រាជធានីភ្នំពេញ ៖ ប្រិយមិត្តបានដឹងហើយថា អ្នកស្រី អ៊ឹម ផល្លារ ដែលជាតារាម្តែងជើងចាស់ខ្វះខាតលុយកាក់ និងជួបបញ្ហាជីវិតរហូតចង់តែសម្លាប់ខ្លួន ព្រោះសម្តែងយូរហើយគ្មានសល់អ្វីសោះនោះ គឺក្រោយពីអ្នកស្រីបង្ហាញពីការលំបាករួចមក មានតារាប្រុស-ស្រី និងសប្បុរសជនជាច្រើនអាណិតអាសូរ ព្រមទាំងជួយផ្តល់ថវិកា ដើម្បីជាទុនទុករកស៊ីបន្ត។
សូមរំឭកផងដែរថា អ្នកស្រី ផល្លារ តែងតែដើរថតភាពយន្តមួយមួយថ្ងៃរស់មួយថ្ងៃ ហើយពេលខ្លះមានផលិតកម្មខ្លះមិនបើកឱ្យអ្នកស្រីទៀតផង ។ ទោះជាយ៉ាងណាក៏ដោយ អ្នកស្រី ផល្លារ មិនហ៊ានទារនោះទេ ខ្លាចគេលែងហៅថតទៀត ដោយអ្នកស្រីសុខចិត្តដើរខ្ចី និងសុំពីមិត្តសិល្បៈពេលទៅថតម្តងៗ ។
រាល់ថ្ងៃអ្នកស្រី ផល្លារ ជួលបន្ទប់គេស្នាក់នៅជាមួយកូននៅម្តុំផ្សារកណ្តាលជាន់ទី៣ ដោយអ្នកស្រីមានជីវភាពក្រីក្រខ្វះខាត និងមានជំងឺប្រចាំកាយថែមនទៀតផង ។ ថ្មីៗនេះអ្នកស្រី អ៊ឹម ផល្លា បានទទួលអំណោយពីកញ្ញា ម៉ូលីកា នៅហាងរបស់នាងផ្ទាល់តែម្ដង ។
កញ្ញា ម៉ូលីកា បានឱ្យដឹងថា«ក្នុងនាមខ្ញុំជាអតីតសិល្បករមួយរូប សូមជួយអ្នកមីង ៥០០ដុល្លារ ដើម្បីជួយសម្រួលភាពលំបាកបន្ដិចបន្ដួច ដោយក្ដីគោរព» ។ ជាមួយគ្នានេះ អ្នកស្រី អ៊ឹម ផល្លារ បានបង្ហាញអារម្មណ៍រំភើបរីករាយខ្លាំង រហូតរលីងរលោងទឹកភ្នែក ក្រោយពីទទួលជំនួយពីកញ្ញា ម៉ូលីកា ព្រោះទឹកប្រាក់នោះអាចសម្រួលដល់ការលំបាករបស់អ្នកស្រីបានមួយផ្នែក ដែលអាចយកទៅបង់ថ្លៃបន្ទប់ជួល និងបានរស់នៅជាបន្ដទៅទៀត ។
ចំណែកកញ្ញា ម៉ូលីកា វិញក្រោយពីប្រគល់លុយជូនអ្នកស្រី អ៊ឹម ផល្លា ហើយបានឱ្យដឹងទៀតថា «ជូនបុណ្យទាំងអស់គ្នាផង ព្រោះគាត់ឲ្យពរច្រើនណាស់» ។ (កែសម្រួលដោយ ៖ បុប្ផា)
ចែករំលែកព័តមាននេះ