គ្រាន់តែទៅធ្វើការពីម៉ោង៩ព្រឹក ដល់៥ល្ងាច គឺមិនគ្រប់គ្រាន់ទេ ប្រសិនបើអ្នកចង់មានជីវភាពធូរធារនៅថ្ងៃអនាគត ។ ដោយហេតុដូចនេះ ទើបមនុស្សជាច្រើនជ្រើសរើសការបើកអាជីវកម្មបន្ថែមពីការងាររបស់ពួកគេ ដើម្បីបង្កើនប្រភពចំណូលរបស់ខ្លួន ។
ប៉ុន្តែប្រជាជនកម្ពុជាភាគច្រើនមានទម្លាប់បើកអាជីវកម្មតាមគ្នាទៅវិញទៅមកដោយគ្រាន់តែសង្កេតមើលថា នរណាកំពុងរកលុយបានច្រើន ហើយចម្លងតាមពួកគេទាំងស្រុង ។ ប្រាកដណាស់ វាជាជម្រើសដែលមានហានិភ័យទាប ប្រសិនបើមានតម្រូវការខ្ពស់ ។ ប៉ុន្តែសម្រាប់អ្នកដែលមិនចូលចិត្តចម្លងពីគេ និងចង់មានគំនិតបើកអាជីវកម្មដែលថ្មីអ្នកអាចសាកល្បងគំនិតប្លែកៗខាងក្រោមនេះដែលកំពុងរកលុយឲ្យមនុស្ស ៖
១. ផ្សព្វផ្សាយសម្លៀកបំពាក់ឲ្យអ្នកដទៃ៖
លោក Jason Zook រកចំណូលបានពីការពាក់អាវយឺតសម្រាប់ក្រុមហ៊ុនដទៃតាមរយៈគេហទំព័រ IWearYourShirt.com ។ បច្ចុប្បន្ននេះ ជាពិសេសក្នុងប្រទេសកម្ពុជា មើលឃើញមានអាជីវកម្មលក់សម្លៀកបំពាក់ជាច្រើន ។ ប្រសិនបើអ្នកមានវត្តមានលើប្រព័ន្ធសង្គមខ្លាំង ឬស្គាល់មនុស្សដែលមានវត្តមាននោះអ្នកអាចចាប់ផ្តើមអាជីវកម្មនេះដោយខ្លួនឯងបាន ។
២. ចែកសៀវភៅឥតគិតថ្លៃ៖
លោក Steve Gillman ធ្លាប់សរសេរសៀវភៅមួយក្បាលពីវិធីទិញផ្ទះឲ្យបានថោក ដែលស្ទើរតែលក់មិនចេញទាល់តែសោះ ។ ដូច្នេះលោកក៏ចាប់ផ្តើមផ្ញើជំពូកទីមួយទៅតាមអ៊ីមែលឲ្យមនុស្សដទៃដោយឥតគិថ្លៃរួចដាក់ Link ទៅកាន់ Website របស់លោកជារៀងរាល់សប្តាហ៍ ដើម្បីឲ្យអ្នកទទួលអាចអានជំពូកដទៃ ។ យុទ្ធសាស្ត្រនេះបានជួយឲ្យលោករកលុយបានជារៀងរាល់ខែពីការផ្សាយពាណិជ្ជកម្មលើគេហទំព័រ ។
៣. ការលក់មិត្តភាព៖
RentAFriend.com ជាគហេទំព័រដែលអនុញ្ញាតឲ្យអ្នកដទៃជួលមិត្តភក្តិក្នុងតម្លៃ៥០ដុល្លារក្នុងមួយម៉ោង និងផ្តល់ជាអាហារឥតគិតថ្លៃ និងសំបុត្រចូលមើលការប្រគំតន្ត្រីផ្សេងៗជាដើម ។ អ្នកអាចនឹងគិតថា តើមាននរណានឹងប្រើសេវានេះ ? ប៉ុន្តែការពិតជាក់ស្តែងក្នុងសង្គម គឺមានមនុស្សជាច្រើនដែលនៅឯការ ឬមិនមានភាពក្លាហានក្នុងការបង្កើតមិត្តភាពជាមួយអ្នកដទៃជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ