រាជធានីភ្នំពេញ ៖ អាជ្ញាធរភ្នំពេញបានត្រៀមខ្លួនរួចរាល់ សម្រាប់ការជួបជុំពិសារអំបុកចំនួន៩០០ទីតាំង ដោយមានការចូលរួមពីមន្ត្រីរាជការ អាជ្ញាធរដែនដី និងប្រជាពលរដ្ឋប្រមាណជាង១០ម៉ឺននាក់ បានត្រៀមចូលរួមទទួលទានអំបុក ការពារ ជាតិសាសនា…
រាជធានីភ្នំពេញ ៖ អាជ្ញាធរភ្នំពេញបានត្រៀមខ្លួនរួចរាល់ សម្រាប់ការជួបជុំពិសារអំបុកចំនួន៩០០ទីតាំង ដោយមានការចូលរួមពីមន្ត្រីរាជការ អាជ្ញាធរដែនដី និងប្រជាពលរដ្ឋប្រមាណជាង១០ម៉ឺននាក់ បានត្រៀមចូលរួមទទួលទានអំបុក ការពារ ជាតិសាសនា ព្រះមហាក្សត្រ នាថ្ងៃទី០៩ វិច្ឆិកា ឆ្នាំ២០១៩ ដែលចំនឹងថ្ងៃបុណ្យខួបអនុស្សាវរីយ៍លើកទី៦៤នៃទិវាបុណ្យឯករាជជាតិ ០៩ វិច្ឆិកា ។
លោក ឃួង ស្រេង អភិបាលរាជធានីភ្នំពេញបានឲ្យដឹងថា រដ្ឋបាលរាជធានីភ្នំពេញបានរៀបចំផែនការរួចជាស្រេចហើយ ដើម្បីទទួលប្រជាពលរដ្ឋក្នុងកម្មវិធីហូបអំបុកសាមគ្គីនេះ ចំនួន៩០០ទីតាំងគ្រប់ខណ្ឌទូទាំងរាជធានីភ្នំពេញ ។ លោកបន្តថា តាមការរំពឹងទុកសម្រាប់រាជធានីភ្នំពេញនឹងមានអ្នកចូលរួមទទួលទានអំបុកប្រមាណជាង១០ ម៉ឺននាក់ដោយមានមន្ត្រីរាជការ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋនៅតាមមូលដ្ឋាន។
លោកបានបន្ថែមថា សម្រាប់រដ្ឋបាលរាជធានីភ្នំពេញផ្ទាល់នឹងរៀបចំឡើងកម្មវិធីទទួលទានអំបុកនេះនៅបរិវេណរម្មណីយដ្ឋានវត្តភ្នំដោយមានការអញ្ចើញចូលរួមពី គ្រប់មន្ទីរអង្គភាពចំណុះ ក្រោយឱវាទសាលារាជធានីភ្នំពេញ។
ក្នុងនោះ ខណ្ឌចំការមន មាន២៩០០នាក់ ខណ្ឌដូនពេញជាង៤៤៨០នាក់ ខណ្ឌ៧មករាជាង ៧៥០០នាក់ ខណ្ឌទួលគោកជាង៨៩០០អង្គ/នាក់ ខណ្ឌដង្កោ មាន៩៥ទីតាំង មានអ្នកចូលរួមចំនួនជាង១ម៉ឺននាក់ ខណ្ឌមានជ័យមានចំនួនជាង៦ពាន់នាក់ ខណ្ឌឬស្សីកែវជាង៤២០០នាក់ ខណ្ឌសែនសុខមាន៥១ទីតាំងមានអ្នកចូលរួមជាង៣៦០០នាក់ ពោសែនជ័យមាន ៨០ទីតាំងមានចំនួនជាង១ម៉ឺន៤ពាន់នាក់ ជ្រោយចង្វារមានជាង៤ពាន់នាក់ ព្រែកព្នៅមានជាង៦០ទីតាំង មានអ្នកចូលរួមជាង១ម៉ឺន១ពាន់នាក់ ច្បារអំពៅមាន៥២ទីតាំងមានចំនួនអ្នកចូលរួមជាង៦២០០នាក់ បឹងកេងកងមានអ្នកចូលរួមជាង១ពាន់នាក់ ខណ្ឌកំបូលមានចំនួនអ្នកចូលរួម ចំនួនជាង១ម៉ឺន៥ពាន់នាក់ ចឹងគិតទៅថ្ងៃអំបុកនេះប្រហែលចូលជាង១០ម៉ឺននាក់ដែលចូលរួម ។
លោក មាន ចាន់យ៉ាដា អភិបាលរងនៃគណៈអភិបាលរាជធានីភ្នំពេញបានណែនាំឲ្យរដ្ឋ បាលខណ្ឌ ដែលគ្រោងរៀបចំពិធីទទួលទានអំបុកប្រមាណជាង ៩០០ទីតាំងនោះ ត្រូវរៀបចំឲ្យបានល្អ និងមានអំបុកហូបគ្រប់គ្រាន់សម្រាប់បងប្អូនប្រជាពលរដ្ឋចូលរួមទទួលទានអំបុកដើម្បីការពារជាតិ សាសនា ព្រះមហាក្សត្រទាំងអស់គ្នា។
លោក មាន ចាន់យ៉ាដា ក៏បានសូមអោយបងប្អូនប្រជាពលរដ្ឋចូលរួមសប្បាយរីករាយ និងអបអរសាទរ ក្នុងព្រះរាជពិធីបុណ្យអុំទូកបណ្តែតប្រទីប និងសំពះព្រះខែ អកអំបុកដែលនឹងប្រព្រឹត្តិទៅ នាថ្ងៃទី១០-១១ និងទី១២ វិច្ឆិកា ឆ្នាំ២០១៩ ខាងមុខនេះ រួមជាមួយនឹងមោទនភាពចំពោះសមិទ្ធផលនានារបស់រាជធានីភ្នំពេញ ដែលបាននិងកំពុងរីកចំរើនយ៉ាងខ្លាំងក្លានាប៉ុន្មានឆ្នាំចុងក្រោយនេះ ។
ចែករំលែកព័តមាននេះ