កីឡាករសញ្ជាតិបេឡារូស យ៉ូហេនី ហ៊ូតារ៉ូវិច ដោយមានជំនួយពីបណ្តាមិត្តរួមក្រុមបានយកឈ្នះដំណាក់ទី២ នៃការប្រណាំងកង់កម្មវិធី Tour of Spain នៅទីក្រុងម៉ាបេឡា ប្រទេសអេស្ប៉ាញ កាលពីថ្ថៃអាទិត្យ ទី២៩ សីហា កន្លងមកនេះ ។ ហ៊ូតារ៉ូវិច ដែលជាអ្នកជិះកង់ឱ្យក្រុម «អេហ្វឌីជេ» បានយកឈ្នះដំណាក់ដែលមានចំងាយផ្លូវ១៧៣,៧គីឡូម៉ែត្រ ចេញដំណើរពីទីក្រុងអាល់កាឡា ដឺហ្គាដេរ៉ា ទៅកាន់ទីក្រុងម៉ាបេឡា ប្រទេសអេស្ប៉ាញ ដោយប្រើអស់ថិរវេលា៤ម៉ោង៣៥នាទីនិង៤១វិនាទី នាំមុខកីឡាករអង់គ្លេសម៉ាក កាវ៉ីនឌីស ជិះឱ្យក្រុម «អេចធីស៊ីកូឡុំប៊ីយ៉ា» និងបាននាំមុខកីឡាករអាមេរិកថៃល័រ ហ្វារ៉ា របស់ក្រុមប្រណាំង «ហ្គាមីន» ដែលបានប្រើថិរវេលាស្មើៗគ្នា ។
ថ្លែងបន្ទាប់ពីទទួលបានជ័យជំនះ កីឡាករហ៊ូតារ៉ូវិច បាននិយាយថា៖ «ជ័យជំនះរបស់ខ្ញុំនៅពេលនេះហាក់បីដូចជាភ្ញាក់ផ្អើលបន្តិច ។ នេះគឺជាការប្រណាំងក្នុងក្របខណ្ឌដ៏ធំបំផុតទី៣របស់ខ្ញុំ ។ ហើយគោលបំណងដែលខ្ញុំមកទីនេះ គឺដើម្បីយកឈ្នះយ៉ាងហោចណាស់ឱ្យបានមួយដំណាក់» ។ កីឡាកររូបនេះបានបន្តថា៖ «ជ័យជំនះក្នុងក្របខណ្ឌធំលើកទី១ របស់ខ្ញុំ គឺនៅ Tour of Poland ។ ខ្ញុំបានសំរេចចិត្តតាមពីក្រោយកីឡាករម៉ាក កាវ៉ីនឌីស ខណៈពេលក្រុមរបស់ខ្ញុំបានបង្កលក្ខណៈងាយស្រួលឱ្យខ្ញុំ ។ ខ្ញុំបាននៅកៀកលោកកាវ៉ីនឌីស ហើយនៅពេលដែលឱកាសល្អបានមកដល់ ខ្ញុំក៏ជិះវ៉ាគាត់តែម្តង។ ខ្ញុំស្ទើរតែមិនជឿខ្លួនឯងសោះនៅពេលដែលបានឈ្នះការប្រណាំង ។ ខ្ញុំខ្លួនឯងផ្ទាល់ពិតជាមានក្តីរីករាយជាខ្លាំង ឯមិត្តរួមក្រុមរបស់ខ្ញុំក៏ដូច្នេះដែរ» ។
បើទោះបីជាកីឡាករហ៊ូតារ៉ូវិច បានយកឈ្នះដំណាក់នេះក៏ដោយចុះ តែរូបគេនៅពុំទាន់អាចសន្សំពេលវេលាគ្រប់គ្រាន់ក្នុងការនាំមុខគេលើតារាងពេលវេលាសរុបនោះទេ ដ្បិតអីកីឡាករអង់គ្លេសកាវ៉ីនឌីស ដែលបានបញ្ចប់ដំណាក់នេះក្នុងលំដាប់ទី២នោះ នៅតែបន្តការនាំមុខដដែល ។ ឆ្លងកាត់ការប្រណាំង២ដំណាក់រួចមក កាវ៉ីនឌីស ប្រើអស់ថិរវេលាសរុប៤ម៉ោង៤៩នាទីនិង៣៥វិនាទី នាំមុខកីឡាករបែងឡារូស កង់ស្តង់ទីន ស៊ីសូវ និងកីឡាករស្លូវា៉គីភីធ័រ វេលីត ដែលបានប្រើថិរវេលាច្រើនជាង១២វិនាទី ៕
ចែករំលែកព័តមាននេះ