រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានអះអាងថា ទោះបីជាប្រាក់ខែមន្ត្រីរាជការឡើងដល់កម្រិតណាក៏រាជរដ្ឋាភិបាលមិនយកពន្ធដែរ បើគណបក្សប្រជាជនកម្ពុជានៅដឹកនាំប្រទេស ។ ការបញ្ជាក់របស់សម្តេចតេជោ ហ៊ុន…
រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានអះអាងថា ទោះបីជាប្រាក់ខែមន្ត្រីរាជការឡើងដល់កម្រិតណាក៏រាជរដ្ឋាភិបាលមិនយកពន្ធដែរ បើគណបក្សប្រជាជនកម្ពុជានៅដឹកនាំប្រទេស ។ ការបញ្ជាក់របស់សម្តេចតេជោ ហ៊ុន សែន ក្នុងពិធីជួបកូនក្មួយនិស្សិតខ្មែរនៅ ប្រទេសហុងគ្រី នៅរសៀលថ្ងៃទី១៤ ខែតុលានេះ ។
យោងតាមបណ្តាញសង្គមចេញផ្សាយ នៅថ្ងៃទី១៥ ខែតុលានេះបានឲ្យដឹងថា ក្នុងឱកាសនេះដែរ សម្តេចតេជោ ហ៊ុន សែន បានជម្រាបប្រាប់កូនក្មួយក៏ដូចជា មន្ត្រីរាជការឲ្យបានជ្រាបថា ចំពោះប្រាក់បៀវត្សរ៍អប្បរិមាទោះបីឡើងដល់ណាក៏រដ្ឋាភិបាលអត់យកពន្ធដែរដូចជា ប្រាក់ខែគ្រូបង្រៀនដែលឡើងពី១លាន២សែន ទៅ១លាន៣សែន គឺអត់យកពន្ធទេ ។ ក្រសួងសេដ្ឋកិច្ចនឹងប្រកាសក្នុងច្បាប់ហិរញ្ញវត្ថុជាផ្លូវការ ។
សម្តេចតេជោបានលើកបញ្ជាក់សារជាថ្មី ជម្រាបដល់កូនក្មួយក៏ដូចជា ពលរដ្ឋ ជាពិសេសកសិករឲ្យបានជ្រាបថា ដរាបណាគណបក្សប្រជាជនកម្ពុជានៅតែឈ្នះឆ្នោត ហើយសម្តេចតេជោ នៅតែបន្តដឹកនាំប្រទេសជាតិ គឺ១-រាជរដ្ឋាភិបាលមិនយកពន្ធលើដីស្រែចម្ការរបស់បងប្អូនប្រជាកសិករឡើយ ។ ២- បៀវត្សរ៍អប្បរិមា ទោះបីឡើងដល់ណាក៏អត់ជាប់ពន្ធដែរ ។ សម្តេចតេជោនាយករដ្ឋមន្ត្រី បានកោតសរសើរដល់ក្មួយៗដែលបានមកបន្តការសិក្សានៅក្នុងប្រទេសដែលមានការរីកចម្រើនដូចជា ប្រទេសហុងគ្រីនេះជាដើម ។
តាមការសាកសួរពីសម្តេចតេជោ គឺមាននិស្សិតយើងមកពីខេត្តមួយចំនួនដូចជា ស្វាយរៀង បាត់ដំបង កណ្តាល រតនគិរី បន្ទាយមានជ័យ ភ្នំពេញ និងតាកែវ ។ និស្សិតមួយចំនួនក្រោយពីចប់ការសិក្សាហើយក៏មានការងារធ្វើជាមួយក្រុមហ៊ុនផ្សេងៗនៅទីនេះតែម្តង ។ ភាគច្រើននិស្សិតដែលមករៀននៅទីនេះ គឺមានកម្រិតបរិញ្ញាប័ត្របរិញ្ញាបត្រជាន់ខ្ពស់ និងថ្នាក់បណ្ឌិត ។
សម្តេចតេជោ បានគាំទ្រ និងលើកទឹកចិត្តដល់និស្សិតខ្មែរឲ្យខិតខំរៀនសូត្រគោរពច្បាប់ប្រទេសគេ ហើយបន្តសិក្សាឲ្យបានជ្រៅជ្រះ ប្រសិនបើជួបការលំបាកលើបញ្ហាអ្វីមួយក្នុងពេលសិក្សា គឺរាជរដ្ឋាភិបាលនឹងយកចិត្តទុកដាក់ដោះស្រាយជូនកូនក្មួយនិស្សិតគ្រប់ៗគ្នាដូចជា ចំណុចមួយដែលនិស្សិតស្រីម្នាក់បានលើកឡើង គឺប្រសិនបើសិក្សានៅក្រៅប្រទេសហើយអស់បូក ហើយ ហើយក្នុងកិច្ចសន្យា បើរៀនចប់ហើយត្រូវតែវិលត្រឡប់ទៅកាន់ប្រទេសវិញ ។
ករណីសម្តេចតេជោនឹងដោះស្រាយជូនមិនឲ្យកូនក្មួយនិស្សិតពិបាកទេក្នុងការសិក្សា បើកូនក្មួយត្រូវបន្តការសិក្សាយកថ្នាក់ខ្ពស់ថែមទៀត គឺមិនចាំបាច់វិលទៅប្រទេសវិញឡើយ គឺអាចនៅបន្តការសិក្សាបាន បើមានអាហារូបករណ៍សិក្សាបន្ត ។ ជាមួយគ្នានោះដែរ សម្តេចតេជោនាយករដ្ឋមន្ត្រីបានជម្រាបកូនក្មួយអំពីស្ថិរភាពនយោបាយ សង្គម សេដ្ឋកិច្ចដែលកំពុងជំរុញដល់ការរីកលូតលាស់នៃប្រទេសជាតិ ។ ទន្ទឹមនឹងនេះចំណូលពន្ធក៏មានការកើនឡើងគួរជាទីមោទនៈផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ