រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញ លោកស្រី កែវ សុគន្ធា កាលពីថ្ងៃទី១៦ ខែតុលា ឆ្នាំ២០១៩ បានសម្រេចធ្វើការចោទប្រកាន់ជាផ្លូវការលើស្ត្រីម្នាក់ ពីបទ.ឆបោក រួចបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួន ឬមិនឃុំខ្លួន តាមឆន្ទានុសិទ្ធិរបស់ចៅក្រម ។
ស្ត្រីជាប់សង្ស័យខាងលើឈ្មោះ ហេង សេដ្ឋាលីដា អាយុ២៦ឆ្នាំ មានទីលំនៅក្រុងកំពង់ចាម ខេត្តកំពង់ចាម ត្រូវបានកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌ ក្រសួងមហាផ្ទៃឃាត់ខ្លួននៅថ្ងៃទី១៤ ខែតុលា ឆ្នាំ២០១៩ តាមដីកាបញ្ជាឲ្យចូលខ្លួនរបស់លោក កែវ សុធា ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ដែលដឹកនាំដោយលោកឧត្តមសេនីយ៍ទោ ហួម តាំងហឿត អនុប្រធាននាយកដ្ឋាននគរបាលព្រហ្មទណ្ឌ ។
បើតាមសមត្ថកិច្ចបានបង្ហើបឲ្យដឹងថា បណ្តឹងជនរងគ្រោះបានប្តឹងទៅលើឈ្មោះ ហេង សេដ្ឋាលីដា និងប្ដីឈ្មោះ អ៊ាង ម៉េងយូ ដែលបានខ្ចីប្រាក់ប្រមាណជាង៧ម៉ឺនដុល្លារ លុះដល់ថ្ងៃកំណត់មិនបានសងជនរងគ្រោះវិញទេ ហើយថែមទាំងគេចវេសទៀតផង ដូច្នេះទើបជនរងគ្រោះបានដាក់ពាក្យបណ្ដឹងទៅសមត្ថកិច្ចឲ្យចាត់ការលើកូនបំណុលតាមផ្លូវច្បាប់ ។
ក្រោយឃាត់ខ្លួន កម្លាំងសមត្ថកិច្ចបានបញ្ជូនស្ត្រីជាប់សង្ស័យខាងលើទៅកាន់សាលាដំបូងរាជធានីភ្នំពេញតាមនីតិវិធី លុះនៅព្រឹកថ្ងៃទី១៦ ខែតុលា ទើបតំណាងអយ្យការបានធ្វើការចោទប្រកាន់ស្ត្រីរូបនោះជាផ្លូវការ ក្រោមបទ.ឆបោក រួចសំណុំរឿងបានចាត់ទៅខាងចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ៕ (កែសម្រួលដោយ ៖ ធីតា)
ចែករំលែកព័តមាននេះ