អ្នកមិនចាំបាច់មានបិរញ្ញាប័ត្រផ្នែកគ្រប់គ្រង ឬផ្នែកអាជីវកម្មទើបអាចមានគំនិតល្អក្នុងការបើកអាជីវកម្មផ្ទាល់ខ្លួនទេ ។ បច្ចុប្បន្ននេះមានមនុស្សជាច្រើនដែលយកជំនាញ និងចំណាប់អារម្មណ៍ប្លែកៗរបស់ពួកគេទៅចាប់ផ្តើមអាជីវកម្មអនឡាញមួយដែលទទួលបានការគាំទ្រយ៉ាងខ្លាំង ។ ដើម្បីជួយបំផុសគំនិតអ្នក ខាងក្រោមនេះគឺជាឧទាហរណ៍មួយចំនួននៃអាជីវកម្មអនឡាញប្លែកៗដែលជោគជ័យ៖
១. អាជីវកម្មលក់គំនូរ៖ អាជីវកម្មនេះមានឈ្មោះថា I Want to Draw A Cat For You ដែលប្រែមកថា «ខ្ញុំចង់គូររូបឆ្មាមួយឲ្យអ្នក» ។ វាគឺជាគំនិតរបស់លោក Steve Gadlin ដែលគូររូបឆ្មាគ្រប់ទ្រង់ទ្រាយ និងដាក់លក់ឲ្យមនុស្សជុំវិញពិភពលោក ។ លោកបានគិតឃើញគំនិតនេះដើម្បីកម្សាន្តអារម្មណ៍ប៉ុណ្ណោះ ប៉ុន្តែលោកស្រាប់តែមើលឃើញប្រាក់ចំណូលហូរចូល ។ ក្នុងរយៈពេល ៥ឆ្នាំនៃការគូររូបឆ្មាដ៏សាមញ្ញបំផុត លោកលក់គំនូរបានច្រើនជាង ១៨,៧៩៤ផ្ទាំង ទៅទៀតក្នុងតម្លៃមួយប្រមាណ ២៩.៥០ដុល្លារអាមេរិក ។
២. អាជីវកម្មបង្រៀនភាសា៖ លោក Benny Lewis ចំណាយពេលជាច្រើនឆ្នាំក្នុងការរៀនភាសាទីពីរ ហើយវាបានធ្វើឲ្យលោកមិនពេញចិត្តយ៉ាងខ្លាំង ។ មិនថាលោកចូលរួមវគ្គសិក្សា ឬខិតខំរៀនសូត្រដោយខ្លួនឯងច្រើនប៉ុណ្ណាទេ វាប្រៀបដូចជាមិនមានប្រសិទ្ធិភាពឡើយ ។ នៅថ្ងៃមួយ លោកបានបង្កើតយុទ្ធសាស្ត្រមួយដែលជួយឲ្យលោករៀនភាសាអេស្ប៉ាញក្នុងរយៈពេល ៦ខែ ។ ហើយពេលដែលលោកប្រើយុទ្ធសាស្ត្រដដែលដើម្បីរៀនភាសាផ្សេង លោកកាន់តែរៀនចេះក្នុងរយៈពេលខ្លីជាមុនទៅទៀត ។ បច្ចុប្បន្ននេះលោកបង្រៀនអ្នកដទៃបន្តឲ្យប្រើយុទ្ធសាស្ត្ររបស់លោកទោះជាលោកមិនមែនជាអ្នកជំនាញផ្នែកភាសាក៏ដោយ ។
៣. ការហ្វឹកហាត់ការនិយាយស្តី និងជំនឿចិត្ត៖ កញ្ញា Felicia ជាមនុស្សដែលស្រលាញ់ការប្រាស្រ័យទាក់ទងជាមួយអ្នកដទៃ ការលក់ និងការសរសេរ ។ មិនយូរប៉ុន្មានឃើញថាកញ្ញាមានសមត្ថភាពក្នុងការបង្វឹកបង្ហាត់អ្នកដទៃបាន ហើយក៏សម្រេចចិត្តបង្រៀនអ្នកដទៃតាមប្រព័ន្ធអ៊ីនធើណេត ។
កញ្ញាមិនមែនជាអ្នកជំនាញក្នុងវិស័យនេះតែ ប៉ុន្តែកញ្ញាបង្រៀនអ្នកដទៃតាមអ្វីដែលកញ្ញាបានរៀនសូត្រដោយខ្លួនឯងពីការសាកល្បង និងកំហុសឆ្គងដែលធ្លាប់ជួបប្រទះ ។ បច្ចុប្បន្ននេះ កញ្ញារកចំណូលបានដល់ទៅ ១ម៉ឺនដុល្លារឯណោះក្នុងមួយឆ្នាំ ខណៈដែលធ្វើការប្រមាណតែ ៣០ម៉ោងក្នុងមួយសប្តាហ៍ ៕ កែសម្រួលដោយ ៖ សុឃាក់
ចែករំលែកព័តមាននេះ