រាជធានីភ្នំពេញ ៖ លោកអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍លើកឡើងថា អំពើហិង្សា និងការបៀតបៀននៅកន្លែងការងារ គឺជាកត្តារាំងស្ទះដល់ផលិតភាពការងារ និងសុខុមាលភាពរបស់កម្មករនិយោជិត…
រាជធានីភ្នំពេញ ៖ លោកអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍លើកឡើងថា អំពើហិង្សា និងការបៀតបៀននៅកន្លែងការងារ គឺជាកត្តារាំងស្ទះដល់ផលិតភាពការងារ និងសុខុមាលភាពរបស់កម្មករនិយោជិត ។ ថ្លែងក្នុងសិក្ខាសាលាថ្នាក់តំបន់ស្ដីពីការងាររបស់ស្ត្រីនៅកន្លែងធ្វើការនៅសណ្ឋាគារឡឺរ៉ូយ៉ាល់ នាព្រឹកថ្ងៃទី១៧ ខែតុលានេះ ។
លោករដ្ឋមន្ត្រីបានបន្តថា ដើម្បីដោះស្រាយបញ្ហានេះ រាជរដ្ឋាភិបាលកម្ពុជាបានប្តេជ្ញាចិត្តយ៉ាងមុតមាំក្នុងការបង្ការ និងលុបបំបាត់បញ្ហានេះចេញពីពិភពការងារក៏ដូចជា ចេញពីសង្គមជាតិទាំងមូល ។
ជាក់ស្ដែង រាជរដ្ឋាភិបាលបានដាក់ចេញគោលនយោបាយជាច្រើន និងអនុវត្តទាំងបទដ្ឋានជាតិ-អន្តរជាតិ ព្រមទាំងសហការជាមួយដៃគូអភិវឌ្ឍន៍នានា ជាពិសេសជាមួយអង្គការនានា ដែលប៉ុន្មានឆ្នាំចុងក្រោយនេះ បានចូលរួមយ៉ាងសកម្មជាមួយក្រសួងការងារ និងបណ្តុះបណ្តាលវិជ្ជាជីវៈ ក្នុងការលើកកម្ពស់សុវត្ថិភាព និងសុខភាពការងាររបស់កម្មករនិយោជិតជាស្ត្រី និងបានសហការដាក់ចេញជាគោលការណ៍បង្ការ និងទប់ស្កាត់អំពើហិង្សា និងការបៀតបៀនគ្រប់ប្រភេទនៅក្នុងកន្លែងធ្វើការ ។
លោករដ្ឋមន្ត្រីបានគាំទ្រនូវការលើកឡើងរបស់តំណាងអង្គការឃែរ និងគម្រោងការងារល្អប្រសើរដែលបានបញ្ជាក់ថា បញ្ហាអំពើហិង្សា និងការបៀតបៀននៅកន្លែងការងារកើតឡើងពីមូលហេតុច្រើនយ៉ាងដែលចាំបាច់ត្រូវមានការចូលរួមពីគ្រប់ភាគីពាក់ព័ន្ធទាំងអស់ នៅក្នុងបណ្តាញនៃការផ្គត់ផ្គង់ជាសកល (Global Supply Chain) ដែលរួមមានកម្មករនិយោជិត និយោជក ម្ចាស់រោងចក្រ អ្នកបញ្ជាទិញ សហជីព រដ្ឋាភិបាល និងដៃគូអភិវឌ្ឍន៍ ។ ជាមួយគ្នានោះដែរ លោក អ៊ិត សំហេង បានបង្ហាញការសង្ឃឹមថា អង្គសិក្ខាសាលាទាំងមូលនឹងចូលរួមកិច្ចពិភាក្សាយ៉ាងផុលផុស ដើម្បីស្វែងយល់ឱ្យកាន់តែស៊ីជម្រៅទៅលើបញ្ហាចំពោះមុខ និងសហការគ្នាប្រកបដោយសុឆន្ទៈ ក្នុងការសម្រេចឱ្យបានគោលដៅរួមក្នុងការការពារកម្មករនិយោជិត ជាពិសេសស្ត្រី ពីអំពើហិង្សា និងការបៀតបៀននៅកន្លែងការងារ ។
ដើម្បីឱ្យសិក្ខាសាលានេះដំណើរការទៅដោយរលូន ប្រកបដោយប្រសិទ្ធភាព ឯកលោករដ្ឋមន្ត្រីក៏បានផ្តល់ជូនជាអនុសាសន៍មួយចំនួនដូចខាងក្រោម ១- អំពើហិង្សា និងការបៀតបៀនគ្រប់ប្រភេទនៅកន្លែងការងារ គឺជាជំងឺដែលចាំបាច់ត្រូវតែព្យាបាល ។ ២- គ្រប់ភាគីត្រូវតែចូលរួម ដើម្បីទប់ស្កាត់ និងលុបបំបាត់អំពើហិង្សា និងការបៀតបៀនគ្រប់ប្រភេទនៅកន្លែងការងារ ។ ៣- សហជីព អង្គការសង្គមស៊ីវិល គឺជាដៃគូដែលមិនអាចខ្វះបាន ដើម្បីសម្រេចគោលដៅអភិវឌ្ឍន៍ប្រកបដោយចីរភាព ៕ កែសម្រួលដោយ ៖ សុឃាក់
ចែករំលែកព័តមាននេះ