រាជធានីភ្នំពេញ ៖ ដើម្បីទុកជាស្នាដៃសម្រាប់មនុស្សជំនាន់ក្រោយ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានជំរុញឲ្យយុជនជានិស្សិតធ្វើការសិក្សាស្រាវជ្រាវពីប្រវត្តិសាស្ត្រខ្មែរ ភាសាខ្មែរ ស្របតាមសម័យភាវូបនីយកម្ម និងស្រាវជ្រាវនៅបណ្តាប្រទេសអន្តរជាតិផងដែរ ។
លោករដ្ឋមន្ត្រី បានលើកឡើងក្នុងសន្និសីទអន្តរជាតិស្តីពីភាសា វប្បធម៌ និងការអប់រំ នៅអាស៊ីអាគ្នេយ៍ អត្តសញ្ញាណនិងភាពសម្បូបែប នាព្រឹកថ្ងៃទី១៦ ខែតុលា ឆ្នាំ២០១៩ នៅមជ្ឈមណ្ឌលសហប្រតិបត្តិការកម្ពុជា-កូរ៉េថា វិស័យអប់រំដែលបានធ្វើកំណែទម្រង់អស់រយៈពេល៦ឆ្នាំមកនេះ គឺការអប់រំប្រកបដោយគុណភាព ត្រូវពឹងផ្នែកលើកការបង្រៀន និងការរៀន ។ សន្និសីទថ្ងៃនះ ក៏ផ្តោតសំខាន់លើបញ្ហាអតីតកាល បច្ចុប្បន្ន និងអនាគតកាលផងដែរ ដើម្បីឲ្យយុវជនធ្វើការសិក្សាស្រាវជ្រាវ ។
លោករដ្ឋមន្ត្រីបញ្ជាក់ថា ខ្ញុ្ំចង់ឲ្យយុវជនវ័យក្មេងៗរបស់យើង ធ្វើការស្រាវជ្រាវអំពីប្រវត្តិវិទ្យា ហើយក៏ដូចជាភាសារបស់កម្ពុជា ។ ខ្ញុំគិតថា ភារកិច្ចនេះគឺធំធេងណាស់សម្រាប់យុវជនកម្ពុជា ដើម្បីលើកកម្ពស់ការយល់ដឹងអំពីវប្បធម៌ អត្តសញ្ញាណជាតិ ។ យើងក៏ត្រូវការផងដែរ គឺត្រូវធ្វើការស្រាវជ្រាវផ្នែកអន្តរជាតិ។
លោករដ្ឋមន្ត្រី ហង់ ជួនណារ៉ុន បានលើកឡើងថា ការស្រាវជ្រាវនេះយើងចង់ឲ្យកូនខ្មែររបស់យើងចេះដឹង និងចេះដោះស្រាយបញ្ហាអ្វីដែលកើតឡើង ។ អ្វីដែលសំខាន់នោះ ភាសាបរទេសក៏សំខាន់សម្រាប់យុវជននៅពេលចាប់ផ្តើមសិក្សាដល់ឧត្តមសិក្សា ។ លោករដ្ឋមន្ត្រី បានលើកឡើងទៀតថា យុវជនមិនត្រឹមតែធ្វើការស្រាវជ្រាវនោះទេ គឺត្រូវតែយល់ដឹងអំពីអតីតកាល តែត្រូវរៀបចំគម្រោងសម្រាប់អនាគតផងដែរ ដើម្បីធ្វើការស្រាវជ្រាវបានល្អ ។ យើងត្រូវដឹងថា ដើម្បីដឹងអនាគតយើងត្រូវដឹងអំពីអតីតកាល និងបច្ចុប្បន្ន ។ ដូច្នេះភាសារបស់យើង គឺជាវប្បធម៌មួយដែលសម្បូរបែប ហើយភាសាខ្មែរជាភាសាមួយមានប្រវត្តិយូរជាងភាសាមួយចំនួននៃប្រទេសអឺរ៉ុបផងដែរ ។អីុចឹង ប្រទេសនៅអឺរ៉ុបមួយចំនួនទើបមានភាសាផ្ទាល់ខ្លួនក្រោយខ្មែរទេ ។
ទោះជាយ៉ាងណាក្តី លោករដ្ឋមន្ត្រីបានលើកឡើងថា យុវជនជំនាន់ក្រោយមិនសូវស្វែងយល់ពីភាសាជាតិទេ គឺពួកគេបានស្វែងយល់ភាសាអន្តរជាតិ (បារាំង អង់គ្លេស)វិញ ។ ដូច្នេះខ្ញុំជំរុញឲ្យប្អូនៗធ្វើការសិក្សាស្រាវជ្រាវភាសាខ្មែរ ដែលសម្បូរបែបរបស់យើង ។ លោករដ្ឋមន្ត្រីបានបន្ថែមថា យុវជនបើចង់ដឹងពីប្រវត្តិសាស្ត្រ អក្សសាស្ត្រ អត្តសញ្ញាណជាតិខ្មែរ ត្រូវចេះភាសាបារាំង អង់គ្លេស ព្រោះថា សៀវភៅដែលអ្នកស្រាវជ្រាវមុនៗគេសរសេរពីប្រវត្តិសាស្ត្រ ភាគច្រើនសរសេរជាភាសាបារាំង និងអង់គ្លេស ។ ខ្ញុំលើកទឹកចិត្តឲ្យប្អូនៗទាំងអស់គ្នាធ្វើការស្រាវជ្រាវ ហើយជាពិសេសនោះស្វែងយល់បន្ថែមទៀតនូវវប្បធម៌នូវសម័យភាវូបនីយកម្មនេះ គឺត្រូវចេះភាសាបរទេសឲ្យបានច្បាស់ ។
លោក ជេត ជេលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ បានលើកឡើងថាមជ្ឈមណ្ឌលសិក្សាស្រាវជ្រាវមនុស្សសាស្ត្រ និងសង្គមសាស្ត្រ នឹងចូលរូួមចំណែកដល់និស្សិត យុវជនក្នុងការធ្វើការសិក្សាស្រាវជ្រាវ ។ លោកបន្តថា មជ្ឈមណ្ឌលនេះបង្កើតឡើងដោយសាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទវិចិត្រសិល្បៈ និងវិទ្យាស្ថានជាតិអប់រំ ។ នៅសាកវិទ្យាល័យភូមិន្ទភ្នំពេញ ក៏មានមហាវិទ្យាល័យមនុស្សសាស្ត្រ ដែលផ្តល់ការអប់រំដល់និស្សិត ក្នុងការអប់រំប្រកបដោយគុណភាព ដើម្បីឆ្លើយតបទៅការស្រាវជ្រាវផងដែរ ៕
ចែករំលែកព័តមាននេះ