ខេត្តបាត់ដំបង៖ អគ្គិភ័យមួយដែលគេសង្ស័យ បណ្ដាលមកពីការទុស្សេខ្សែចរន្តអគ្គិសនី បានឆេះរោងម៉ាស៊ីនកិនស្រូវមួយកន្លែង កាលពីវេលាម៉ោង៤ទៀបភ្លឺថ្ងៃទី១៤ តុលា នេះ នៅក្នុងភូមិខ្នាចរមាស ឃុំខ្នាចរមាស ស្រុកបវេល ដែលធ្វើខូចខាតអស់ស្រូវប្រមាណ៧០តោន និងសម្ភារជាច្រើនទៀត។
យោងតាមរបាយការណ៍សមត្ថកិច្ចថា រោងម៉ាស៊ីននោះមានទំហំ២៥ម៉ គុណ៦០ម៉ ដែលមានម្ចាស់ឈ្មោះ
លឹម លាង ភេទប្រុស អាយុ៧៣ឆ្នាំ រស់នៅភូមិ-ឃុំ កើតហេតុខាងលើ ។ របាយការណ៍ដដែលបានឱ្យដឹងទៀតថា អគ្គិភ័យនោះទំនងបណ្ដាលមកពីឆ្លងចរន្តអគ្គីសនីហើយទុស្សេបង្កជាអគ្គីភ័យឆេះតែម្ដង ដោយបានឆាបឆេះអស់ផ្នែកខ្លះនៃរោងម៉ាស៊ីន និងឆេះម៉ាស៊ីនកិនស្រូវ រួមទាំងឡសម្ងួតស្រូវផង។
បើតាមលោកលឹម លាង ថៅកែម៉ាស៊ីនកិនស្រូវ បានរាយការណ៍ប្រាប់សមត្ថកិច្ចថា ស្រូវយ៉ាងតិចចំនួន៧០តោនបានរងការខូចខាត តែភាគច្រើនខូចខាតដោយសារបាញ់ទឹកពន្លត់, ម៉ាស៊ីនផលិតអង្ករនិងកន្ទក់០១ គ្រឿង និងឆេះឡសម្ងួតអស់០១គ្រឿងដែរ ដែលសរុបជាទឹកប្រាក់ខាតបង់ប្រហែលចំនួន៥ម៉ឺនដុល្លារ ។
សមត្ថកិច្ចបាននិយាយថា អគ្គិភ័យនេះ បានឆេះផ្នែកខ្លះនៃរោងម៉ាស៊ីន ដែលការប៉ាន់ប្រមាណអស់ប្រហែល២០% តែត្រូវបានរថយន្តពន្លត់អគ្គីភ័យរបស់អធិការស្រុកបវេលផង និងរថយន្តអធិការស្រុកថ្មគោលផង ជួយអន្តរាគមន៍បាញ់ទឹកពន្លត់ទាន់ពេល។ បើមិនដូច្នេះទេ អគ្គិភ័យអាចលេត្របាក់រោងម៉ាស៊ីននេះទាំងស្រុងតែម្ដង ។
ចែករំលែកព័តមាននេះ