រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ជនសង្ស័យម្នាក់ក្នុងចំណោមបក្សពួកប្រុសស្រី៣នាក់ ត្រូវបានសមត្ថកិច្ចចាប់ឃាត់ខ្លួនបន្ទាប់ពីធ្វើសកម្មភាពលួចផ្លោះរបងចូលផ្ទះប្រជាពលរដ្ឋបំរុងលួចទ្រព្យសម្បត្តិ តែមិនបានសម្រេចបង្កឲ្យមានការភ្ញាក់ផ្អើល កាលពីវេលាម៉ោង៩និង១៥នាទីយប់ ថ្ងៃទី១៧ ខែតុលានេះ ត្រង់ចំណុចផ្ទះវីឡាស្តុកទំនិញមួយកន្លែងទល់មុខ និងធនាគារជាតិ ស្ថិតតាមបណ្ដោយផ្លូវហាណូយ ក្នុងសង្កាត់គោកឃ្លាង ខណ្ឌសែនសុខ ។
តាមសម្តីស្ត្រីម្នាក់ឈ្មោះ ធីតា អាយុ២៤ឆ្នាំ បានរៀបរាប់ប្រាប់ឲ្យដឹងថា ផ្ទះកើតហេតុខាងលើ គឺជាកន្លែងសម្រាប់ទុកសម្ភារៈរបស់ក្រុមហ៊ុនដែលមានគាត់ និងប្តី រួមជាមួយប្តីប្រពន្ធមួយគូទៀតជាបុគ្គលិក និងជាអ្នកស្នាក់នៅមើលការខុសត្រូវនៅពេលយប់ ។ កាលពីយប់ថ្ងៃទី១៥ មុនពេលកើតហេតុហេតុ គឺមានចោរបានផ្លោះរបងចូលមកក្នុងផ្ទះកើតហេតុខាងលើ បានធ្វើសកម្មភាពលួចម៉ូតូរបស់គាត់មួយគ្រឿងម៉ាក ហុងដាវ៉េវ ពណ៌ខ្មៅ គេចខ្លួនបាត់ ។
ខណៈពេលដែលគាត់ទុកម៉ូតូខាងលើនៅខាងមុខផ្ទះ ដោយមិនបានដកសោចេញពីម៉ូតូ ហើយនាំគ្នាចូលទៅសំរាកខាងក្នុង បន្ទាប់មកគាត់ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលគោកឃ្លាងរួចហើយ ។
ប្រភពដដែលបន្តថា នៅមុនពេលកើតហេតុផ្ទះខាងលើ គឺបានចាក់សោទុកចោលដោយពួកគាត់បាននាំគ្នាចេញទៅលេងបាល់ជាមួយ និងមិត្តភក្តិដែលធ្វើការជាមួយគ្នា ។ លុះដល់វេលាកើតហេតុ ខណៈពេលដែលគាត់ និងប្តីរួមជាមួយ និងមិត្តភក្តិពីរនាក់ទៀតបានត្រឡប់មកពីលេងបាល់វិញ ។ ខណៈពេលដែលបំរុង និងចូលទៅក្នុងផ្ទះក៏ស្រាប់តែឃើញជនសង្ស័យខាងលើកំពុងឈរកាន់ដំបងនៅខាងក្នុងផ្ទះកើតហេតុខាងលើ ។
ភ្លាមៗនោះពួកគាត់ក៏បានរាយការណ៍ជូនសមត្ថកិច្ចមូលដ្ឋាន ដើម្បីឲ្យចុះមកធ្វើការអន្តរាគមន៍ ។ បន្ទាប់មកកម្លាំងសមត្ថកិច្ចបានចុះមកធ្វើការឡោមព័ទ្ធ និងចូលទៅធ្វើការឃាត់ខ្លួនជនសង្ស័យខាងលើតែម្តង ។
នៅចំពោះមុខសមត្ថកិច្ចជនសង្ស័យខាងលើបានឆ្លើយសារភាពថា គេមានគ្នាចំនួន៣នាក់ប្រុស២ និងស្រីម្នាក់ ។ ពួកគេបានធ្វើសកម្មភាពផ្លោះរបងចូលមកក្នុងផ្ទះកើតហេតុខាងលើ តាមបក្សពួកម្នាក់ទៀតដែលជាអ្នកស្គាល់គ្នា តែមិនទាន់បានលួចទ្រព្យសម្បត្តិអ្វីទេ ។ ចំណែកឯបក្សពួកប្រុសស្រីពីរនាក់ទៀតបាននាំគេចខ្លួនចេញពីកន្លែងកើតហេតុបាត់ស្រមោលអស់ ខណៈពេលដែលកម្លាំងសមត្ថកិច្ចបានចុះមកដល់ ។
ក្រោយពេលកើតហេតុជនសង្ស័យខាងលើត្រូវបានសមត្ថកិច្ចនាំខ្លួនយកទៅសាកសួរនៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿង និងចាត់ការទៅតាមនីតិវិធីច្បាប់ជាបន្តទៀត ៕ កែសម្រួលដោយ ៖ សុឃាក់
ចែករំលែកព័តមាននេះ