លោក យស់ បូវណ្ណៈ នឹងដឹកនាំបេក្ខជនជ័យលាភីពីអាមេរិកមកកម្ពុជាហើយ

ថ្ងៃទី ១៦ ខែ តុលា ឆ្នាំ ២០១៩
ម៉ោង ១៥:៥២
សុខ វាសនា

រាជធានីភ្នំពេញ ៖ អតីតតារាសម្តែងដ៏ល្បីល្បាញនាទស្សវត្សន៍ឆ្នាំ ៩០ លោក យស់ បូវណ្ណៈ នឹងដឹកនាំម្ចាស់ជ័យលាភីពីសហរដ្ឋអាមេរិក ដើម្បីចូលរួមប្រឡងក្នុងកម្មវិធីមហោស្រពប្រឡងចម្រៀងខ្មែរសកលឆ្នាំ២០១៩ ដែលនឹងព្រឹត្តិទៅចាប់ពីថ្ងៃទី ១៦ ដល់ ២៦ ខែតុលា ឆ្នាំ២០១៩ ខាងមុខនេះ ។

តាមគម្រោងលោក យស់ បូវណ្ណៈ នឹងមកដល់អាកាសយាន្តដ្ឋានអន្តរជាតិភ្នំពេញនៅថ្ងៃទី១៩ ខែតុលា ឆ្នាំ ២០១៩ ដោយលោកនឹងនាំបេក្ខជនដែលទទួលបានជ័យលាភីនៅអាមេរិក ដើម្បីមកប្រឡងវគ្គផ្តាច់ព័ត្រនៅកម្ពុជា ។

បេក្ខជនដែលលោកនឹងនាំមកនោះមានដូចជា បេក្ខនារី គឹម សោភ័ណ្ឌ, បេក្ខជន សម សារិន និងបេក្ខជនដែលទទួលបានចំណាត់លេខ ១ គឺលោក ឡាយ ប៊ុនឡេង ដែលបេក្ខជនទាំងអស់នេះ ជាម្ចាស់ជ័យលាភីដែលបានជ្រើសរើសពីគណៈកម្មការប្រឡងប្រចាំទីក្រុងឡុងប៊ិច សហ រដ្ឋអាមេរិក ។

បើតាមការបញ្ជាក់របស់អ្នកស្រី លី ស៊ីថារី ភរិយារបស់លោក យស់ បូវណ្ណៈ បានឲ្យដឹងថា លោក យស់ បូវណ្ណៈ គឺជាមេប្រយោគកិត្តិយសនៃគណៈកម្មការមួយរូបក្នុងកម្មវិធីប្រឡងខាងលើ ប្រចាំទីក្រុងឡុងប៊ិច ហើយលោកក៏ជាគណៈប្រតិភូក្នុងតួនាទីជាទីប្រឹក្សាក្រសួងវប្បធម៌ ដើម្បីដឹកនាំបេក្ខជនពីសហរដ្ឋអាមេរិកមកប្រឡងនៅកម្ពុជាផងដែរ ។

អ្នកស្រីបន្ថែមថា លោក យស់ បូវណ្ណៈ នឹងចំណាយពេលនៅស្រុកខ្មែរចំនួន ២ សប្តាហ៍ ដើម្បីចូលរួមមើលការប្រឡងរហូតដល់ថ្ងៃបញ្ចប់ ហើយចំណាយពេលខ្លះទៀតក្នុងការចូលរួមសម្ពោធខ្សែភាពយន្តខ្នាតធំរឿង «លោកឪពុក» ដែលលោកបានចូលរួមសម្តែង ជាមួយគ្នានេះដែរ លោកក៏នឹងឆ្លៀតជួបសួរសុខទុក្ខបងប្អូនដែលរស់នៅស្រុកខ្មែរផងដែរ ។

អ្នកស្រីអះអាងថា កម្មវិធីប្រឡងចម្រៀងខ្មែរជាសកលនេះ គឺធ្វើឡើងដោយមានការជ្រើសរើសបេក្ខជនជាជនជាតិខ្មែរដែលរស់នៅជុំវិញពិភពលោក ដោយសារក្រសួងវប្បធម៌ចង់ឲ្យមានការរឹតចំណងមិត្តភាពខ្មែរទាំងអស់ ដើម្បីចូលរួមថែរក្សា និងលើកតម្លៃសិល្បៈវប្បធម៌ ប្រពៃណីខ្មែរយើង ។

បើតាមអ្នកស្រី លី ស៊ីថារី ទាំងលោក យស់ បូវណ្ណៈ អ្នកស្រី និងគ្រួសារទាំងអស់ ព្រមទាំងបង ប្អូនខ្មែរដែលរស់នៅអាមេរិកនេះ គឺតែងតែលើកស្ទួយ និងបណ្តុះបណ្តាល ផ្សព្វផ្សាយពីសិល្បៈវប្បធម៌ខ្មែរជានិច្ច ដោយពួកយើងមិនដែលបំភ្លេចឡើយ បើទោះបីជាកំពុងរស់នៅឯនាយសមុទ្រក៏ដោយ ។

ដោយឡែកសម្រាប់បេក្ខជនដែលនាំមកប្រកួតនេះ គឺជាបេក្ខជនដែលពោរពេញដោយសមត្ថ ភាពពិតប្រាកដ ដែលត្រូវបានជ្រើសពីគណៈកម្មការនៅទីនេះ ហើយអ្នកស្រីរំពឹងថា បេក្ខទាំង ៣ខាងលើនេះ អាចនឹងដណ្តើមចំណាត់ល្អទៀតពេលចូលរួមប្រកួតនៅស្រុកខ្មែរ ។

អ្នកស្រី និងក្រុមគ្រួសារក៏បានថ្លែងអំណរគុណផងដែរដល់រាជរដ្ឋភិបាលកម្ពុជា ដែលបានសម្រេចផ្តល់កិត្តិយសងារជាឯកឧត្តមដល់លោក យស់ បូវណ្ណៈ ក្នុងនាមជាទីប្រឹក្សាក្រសួងវប្បធម៌ ក្នុងពេលដែលលោកបានខិតខំប្រឹងប្រែងក្នុងការអប់រំ និងផ្សព្វផ្សាយវប្បធម៌ខ្មែរនៅក្រៅប្រទេស ។ អ្នកស្រីថា ងារ និងតួនាទីនេះ គឺជាការធ្វើការដោយស្ម័គ្រចិត្តប៉ុណ្ណោះពីលោក យស់ បូវណ្ណៈ ដោយលោកមិនទទួលប្រាក់ខែពីរដ្ឋនោះឡើយ ក្នុងពេលដែលលោកក៏មិនមានពេលគ្រប់គ្រាន់សម្រាប់ធ្វើការងារជាមន្ត្រីរាជការម្នាក់នៅក្នុងក្រសួងវប្បធម៌ស្រុកខ្មែរនោះដែរ ។

គួរំឭកថា ការមកស្រុកខ្មែរពីអតីតតារាភាពយន្តលោក យស់ បូវណ្ណៈ នាពេលនេះ មិនមែនជាលើកទីមួយទេ ពោលគឺលោកបានមកស្រុកកំណើតជាបន្តបន្ទាប់តាមការចាំបាច់ ហើយលោកតែងតែនឹករលឹកដល់ទស្សនិកជនខ្មែរដែលធ្លាប់គាំទ្រការសម្តែងរបស់លោកកន្លងមក ។ លោកធ្លាប់អះអាងថា លោកនៅតែស្រឡាញ់វិស័យសិល្បៈ ប៉ុន្តែមិនមានពេលគ្រប់គ្រាន់ដើម្បីថតភាពយន្តឡើងវិញ គ្រាន់តែលោកមានរយៈពេលខ្លីដែលមានឱកាសបានចូលរួមថតរឿង «លោកឪពុក» របស់ផលិតកម្មមហាហង្ស ដែលទើបចាក់បញ្ចាំងថ្មីៗនេះប៉ុណ្ណោះ ។

បើទោះបីជាលោកកំពុងរស់នៅអាមេរិកក៏ដោយ ប៉ុន្តែទាំងលោក ភរិយា និងកូនៗ គឺសុទ្ធតែចូលរួមនៅក្នុងវិស័យសិល្បៈនៅទីនោះផងដែរ ហើយជារឿយៗគ្រួសាររបស់លោកតែងតែជួយជំរុញ និងផ្សព្វផ្សាយសិល្បៈវប្បធម៌ខ្មែរឲ្យបងប្អូនខ្មែរដែលកំពុងរស់នៅទីនោះបានដឹងផងដែរ ៕ (កែសម្រួលដោយ ៖ បុប្ផា)