ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា ពលរដ្ឋផលិតអំបុកនៅភូមិរកា ឃុំល្វា ក្នុងស្រុកពួក រំពឹងថា អំបុកខ្មែរពិតៗ នឹងទទួលបានការគាំទ្រកាន់តែច្រើន ជាពិសេសថ្ងៃទិវាទទួលទានអំបុកទូទាំងប្រទេសនេះ ។
បើតាមលោក រិច គ្រីន អ្នកផលិតអំបុករស់នៅភូមិរកា ឃុំល្វា ស្រុកពួក បានឲ្យដឹងថា ក្រោយពេលប្រមុខរាជរដ្ឋាភិបាលកម្ពុជា បានប្រកាសយកថ្ងៃទី០៩ ខែវិច្ឆិកា ជាថ្ងៃទិវាហូបអំបុកទូទាំងប្រទេស ដើម្បីការពារជាតិ សាសនា ព្រះមហាក្សត្រនោះ លោករំពឹងថា ទីផ្សារអំបុកនឹងមានតម្លៃខ្ពស់ ខណៈថ្ងៃធម្មតាមានតម្លៃ៤៥០០រៀលក្នុងមួយគីឡូក្រាម ។ ហើយនាពេលបច្ចុប្បន្ននេះ ការផលិតអំបុករបស់ប្រជាពលរដ្ឋរស់នៅភូមិរបស់លោកប្រមាណជាង២០០គ្រួសារ កំពុងមានទីផ្សារជាបណ្ដើរហើយ និងមានអ្នកកុំម៉ង់ទិញជាបន្ដបន្ទាប់ផងដែរ។
លោក រិច គ្រីន ឲ្យដឹងទៀតថា ក្នុងមួយថ្ងៃលោកធ្វើអំបុកបោះឲ្យក្រុមឈ្មួញកណ្ដាលបានប្រមាណ១០០គីឡូក្រាម ហើយនៅមុនថ្ងៃ និងក្រោយថ្ងៃអបអរទទួលអំបុកនេះ នឹងឡើងថ្លៃជាងនេះ ដែលអាចជួយដោះស្រាយជីវភាពប្រចាំថ្ងៃ ខណៈដែលស្រូវធ្វើអំបុកត្រូវបានមកពីខេត្ដកំពង់ធំ ខេត្ដបាត់ដំបង និងកន្លែងផ្សេងៗទៀត។
ជាមួយគ្នានេះដែរ លោក ឆន ណូ ដែលជាអ្នកផលិតអំបុក រស់នៅស្រុកពួក ក៏បានឲ្យដឹងដែរថា ការធ្វើអំបុកត្រូវចំណាយដើមទុនច្រើន ទាំងការប្រើប្រាស់បច្ចេកទេសផលិតអំបុក និងចំណាយទិញស្រូវធ្វើអំបុក ប៉ុន្តែស្រូវដែលយកមកធ្វើអំបុកនេះ ត្រូវយកមកពីតំបន់ផ្សេង ដោយសារស្រូវដែលពួកគាត់ធ្វើស្រែដោយផ្ទាល់ដៃ ទើបចេញផ្កា មិនទាន់ទុំល្មមបុកអំបុកនៅឡើយ ។
លោក ឆន ណូ ឲ្យដឹងទៀតថា អំបុកដែលអ្នកភូមិផលិតជាអំបុកស្រូវថ្មីពិតៗ ដោយគ្មានប្រើប្រាស់សារធាតុអ្វីផ្សេងដាក់ចូលក្នុងអំបុកនោះឡើយ បើទោះបីទិញស្រូវពីតំបន់ផ្សេងក៏ដោយ ដូច្នេះក្នុងនាមជាអ្នកលក់អំបុក ក៏ដូចជាអ្នកផលិតអំបុកក្នុងភូមិ ពួកគាត់មានការគាំទ្រយ៉ាងពេញទំហឹង ចំពោះការប្រកាសរបស់ប្រមុខរាជរដ្ឋាភិបាលកម្ពុជា ឲ្យមានទិវាទទួលអំបុកទូទាំងប្រទេស ដែលពួកគាត់រំពឹងថា អំបុកស្រូវថ្មីស្នាដៃកូនខ្មែរ និងមានទីផ្សារខ្ពស់ ។
គួររំលឹកថា នាឱកាសអញ្ជើញជាអធិបតីក្នុងពិធីចែកវិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈគរុកោសល្យ និងនិស្សិតបញ្ចប់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី០២ ខែតុលា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសយកថ្ងៃសៅរ៍ ទី០៩ វិច្ឆិកា ឆ្នាំ២០១៩ ដែលជាថ្ងៃបុណ្យឯករាជ្យជាតិ ហើយបន្តដោយបុណ្យអុំទូក អកអំបុក និងសំពះព្រះខែ គឺជាថ្ងៃកម្ពុជា ត្រូវទទួលទានអំបុកនៅទូទាំងប្រទេស «ហូបអំបុកការពារជាតិ , សាសនា , ព្រះមហាក្សត្រ»។
ទន្ទឹមនឹងនេះដែរ សម្តេចតេជោ ហ៊ុន សែន បានអំពាវនាវដល់ថ្នាក់ដឹកនាំ និងសកម្មជនគណបក្សប្រជាជនកម្ពុជាទូទាំងប្រទេស ត្រូវរៀបចំអំបុកឲ្យបានហូបគ្រប់ៗគ្នា នៅថ្ងៃទី០៩ ដល់ថ្ងៃទី១២ ខែ វិច្ឆិកា ឆ្នាំ ២០១៩ ខាងមុខនេះ ។ (កែសម្រួលដោយ ៖ បុប្ផា)
ចែករំលែកព័តមាននេះ