ខេត្តកំពង់ឆ្នាំង ៖ ក្រោយពីរាជរដ្ឋាភិបាលបានកសាងទ្វារ និងទំនប់ស្ទាក់ទឹកនៅចំណុចភ្នំច្រកបាក់ដាវមានអាងទឹកយ៉ាងស្រស់ស្អាត និងជាទីមនោរម្យរួចមកប្រជាពលរដ្ឋរស់នៅក្នុងសហគមន៍ឃុំពោធិ៍ និងឃុំត្រងិល ស្រុកកំពង់លែងបានស្នើអោយអាជ្ញាធរស្រុកកំពង់លែង ជួយបង្កើតតំបន់នោះធ្វើជាកន្លែងទេស ចរណ៍ធម្មជាតិ ដែលអាចងូតទឹកលេងកំសាន្ត សម្រាប់ភ្ញៀវទេសចរណ៍ក្នុងស្រុក និងក្រៅស្រុកក៍ដូចជាជួយបង្កើតប្រាក់ចំណូលសម្រាប់ប្រជាពលរដ្ឋក្នុងតំបន់ផងដែរ។
ប្រជាពលរដ្ឋក្នុងសហគមន៍ឃុំពោធិ៍ និងឃុំច្រណូក បានលើកឡើងថា នៅទីនោះបន្ទាប់ពីរាជរដ្ឋាភិបាលបានកសាងទំនប់ស្ទាក់ទឹកដែលធ្លាក់ពីភ្នំកង្រី និងភ្នំនៅជិតគ្នារួចមកបានក្លាយជាអាងទឹកមានខួបប្រាំង និងវស្សា ដោយម្ខាងជាប់ និងជើងភ្នំមានព្រៃប្រឹក្សា និងម្ខាងទៀតជាទំនប់ ។ ចំណែកនៅផ្នែកក្រោមទំនប់ គឺជាវាលស្រែរបស់ប្រជាពលរដ្ឋ ។ នៅក្នុងអាងទឹកយ៉ាងធំបែបនេះអាជ្ញាធរគួរតែបង្កើតជាតំបន់ទេសចរណ៍សម្រាប់ការកម្សាន្តរបស់ភ្ញៀវផង និងសម្រាប់បង្កើនប្រាក់ចំណូលរបស់ប្រជាពលរដ្ឋដូចជា ការបង្កើតឲ្យមានខ្យូសសម្រាប់ អង្គុយលេងកម្សាន្តតាមទំនប់ ដោយមានការលក់ដូរចំណីអាហារ ភេសជ្ជៈ មានកន្លែងសម្រាប់ផ្ញើម៉ូតូ ផ្ញើរថយន្ត និងពិសេសទៀតក្នុងអាងទឹកក៏គួរបង្កើតឲ្យមានទូក មានទាទឹក សម្រាប់ភ្ញៀវជិះលេងកម្សាន្តផងដែរ ។
កន្លងទៅនៅឆ្នាំ២០១៨ ពួកគាត់ក្នុងសហគមន៍បានទំទាក់ទំនងមកអាជ្ញាធរស្រុក ដើម្បីសុំបង្កើតតំបន់ទេសចរណ៍នៅទំនប់ច្រកបាក់ដាវនេះដែរ ដោយសុំសាងសង់រោង សង់តូប និងសង់ខ្យូសមួយចំនួនតាមខ្នងទំនប់ ដើម្បីទទួលភ្ញៀវទេសចរក្នុងស្រុកក៏ដូចជា ភ្ញៀវទេសចរណ៍ក្រៅស្រុកដែលមានបំណងចង់កម្សាន្តតំបន់ទេសចរណ៍ព្រៃភ្នំធម្មជាតិនៅទំនប់ច្រកបាក់ដាវមួយនេះ ។ ប៉ុន្តែសំណើរខាងលើនេះមិនទាន់ឃើញអាជ្ញាធរស្រុកឆ្លើយតបឡើយគិតមកដល់ថ្ងៃនេះ ។
ទាក់ទងនឹងសំណើរខាងលើផងដែរនេះលោក ចេង ចាន់ដូណា អភិបាលរងស្រុកកំពង់លែងបានបញ្ជាក់ឲ្យដឹងតាមទូរស័ព្ទថា អាជ្ញាធរស្រុកបានជូនយោបល់ទៅសហគមនន៍រួចហើយថា គឺពួកគាត់ត្រូវដាក់ពាក្យស្នើសុំទៅមន្ទីរទេសចរណ៍ខេត្ត ដើម្បីឲ្យក្រុមការងារមន្ទីរទេសចរណ៍ខេត្ត និងក្រុមការងារពាក់ព័ន្ធរបស់ស្រុកកំពង់លែងចុះទៅសិក្សាឲ្យបានច្បាស់លាស់ជាមុនសិន ព្រោះក្នុងគម្រោងបង្កើតតំបន់ទេសចរណ៍នៅចំណុចខាងលើនេះល្អទៅបានលុះត្រាណាតាមការណែនាំរបស់ក្រសួងក្នុងការពង្រឹងតំបន់ទេសចរណ៍នីមួយៗឲ្យមាននិរន្តរភាពយូរអង្វែងសម្រាប់លើកស្ទួយជីវភាពប្រជាពលរដ្ឋនៅក្នុងមូលដ្ឋាន ចំណែកអាជ្ញាធរស្រុកមិនបានហាមឃាត់ឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ