រាជធានីភ្នំពេញ ៖ គិតត្រឹមរយៈពេល៩ខែដើមឆ្នាំ២០១៩នេះ ទុនវិនិយោគនៅក្នុងវិស័យសំណង់មានជាង៦ពាន់លានដុល្លារកើនឡើងជាង២៨%បើប្រៀបធៀបរយៈពេលដូចគ្នាឆ្នាំ២០១៨។នេះបើតាមរបាយការណ៍ក្រសួងរៀបចំដែនដី នគរូបនីយកម្មនិងសំណង់ចេញផ្សាយថ្មីៗនេះ ។
ទោះបីជាវិស័យសំណង់នៅតែដើរតួនាទីសំខាន់និងបន្តមានកំណើនក៏ពិតមែន ប៉ុន្តែគុណភាពសំណង់នៅតែជាចំណោទដែលមហាជនបន្តមានមន្ទិល ជាពិសេសបន្ទាប់ពីមានហេតុការណ៍នៃការបាក់អាគារកំពុងសាងសង់នៅខេត្តព្រះសីហុនកន្លងមកដែលបានឆក់យកជីវិតកម្មករ ២៨ នាក់កាលពីចុងខែមិថុនា ដែលក្នុងនោះសូម្បីតែអ្នករកស៊ីខាងវិស័យសំណង់និងអចលទ្រព្យក៏ធ្លាប់បានស្នើសុំក្រសួងដែនដី ជួយធ្វើយ៉ាងណាបង្កើតនូវទំនុកចិត្ដដល់អតិថិជនឡើងវិញ ។ យ៉ាងណាមិញ បើក្រឡេកទៅមើលរបាយការណ៍របស់ក្រសួងដែនដី វិស័យសំណង់នៅតែមានផាសុខភាពល្អ បើទោះបីជាថ្មីៗនេះជនជាតិចិនបានសម្រុកចាកចេញពីប្រទេសកម្ពុជាក្រោយពីរាជរដ្ឋាភិបាលសម្រេចបិទហ្គែមអនឡាញនោះ ។
របាយការណ៍ក្រសួងរៀបចំដែនដី នគរូបនីយកម្មនិងសំណង់បានបង្ហាញថា
គិតត្រឹមរយៈពេល៩ខែដើមឆ្នាំនេះ សំណង់នៅទូទាំងប្រទេសមានចំនួនសរុប៣.៤៣៣គម្រោងមានផ្ទៃក្រឡាសំណង់សរុបជាង១៣លានម៉ែត្រការ៉េ និងមានតម្លៃប៉ាន់ស្មានទុនវិនិយោគប្រមាណជាង៦.៤៩៤លានដុល្លារអាមេរិក បើប្រៀបធៀបនឹងរយៈពេល៩ខែដូចគ្នាឆ្នាំ២០១៨មាន២.៥៤១គម្រោងមានតម្លៃប៉ាន់ស្មានទុនវិនិយោគប្រមាណជាង៤.៨២០លានដុល្លារអាមេរិក ពោលគឺមានការកើនឡើង៣៤,៧៣%។
បើតាមរបាយការណ៍ដដែលបានបញ្ជាក់ឲ្យដឹងថា «ក្នុងចំណោមគម្រោងទាំងអស់ក្នុងនោះសម្រាប់សមត្ថកិច្ចក្រសួងបានផ្តល់លិខិតអនុញ្ញាតសាងសង់ប្រមាណ២៧៤គម្រោងមានតម្លៃប៉ាន់ស្មានទុនវិនិយោគប្រមាណជាង៥.៧៥២លានដុល្លារអាមេរិកបើប្រៀបធៀបរយៈពេលដូចគ្នាឆ្នាំ២០១៨មាន ២២៤គម្រោង មានតម្លៃប៉ាន់ស្មានទុនវិនិយោគប្រមាណជាង៤.៤៧៥លានដុល្លារអាមេរិក គឺមានការកើនឡើង២៨,៥៣%។ ចំពោះសមត្ថកិច្ចរដ្ឋបាលរាជធានី ខេត្តមាន១៥៩គម្រោងមានតម្លៃប៉ាន់ស្មានទុនវិនិយោគជាង៧៤២លានដុល្លាអាមេរិក ធៀបទៅនឹងរយៈពេលដូចគ្នាឆ្នាំ២០១៨មាន៣៤៤លានដុល្លារដុល្លារអាមេរិក ពោលកើនឡើងជាង១១៥%»។
ស្របពេលទុនវិនិយោគក្នុងវិស័យសំណង់នៅរយៈពេល៩ខែឆ្នាំ២០១៩នេះកើនឡើងជាង៣៤% វិស័យមួយនេះក៏បានបង្កើតការងារជាច្រើនជូនប្រជាពលរដ្ឋប្រមាណពីជាង១៤ម៉ឺននាក់ទៅ១៥ម៉ឺននាក់ក្នុង១ថ្ងៃ។ របាយការណ៍បង្ហាញថា «ក្នុងរយៈពេល៩ខែឆ្នាំ២០១៩នេះ គិតជាមធ្យមបានបង្កើតការងារប្រមាណពី១៤៧.៤៥០នាក់ ទៅ១៥០.០០០នាក់ក្នុងមួយថ្ងៃ។ ដោយឡែកនៅរាជធានីភ្នំពេញមានចំនួនកម្មករប្រមាណពី៤៣.៤០០នាក់ ទៅ៤៣.៥០០នាក់ក្នុងមួយថ្ងៃ។ បើប្រៀបធៀបនឹងរយៈពេល៩ខែឆ្នាំ២០១៨ចំនួនកម្មករគិតជាមធ្យម ប្រមាណពី២០០.០០០នាក់ទៅ២២០.០០០នាក់ក្នុងមួយថ្ងៃសម្រាប់ទូទាំងប្រទេស ដោយឡែកនៅរាជភ្នំពេញមានចំនួនកម្មករពី៩០.០០០នាក់ទៅ១០០.០០០នាក់ក្នុងមួយថ្ងៃគឺមានការថយចុះចំនួន៣១,៨១%»។
តាមការសិក្សាស្រាវជ្រាវផ្ទាល់ក្នុងរយៈពេល៩ខែឆ្នាំ២០១៩នេះ តម្លៃពលកម្មសម្រាប់កម្មករគ្មានជំនាញក្នុង១ថ្ងៃអាចទទួលបានពី៣ម៉ឺនរៀលទៅ៤ម៉ឺនរៀល កម្មករមានជំនាញនិងមេជាងក្នុង១ថ្ងៃអាចទទួលបានពី៤ម៉ឺនរៀលទៅ៦ម៉ឺនរៀល ចំពោះវិស្វករ ស្ថាបត្យករនិងអ្នកជំនាញផ្សេងទៀតក្នុង១ខែអាចទទួលបានប្រាក់បៀរត្សពី៤០០ដុល្លារអាមេរិកទៅ២.៥០០ដុល្លារអាមេរិក។
ពាក់ព័ន្ធវិស័យសំណង់កម្ពុជាលោក ជាសុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ធ្លាប់មានប្រសាសន៍ថា «ពីឆ្នាំ ២០០០ដល់ឆ្នាំ២០០៧គម្រោងវិនិយោគនៅក្នុងប្រទេសកម្ពុជាយើងនៅលើវិស័យសំណង់មានតែ៣.២០០លានដុល្លារអាមេរិក,ពីឆ្នាំ២០០៨ដល់២០១១ឡើងដល់១,២លានុដល្លារអាមេរិក តែមកដល់ឆ្នាំ២០១២ដល់២០១៨ ចាប់ផ្តើមឡើងកំហុក ឡើងរហូតដល់៥.៧៥៥ដុល្លារអាមេរិក»។
លោកឧបនាយករដ្ឋមន្ត្រី ក្នុងវិស័យសំណង់កម្ពុជា ក្រុមហ៊ុនចិនបានបោះទុនវិនិយោគ២.៨៦៥លានដុល្លារអាមេរិកជាប់ចំណាត់ថ្នាកទី១,ប្រទេសកូរ៉េជាប់ចំណាត់ថ្នាកទី២ បានបោះទុនវិនិយោគ១.៦៥០លានដុល្លារអាមេរិកនិងប្រទេសជប៉ុនជាប់ចំណាត់ថ្នាក់ទី៣ បានបោះទុនវិនិយោគ៣៨២លានដុល្លារអាមេរិក៕ កែសម្រួលដោយ ៖ សុឃាក់
ចែករំលែកព័តមាននេះ