រាជធានីភ្នំពេញ ៖ រថយន្តមួយគ្រឿងបើកបរដោយជនជាតិចិនបត់អត់ស៊ីញ៉ូជ្រុលទៅបុកម៉ូតូ១គ្រឿងដែលបើកបរដោយស្ត្រីជាប្រពន្ធបណ្តាលឱ្យដួល ហើយរថយន្តនោះថយជ្រុលទៅកិនម៉ូតូគ្រឿងទៀតដែលបើក បរដោយបុរសជាប្តី បណ្តាលឲ្យម៉ូតូទាំង២គ្រឿងរងការខូចខាតយ៉ាងធ្ងន់ធ្ងរ តែប្តីប្រពន្ធទាំង២នាក់ខាង លើនេះមិនមានរងរបួសអ្វីធ្ងន់ធ្ងរនោះទេ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង៩និង២០នាទីយប់ថ្ងៃទី១៦ ខែតុលា ឆ្នាំ២០១៩ តាមបណ្តោយផ្លូវវិថីឈ្នះឈ្នះហៅផ្លូវទំនប់កប់ស្រូវ ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
រថយន្ដមួយគ្រឿងខាងលើជិះគ្នា៣នាក់ ម៉ាកស្តារិច ពណ៌ខ្មៅ ពាក់ស្លាកលេខ ភ្នំពេញ ២BA-០៤១៨ អ្នកបើកបរ និងអ្នករួមដំណើរចំនួន២នាក់ទៀតមិនស្គាល់អត្តសញ្ញាណនោះទេ គ្រាន់តែដឹងថាជាជនជាតិចិន ។ ចំណែកម៉ូតូទាំង២គ្រឿងខាងលើ ក្នុងនោះម៉ូតូមួយគ្រឿងម៉ាកស្គូពី ពណ៌ស ពាក់ស្លាកលេខ ភ្នំពេញ ១HS-៩៦១៧ បើកបរដោយស្ត្រីជាប្រពន្ធ មិនស្គាល់អត្តសញ្ញាណ និងម៉ូតូមួយគ្រឿងទៀតម៉ាកឃ្លីក ពណ៌សលាយខ្មៅ ពាក់ស្លាកលេខភ្នំពេញ ១HT-៣៦២៨ បើកបរដោយបុរសជាប្តីមិនស្គាល់អត្តសញ្ញាណ ។
តាមប្រភពព័ត៌មានបានឱ្យដឹងថា មុនពេលកើតហេតុ គេឃើញស្ត្រីម្នាក់ និងបុរសចំនួន២នាក់សុទ្ធតែជាជនជាតិចិនបានជិះក្នុងរថយន្តមួយគ្រឿងខាងលើ ធ្វើដំណើរក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើបានបត់ស្ដាំអត់ស៊ីញ៉ូក៏ជ្រុលទៅបុកម៉ូតូមួយគ្រឿងម៉ាកស្គូពី ដែលបើកបរដោយស្ត្រីជាប្រពន្ធ បណ្តាលឲ្យដួលរងការខូចខាតតិចតួច ហើយរថយន្តបង្កបានថយមកកិនម៉ូតូមួយគ្រឿងទៀតម៉ាកឃ្លីក ដែលបើកបរដោយបុរសជាប្តី បណ្តាលឲ្យដួលរងការខូចយ៉ាងធ្ងន់ធ្ងរ តែប្តីប្រពន្ធទាំងពីរនាក់មិនមានរងរបួសអ្វីធ្ងន់ធ្ងរនោះទេ ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ចោមចៅទី៣បានចុះមកអន្តរាគមន៍នៅកន្លែងកើតហេតុដោយបានបាញ់ថ្នាំ និងយកម៉ូតូអែបខាងដើម្បីសំរួលចរាចរណ៍ ហើយភាគីទាំងសងខាងធ្វើការសំរបសំរួលគ្នាជាងមួយម៉ោង ដោយភាគីខាងរថយន្តជនជាតិចិនសងថ្លៃខូចខាត និងថ្លៃព្យាបាលរបួសចំនួន១៤០ដុល្លារអោយទៅខាងភាគីប្ដីប្រពន្ធខាងលើដើម្បីបញ្ចប់រឿងនៅកន្លែងកើតហេតុ ៕ (កែសម្រួលដោយ ៖ ធីតា)
ចែករំលែកព័តមាននេះ