រាជធានីភ្នំពេញ ៖ យ៉ាងហោចណាស់មនុស្សចំនួន៣នាក់បានរងរបួសធ្ងន់ធ្ងរ និងត្រូវបានបញ្ជូនទៅសង្គ្រោះបន្ទាន់ភ្លាមៗ ខណៈដែលរថយន្តម៉ាកហ៊ីយ៉ាន់ដាយមួយគ្រឿងបើកបរក្នុងល្បឿនលឿនបោះពួយជ្រុលទៅបុកពីក្រោយម៉ូតូកង់បី១គ្រឿងយ៉ាងពេញទំហឹង ។ បន្ទាប់មករុញទៅផ្ទប់ជាមួយរថយន្តម៉ាកឡិចស៊ីស RX-300 មួយគ្រឿងទៀត ដែលកំពុងបើកក្នុងទិសដៅបញ្ច្រាសគ្នាយ៉ាងពេញទំហឹងតែម្ដង ដែលនគរបាលនិយាយថា គ្រោះថ្នាក់នេះគឺបណ្ដាលមកពីការបើកបរមិនគោរពច្បាប់ចរាចរណ៍ ។
ឧប្បត្តិហេតុនេះបានកើតឡើងកាលពីវេលាម៉ោង១និង១៥នាទីរសៀល ថ្ងៃទី១៥ ខែតុលា ឆ្នាំ២០១៩ នៅលើកំណាត់ផ្លូវលេខ២០០៤ ស្ថិតនៅក្នុងភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានឲ្យដឹងថា រថយន្តបង្កម៉ាកហ៊ីយ៉ាន់ដាយខាងលើ ពណ៌ស ពាក់ផ្លាកលេខ ភ្នំពេញ 2AR-6315 ម៉ូតូកង់បី ពណ៌ស ពាក់ផ្លាកលេខ ស្វាយរៀង 1N-7677 រីឯរថយន្ត១គ្រឿងទៀតម៉ាកឡិចស៊ីស RX-300 ពណ៌ស្ករ ពាក់ផ្លាកលេខ ភ្នំពេញ 2AI-1893 ។ ដោយឡែកអ្នកបើកបរយានយន្តទាំង៣គ្រឿងនេះមិនទាន់ត្រូវបានស្គាល់អត្តសញ្ញាណនៅឡើយទេអ្នកដែលរងរបួសទាំង៣នាក់នោះរួមមានអ្នកបើកបរម៉ូតូកង់បីម្នាក់ និងអ្នកជិះក្នុងនោះ២នាក់ ។
នគរបាលបានបន្តថា នៅមុនពេលកើតហេតុរថយន្តម៉ាកហ៊ីយ៉ាន់ដាយបានបើកបរបោះពួយក្នុងល្បឿនលឿនក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុបានជ្រុលទៅបុកម៉ូតូកង់បីដែលប្រុងបត់ឆ្វេងពីក្រោយពេញទំហឹង ព្រមទាំងរុញម៉ូតូកង់បីនេះទៅបុកផ្ទប់ជាមួយរថយន្តម៉ាកឡិចស៊ីស RX-300 មួយគ្រឿងទៀតដែលកំពុងបើកបរក្នុងទិដៅបញ្ច្រាស ទិសគ្នាទាំងកម្រោលបណ្ដាលឲ្យយានយន្តទាំង៣គ្រឿងរងការខូចខាតយ៉ាងដំណំ ។
ចំណែកអ្នកបើកបរម៉ូតូកង់បី និងអ្នកជិះ២នាក់ទៀតរងរបួសធ្ងន់ធ្ងរបន្ទាប់មកត្រូវបានបញ្ជូនទៅសង្គ្រោះបន្ទាន់ភ្លាមៗដែរ ។ ក្រោយពេលកើតហេតុនគរបាលចរាចរណ៍ខណ្ឌពោធិ៍សែនជ័យបានចុះទៅសម្រួលមិនឲ្យមានការកកស្ទះចរាចរណ៍រួចបានប្រគល់ករណីមួយនេះទៅឲ្យខាងនគរបាលការិយាល័យចរាចរណ៍ផ្លូវគោកនៃស្នងការរដ្ឋាននគរបាលរាជធានីភ្នំពេញចាត់ការបន្ត ៕
កែសម្រួលដោយ ៖ សំណាង
ចែករំលែកព័តមាននេះ