អតីតសកម្មជន CNRP ខេត្តសៀមរាបចូលសារភាព
- សៀមរាប
ខេត្តសៀមរាប ៖ លោក ឃុន វណ្ណា អតីតសកម្មជនគណបក្សសង្គ្រោះជាតិ នៅស្រុកដំដែក ខេត្តសៀមរាប បានចូលសារភាពនៅចំពោះមុខសមត្ថកិច្ច កាលពីថ្ងៃទី១៦…
ខេត្តសៀមរាប ៖ លោក ឃុន វណ្ណា អតីតសកម្មជនគណបក្សសង្គ្រោះជាតិ នៅស្រុកដំដែក ខេត្តសៀមរាប បានចូលសារភាពនៅចំពោះមុខសមត្ថកិច្ច កាលពីថ្ងៃទី១៦ ខែតុលា ឆ្នាំ២០១៩ ពាក់ព័ន្ធនឹងការចែកចាយការអំពាវនាវរបស់លោកសម រង្ស៊ី នៅលើបណ្តាញសង្គម Facebookដែលជាផែនការរដ្ឋប្រហារផ្តួលរំលំរាជរដ្ឋាភិបាលកម្ពុជា .
បន្ទាប់ពីបានភ្ញាក់រឭកដកខ្លួនហើយនោះ សកម្មជនអតីតគណបក្សប្រឆាំងរូបនេះបានប្រកាសលុបចោល ការចែកចាយបន្តនូវសកម្ម ភាព ឬការអំពាវនាវរបស់ទណ្ឌិតសម រង្ស៊ី ហើយអំពាវនាវឱ្យអតីតសកម្មជនទាំងអស់កុំចែកចាយ ឬចូលរួមជាមួយផែនការរដ្ឋប្រហារខុសច្បាប់ របស់លោកសម រង្សុី ។ លោកឃុន
វណ្ណា បញ្ជាក់ឱ្យដឹងថា នៅគ្រាដំបូងលោកបានចែកចាយព័ត៌មានមាតុភូមិនិវត្តន៍របស់លោកសម រង្ស៊ី ដោយសារតែពេលនោះមិនបានដឹងថា វាជារឿងខុសច្បាប់ ប៉ុន្តែបន្ទាប់ពីលោកសម រង្ស៊ី បានប្រកាសចិញ្ចឹមកងទ័ព និងអំពាវនាវដល់កងទ័ពចូលរួមប្រឆាំងរដ្ឋាភិបាល ទើបលោកយល់ថា នេះជាទង្វើខុស ច្បាប់ ហើយសម្រេចចិត្តចូលសារភាពចំពោះមុខសមត្ថកិច្ច ដើម្បីបានរួចផុតពីទោស ។
លោកឃុន វណ្ណា និយាយថា៖ «ខ្ញុំសូមអំពាវនាវដល់ប្រជាពលរដ្ឋ និងមិត្តភក្តិ ក្នុងបណ្តាញសង្គមFace book កុំយល់ច្រឡំ រួមគំនិតក្បត់ជាតិឱ្យសោះ ខ្ញុំសូមសំណូមពរដល់មិត្តភក្តិនៅលើបណ្តាញសង្គម Facebook សូមលុបសារចេញពី Account របស់ខ្លួនឱ្យអស់ ហើយខ្ញុំសូមថ្កោលទោសសកម្មភាពទណ្ឌិតសម រង្ស៊ី ដូចជាការកៀរគរពលរដ្ឋ កៀរគរទ័ពជាសកម្មភាពរួមគំនិតក្បត់ជាតិ ខ្ញុំសូមសន្យាថា ខ្ញុំលែងគាំទ្រ និងចែកចាយព័ត៌មានតាមបណ្តាញ Facebook ទៀតហើយ ព្រោះវាជាសកម្មភាពរួមគំនិតក្បត់ជាតិ» ។
ទណ្ឌិតសម រង្ស៊ី បានប្រកាសវិលចូលប្រទេសកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ ក្នុងគោលបំណងធ្វើរដ្ឋប្រហារខុសច្បាប់ផ្តួលរំលំរាជរដ្ឋាភិបាលកម្ពុជា ។ ក្រោយការប្រកាសវិលចូលប្រទេស លោកបានអំពាវនាវឱ្យកងទ័ពផ្តាច់ខ្លួនពីរាជរដ្ឋាភិបាលទៅចុះចូលជាមួយខ្លួន ដោយប្រកាសថានឹងផ្តល់ថវិកាលើកទឹកចិត្តដល់ពួកគេ មិនតែប៉ុណ្ណោះថែមទាំងអំពាវនាវឲ្យប្រឆាំងរដ្ឋធម្មនុញ្ញ ដោយបង្គាប់ឱ្យព្រះមហាក្សត្រដាក់រាជ្យ ដើម្បីរំលាយរបបរាជានិយមថែមទៀតផង ។
សាររបស់លោកសម រង្ស៊ី ត្រូវបានរាជរដ្ឋាភិបាលកម្ពុជា ស្ថាប័នតុលាការ កងកម្លាំងសមត្ថកិច្ច និងកងទ័ពគ្រប់លំដាប់ថ្នាក់ ចាត់ទុកថាជាអំពើល្មើសច្បាប់ដ៏ធ្ងន់បំផុត ដែលបង្កគ្រោះថ្នាក់ ភាពវឹកវរដល់ប្រទេសជាតិ និងប្រជាពលរដ្ឋ ហើយប្រកាសចាត់វិធានការតាមច្បាប់ និងតួនាទី ដើម្បីការពារសន្តិភាព ស្ថិរភាព និងការអភិវឌ្ឍសង្គម ។
ជាមួយគ្នានេះស្ថាប័នមានសមត្ថកិច្ច បានព្រមានថា អ្នកចូលរួម និងគាំទ្រ ដល់ផែនការរដ្ឋប្រហាររបស់លោក សម រង្ស៊ី នឹងត្រូវផ្តន្ទាទោសទៅតាមច្បាប់ពីបទ «រួមគំនិតក្បត់» ដែលប្រឈមនឹងការដាក់ពន្ធនាគារពី១៥ រហូតដល់៣០ឆ្នាំ ។ ទោះជាយ៉ាងនេះក្តី សម្រាប់អ្នកដែលចូលសារភាពទទួលស្គាល់កំហុសនឹងអនុញ្ញាតឱ្យរួចផុតទោស ៕
ចែករំលែកព័តមាននេះ