ខេត្តព្រះវិហារ ៖ មន្ទីរវប្បធម៌ និងវិចិត្រសិល្បៈខេត្តព្រះវិហារសហការជាមួយមន្ទីរទេសចរណ៍ខេត្តគ្រោងកៀងគរប្រជាជនដែលរស់នៅក្នុងតំបន់រមណីយ៍ដ្ឋានប្រាសាទព្រះខ័នកំពង់ស្វាយបង្កើតឲ្យមានសហគមន៍ទេសចរដើម្បីបម្រើសេវាកម្មផ្នែកម្ហូបអាហារនៅទីនោះដល់ភ្ញៀវទេសចរណ៍ដែលចូលមកលេងកម្សាន្ត ព្រោះបច្ចុប្បន្នរមណីយ៍ដ្ឋានមួយនេះពុំទាន់មានអ្នកផ្តល់សេវាកម្មផ្នែកម្ហូបអាហារនៅឡើយទេភាគច្រើនភ្ញៀវទេសចរដែលទៅនៅទីនោះពួកគេវេចខ្ចប់អាហារមកដោយខ្លួនឯង ។
ថ្លែងប្រាប់អ្នកសារព័ត៌មានលោក នៅ ចាន់គង់ ប្រធានមន្ទីរវប្បធម៌ និងវិចិត្រសិល្បៈខេត្តព្រះវិហារបានឲ្យដឹងថា បច្ចុប្បន្ននេះនៅក្នុងតំបន់រមណីយ៍ដ្ឋានវប្បធម៌ប្រវត្តិសាស្ត្រប្រាសាទព្រះខ័នកំពង់ស្វាយ ឋិតក្នុងភូមិតាសែង ឃុំរណសិរ្ស ស្រុកសង្គមថ្មី ខេត្តព្រះវិហារ នៅមិនទាន់មានកន្លែងសម្រាប់ផ្តល់សេវាកម្មលើផ្នែកម្ហូបអាហារដល់ភ្ញៀវទេសចរដែលចូលទៅលេងកម្សាន្តនៅទីនោះនៅឡើយទេ ។ ភាគច្រើនភ្ញៀវទេសចរដែលទៅលេងកម្សាន្តនៅតំបន់រមណីយ៍ដ្ឋានមួយនេះពួកគេតែងតែនាំគ្នាវេចខ្ចប់ម្ហូបអាហារដោយខ្លួនឯងយកទៅហូបចុកក្រោយដំណើរកម្សាន្តទស្សនាប្រាសាទរួច ។
ដូច្នេះហើយនៅពេលឆាប់ៗខាងមុខនេះមន្ទីរវប្បធម៌ និងសហការជាមួយមន្ទីរទេសចរណ៍ខេត្តព្រះវិហារ នឹងកៀងគរប្រជាពលរដ្ឋនៅទីនោះបង្កើតជាសហគមន៍ទេសចរសម្រាប់បម្រើផ្នែកសេវាកម្មម្ហូបអាហារនៅទីនោះឲ្យមានអនាម័យ និងមានគុណភាព សម្រាប់ផ្តល់នូវភាពងាយស្រួលដល់ភ្ញៀវទេសចរចូលទៅកម្សាន្តនៅទីនោះមិនពិបាកវេចខ្ចប់អាហារទៅហូបដូចមុនទៀតឡើយ ។
ការធ្វើបែបនេះមិនត្រឹមតែធ្វើឲ្យតំបន់ទេសចរណ៍មួយនេះមានការផ្តល់សេវាកម្មដូចកន្លែងទេសចរណ៍ដ៏ទៃទៀត និងបានបង្កលក្ខណៈងាយស្រួលដល់ភ្ញៀវទេសចរក្នុងការទទួលសេវាកម្មម្ហូបអាហារប៉ុននោះទេ ថែមទាំងបានបង្កើននូវប្រាក់ចំណូលពីការផ្តល់សេវាកម្មមួយនេះដល់ប្រជាសហគមន៍ធ្វើឲ្យជីវភាពប្រសើរឡើងថែមមួយកម្រិតទៀត ។
ជាមួយគ្នានេះលោក គង់ វិបុល ប្រធានមន្ទីរទេសចរណ៍ខេត្តព្រះវិហារបានឲ្យដឹងថា ការគ្រោងបង្កើតសហគមន៍ទេសចរនៅតំបន់ប្រាសាទព្រះខ័នកំពង់ស្វាយនឹងចាប់ផ្តើមអនុវត្តនៅឆ្នាំ២០២០ឆាប់ៗខាងមុខនេះ ដើម្បីឲ្យតំបន់នេះមានការផ្តល់នូវសេវាកម្មទេសចរណ៍លើផ្នែកម្ហូបអាហារប្រកបដោយគុណភាព និងអនាម័យត្រឹមត្រូវសម្រាប់ផ្តល់ជូនដល់ភ្ញៀវទេសចរជាតិ និងអន្តរជាតិដែលមកលេងកម្សាន្តនៅទីនោះ ៕
កែសម្រួលដោយ ៖ សំណាង
ចែករំលែកព័តមាននេះ