មូលហេតុនៅពីក្រោយការចូលនិវត្តន៍មុនគ្រោងទុករបស់កំពូលមហាសេដ្ឋី Bill Gates
លោកមហាសេដ្ឋី Bill Gates បានលះបង់ជីវិតរបស់លោកសម្រាប់ក្រុមហ៊ុនដែលលោក និងលោក Paul Allen បានបង្កើតមកក្នុងឆ្នាំ ១៩៧៥ តាំងពីលោកនៅជាយុវជនមួយរូប…
លោកមហាសេដ្ឋី Bill Gates បានលះបង់ជីវិតរបស់លោកសម្រាប់ក្រុមហ៊ុនដែលលោក និងលោក Paul Allen បានបង្កើតមកក្នុងឆ្នាំ ១៩៧៥ តាំងពីលោកនៅជាយុវជនមួយរូប…
លោកមហាសេដ្ឋី Bill Gates បានលះបង់ជីវិតរបស់លោកសម្រាប់ក្រុមហ៊ុនដែលលោក និងលោក Paul Allen បានបង្កើតមកក្នុងឆ្នាំ ១៩៧៥ តាំងពីលោកនៅជាយុវជនមួយរូប ។ លោកបាននិយាយលើ Blog របស់លោកថា លោកមិនដែលគិតថាលោកមានថ្ងៃចូលនិវត្តន៍មុនការគ្រោងទុកឡើយពេលដែលលោកនៅវ័យក្មេង ។
ពេលដែលលោកមានអាយុខ្ទង់ ២០ឆ្នាំ លោកតែងតែលះបង់ពេលវេលា និងកម្លាំងដែលលោកមានសម្រាប់ក្រុមហ៊ុន Microsoft ។ លោកបានចែករំលែកលើកម្មវិធី Inside Bill’s Brain ថា លោកមិនដែលមានថ្ងៃចុងសប្តាហ៍ ឬថ្ងៃឈប់សម្រាកឡើយ ។ ប៉ុន្តែពេលដែលលោកមានអាយុពាក់កណ្តាលខ្ទង់ ៤០ឆ្នាំ ទស្សនៈរបស់លោកបានផ្លាស់ប្តូរ និងបើកទូលាយជាងមុន ។
នៅឆ្នាំ ២០០០ លោក និងភរិយាគឺអ្នកស្រី Melinda Gates បានបង្កើតមូលនិធិមួយដែលព្យាយាមកាត់បន្ថយវិសមភាពជុំវិញពិភពលោក ។ ពួកគេថែមទាំងបរិច្ចាគភាគហ៊ុន Microsoft ប្រមាណ ២០ ប៊ីលានដុល្លារទៅកាន់មូលនិធិនេះ និងចាប់ផ្តើមធ្វើដំណើរទៅបរទេសដើម្បីសិក្សាពីបញ្ហាសុខភាពក្នុងប្រទេសក្រីក្រជាដើម ។ ពេលដែលលោកកាន់តែចូលរួមក្នុងកិច្ចការរបស់មូលនិធិ លោកកាន់តែយល់ដឹងថា អាជីពរបស់លោកនៅថ្ងៃអនាគតនឹងមិនទាក់ទិននឹងផលិតផល Software ទៀតទេ ។
នៅឆ្នាំ ២០០១ ពេលដែលលោកមហាសេដ្ឋី Warren Buffett បានអញ្ជើញលោកឲ្យទៅចែករំលែកជាមួយក្រុមអ្នកដឹកនាំអាជីវកម្មពីដំណើរទៅបរទេសរបស់លោក លោក Gates ចាប់អារម្មណ៍ថាខ្លួនមានកម្លាំងយ៉ាងខ្លាំងពេលដែលនិយាយពីប្រធានបទនេះ ។
លោកបានបកស្រាយថា ការចែករំលែកនោះបានអនុញ្ញាតឲ្យលោកមើលឃើញជីវិតរបស់លោកកាន់តែច្បាស់បន្ទាប់ពីក្រុមហ៊ុន Microsoft របស់លោក ហើយវាទាក់ទិននឹងកិច្ចការដែលលោក និងអ្នកស្រី Melinda បានចាប់ផ្តើម ។
លោក Gates បានសម្រេចចិត្តចាកចេញពី Microsoft ជិត ១០ ឆ្នាំមុនការគ្រោងទុករបស់លោក ហើយការចែករំលែកនៅឆ្នាំ ២០០១ គឺជាជំហានមួយដែលជួយឲ្យលោកឈានមកធ្វើការសម្រេចចិត្តនេះ ៕
ប្រភព ៖ cnbc , កែសម្រួលដោយ ៖ សំណាង
ចែករំលែកព័តមាននេះ