថា​ពន្ធគយ​របស់​សហរដ្ឋអាមេរិក​ទៅ​លើ​ទំនិញ​ចិន​អាច​ប៉ះពាល់​ដល់​៩៨ ភាគរយ​នៃ​ការ​នាំ​ចេញ​ឡើង​វិញ​ពី​ប្រទេស​ចិន​ទៅ​ហុងកុង​នៅ​ឆ្នាំ​២០១៨ ។

លោក Chan បាន​មាន​ប្រសាសន៍​ថា «​ដូច្នេះ​នេះ​មាន​ន័យ​ថា​ក្រុមហ៊ុន​ហុងកុង​ជា​ច្រើន​កំពុង​ចាប់ផ្តើម​អភិវឌ្ឍ​យីហោ​ផ្ទាល់ខ្លួន​ហើយ​ប្រើប្រាស់​យីហោ ផលិត​នៅ​ក្នុង​ហុងកុង ក្រោម​ខ្សែ​សង្វា​ក់​ផ្គត់ផ្គង់​ពិភពលោក​ដែល​កំពុង​ផ្លាស់​ប្តូរ​»​។ តាម​ផែនការ​បម្រុង​ពួក​គេ​អាច​ពិចារណា​លក់​ការ​បញ្ជា​ទិញ​ដែល​មាន​ទំហំ​តូច​ជាង​មុន​ដើម្បី​មើល​ថា​តើ​ផលិតផល​ទាំងនេះ​ទទួល​បាន​លទ្ធផល​ល្អ​ឬ​អត់ ៕ (​កែសម្រួល​ដោយ  ៖ បុប្ផា​)

Facebook Google Twitter Email

ព័ត៌មាន​អន្តរជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ