ខេត្តកំពង់ឆ្នាំង ៖ រថយន្តដឹកប្រេងមួយគ្រឿងបានបុកនិងកៀររថយន្ដឡិចស៊ីស RX300 មួយគ្រឿង បណ្តាលឲ្យធ្លាក់ចេញពីថ្នល់ជាតិចូលទៅក្នុងស្រែ កាលពីវេលាម៉ោងប្រមាណ២និង៣០នាទីរសៀលថ្ងៃទី១៤ ខែតុលា នៅលើកំណាត់ផ្លូវជាតិលេខ៥ ស្ថិតក្នុងភូមិបន្ទាយមាស…
ខេត្តកំពង់ឆ្នាំង ៖ រថយន្តដឹកប្រេងមួយគ្រឿងបានបុកនិងកៀររថយន្ដឡិចស៊ីស RX300 មួយគ្រឿង បណ្តាលឲ្យធ្លាក់ចេញពីថ្នល់ជាតិចូលទៅក្នុងស្រែ កាលពីវេលាម៉ោងប្រមាណ២និង៣០នាទីរសៀលថ្ងៃ
ទី១៤ ខែតុលា នៅលើកំណាត់ផ្លូវជាតិលេខ៥ ស្ថិតក្នុងភូមិបន្ទាយមាស ឃុំសែប ស្រុកកំពង់ត្រឡាច ។
លោក នន ស៊ីណាត អធិការនគរបាលស្រុកកំពង់ត្រឡាច បានឱ្យដឹងថា រថយន្តដឹកស៊ីទែនប្រេងពាក់ផ្លាកលេខភ្នំពេញ ៣B-៦៦៥១ និងកន្ទុយសណ្ដោងស៊ីទែនប្រេង ពាក់ផ្លាកលេខភ្នំពេញ ៤A-៣៩០១ ធ្វើដំណើរពីខាងត្បូងទៅខាងជើង ។
លុះទៅដល់ចំណុចខាងលើ បានរេចង្កូតទៅបុករថយន្តឡិចសុីសRX ៣០០ ពណ៌ទឹកប្រាក់ ពាក់ផ្លាកលេខ ភ្នំពេញ ២AN-៨៨៥១ បណ្ដាលឱ្យរថយន្ដឡិចស៊ីសធ្លាក់ចូលទៅក្នុងប្រឡាយ តែជាគ្រោះល្អមិនក្រឡាប់ និងមិនបណ្ដាលឱ្យនរណាម្នាក់រងរបួសនោះទេ ។
ក្រោយពេលកើតហេតុ សមត្ថកិច្ចបានទៅពិនិត្យនិងធ្វើការវាស់វែងនៅកន្លែងកើតហេតុ និងដោយមានការសង្ស័យក៏បានត្រួតពិនិត្យទឹកនោម លើអ្នកបើកបររថយន្តដឹកប្រេងឈ្មោះ អ៊ូក មេសា អាយុ២៧ឆ្នាំ មានទីលំនៅភូមិអូរសំបួរ ឃុំក្រាំងអំពិល ស្រុកសំរោងទង ខេត្តកំពង់ស្ពឺ ឃើញមានសារធាតុញៀន ក៏បានឃាត់ខ្លួននិងកសាងសំណុំរឿងបញ្ជូនទៅស្នងការដ្ឋាននគរបាលខេត្តដើម្បីចាត់ការតាមនីតិវិធី ។
ដោយឡែក រថយន្តទាំង២គ្រឿង ត្រូវបានសមត្ថកិច្ចយកទៅរក្សាទុកដើម្បីរង់ចាំការដោះស្រាយតាមផ្លូវ
ច្បាប់ ។ ការឃាត់ខ្លួនអ្នកបើកបររថយន្តដឹកប្រេងនេះគេក៏បានដឹងផងដែរថា មុននេះ១ថ្ងៃគេហទំព័រKhmer Press បានដកស្រង់តាមគណនី ហ្វេសប៊ុកឈ្មោះ Nuttya Tevy ដែលបានបង្ហោះដោយសរសេរថា កុំលេងសើចជាមួយអាយុជីវិតប្តីប្រពន្ធពេកអី ពួកអាចង្រៃបើកឡានធំៗមួយចំនួន សូមគិតដល់អាយុជីវិតគេឯង ជីវិតខ្ញុំ៣នាក់អាឯងយកអីមកសង ។
ការសរសេរបង្ហោះនេះ គណនី Nuttya Tevy ចង់សំដៅថាអ្នកជិះក្នុងរថយន្តឡិចស៊ីសមានគ្នា៣នាក់គឺ ប្តី ប្រពន្ធ និងកូន ត្រូវបានអ្នកបើករថយន្តដឹកប្រេងមានសារធាតុញៀនបុកចំហៀងខាងស្តាំនៃរថយន្តបណ្តាលឱ្យធ្លាក់ផ្លូវ ៕
ចែករំលែកព័តមាននេះ