ពេលដែលអ្នកឃើញតារាចម្រៀងកូរ៉េ ឬ K-Pop អ្នកតែងតែមើលឃើញការតុបតែងខ្លួនដ៏ទាក់ទាញ និងការស្លៀកពាក់ស្អាតៗ ដែលធ្វើឲ្យមនុស្សភាគច្រើនគិតថាពួកគេមានជីវភាពដ៏ធូរធារ ។ ប៉ុន្តែយោងទៅតាមអតីតតារាចម្រៀង K-Pop គឺលោក…
ពេលដែលអ្នកឃើញតារាចម្រៀងកូរ៉េ ឬ K-Pop អ្នកតែងតែមើលឃើញការតុបតែងខ្លួនដ៏ទាក់ទាញ និងការស្លៀកពាក់ស្អាតៗ ដែលធ្វើឲ្យមនុស្សភាគច្រើនគិតថាពួកគេមានជីវភាពដ៏ធូរធារ ។ ប៉ុន្តែយោងទៅតាមអតីតតារាចម្រៀង K-Pop គឺលោក ព្រីន ម៉ាក (Prince Mak) បានឲ្យដឹងថា មានតារាតិចតួចណាស់ដែលពិតជាមានថវិការស់នៅជីវភាពបែបនោះ ។
លោកធ្លាប់ជាសមាជិកក្រុមចម្រៀង JJCC ដែលជាក្រុមដែលលោក ចេគី ចាន់ (Jackie Chan) បង្កើតឡើង ។ លោកបានចែករំលែកពីបទពិសោធន៍របស់លោកក្នុងវិដេអូមួយដែលលោកបានបង្ហោះលើ YouTube ។
អតីតតារាចម្រផងនេះបានបកស្រាយថា មានតែតារានៅក្រោមការគ្រប់គ្រងរបស់ក្រុមហ៊ុនធំៗទាំងបីគឺ SM, YG និង JYP ប៉ុណ្ណោះដែលចាប់ផ្តើមរកប្រាក់ចំណូលបានភ្លាមពេលដែលចេញច្រៀងដំបូង ។
ក្រុមហ៊ុនកូរ៉េភាគច្រើនមានប្រព័ន្ធចែកប្រាក់ចំណូលស្មើៗគ្នាដែលមានន័យថារាល់ចំណូលដែលតារារកបានត្រូវសងថវិកាវិនិយោគលើពួកគេជាមុនសិនដូចជាការហ្វឹកហាត់ អាហារ ការសា្នក់នៅ បុគ្គលិក និងថ្លៃផលិតបទចម្រៀងជាដើម ។ លោកបានបន្ថែមថា ក្រុមតារាដែលទើបតែចេញដំបូងជាមធ្យមរកប្រាក់ចំណូលបាន ៤ពាន់ដុល្លារសម្រាប់មួយកម្មវិធី ប៉ុន្តែ ៩០% នៃថវិកានោះនឹងត្រូវឲ្យទៅក្រុមហ៊ុន ខណៈដែល ១០% ទៅសម្រាប់តារាចម្រៀង ។ លើសពីនេះទៅទៀត ១០% ដែលបានមកត្រូវចែកជាមួយនឹងសមាជិកទាំងអស់ក្នុងក្រុមទៀត ហើយពួកគេត្រូវសងថ្លៃវិនិយោគទៅក្រុមហ៊ុនទៀត ។
លោកបានលើកពីក្រុមតារាស្រី AOA ដែលបានចេញច្រៀងតាំងពីឆ្នាំ ២០១២ តែទើបតែសងថ្លៃវិនិយោគក្រុមហ៊ុនអស់ក្នុងឆ្នាំ ២០១៥ ប៉ុណ្ណោះ និងចាប់ផ្តើមរកប្រាក់ចំណូលបាន ។ ប៉ុន្តែលោកបានបញ្ជាក់ម្តងទៀតថា តារាដែលមកពីក្រុមហ៊ុនធំៗទាំងបីខាងលើមិនជួបប្រទះនឹងបញ្ហាច្រើនទេ គឺតារាដែលមកពីក្រុមហ៊ុនតូចៗប៉ុណ្ណោះដែលជួបប្រទះនឹងបញ្ហាច្រើនក្នុងការរកប្រាក់ចំណូល ។ ដូច្នេះចូរចងចាំថា ភាពឡូយឆាយ និងស៊ីវិល័យដែលអ្នកមើលឃើញនេះពេលខ្លះមិនបង្ហាញពីជីវភាពរស់នៅរបស់តារាដែលអ្នកគាំទ្រឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ