រាជធានីភ្នំពេញ ៖ មន្ដ្រីជាន់ខ្ពស់របស់គណ កម្មាធិការជាតិអូឡាំពិកកម្ពុជា(NOCC) បានបង្ហាញនូវការជឿជាក់ខ្ពស់ ក្នុងការរក្សានូវកំណើនអ្នកចូលរួមទិវារត់ប្រណាំងពាក់កណ្តាលម៉ារ៉ាតុងអង្គរលើកទី២៤ នាថ្ងៃទី៨ ខែធ្នូ ឆ្នាំ២០១៩ ដោយមិនបារម្ភរឿងធ្លាក់ចុះអ្នកចូលរួមឡើយ។…
រាជធានីភ្នំពេញ ៖ មន្ដ្រីជាន់ខ្ពស់របស់គណ កម្មាធិការជាតិអូឡាំពិកកម្ពុជា(NOCC) បានបង្ហាញនូវការជឿជាក់ខ្ពស់ ក្នុងការរក្សានូវកំណើនអ្នកចូលរួមទិវារត់ប្រណាំងពាក់កណ្តាលម៉ារ៉ាតុងអង្គរលើកទី២៤ នាថ្ងៃទី៨ ខែធ្នូ ឆ្នាំ២០១៩ ដោយមិនបារម្ភរឿងធ្លាក់ចុះអ្នកចូលរួមឡើយ។ នេះបើតាមការបញ្ជាក់របស់លោក វ៉ាត់ ចំរើន អគ្គលេខាធិការ NOCC ក្នុងសន្និសីទសារព័ត៌មាន កាលពីថ្ងៃទី១០ ខែតុលា ។
ការបង្ហាញពីសុទិដ្ឋិនិយមបែបនេះ ដោយ សារលោកជឿជាក់លើសក្ដានុពលរបស់ខេត្តសៀមរាប ពិសេសតំបន់អង្គរដែលជាតំបន់បេតិកភណ្ឌពិភពលោក និងជាកន្លែងដ៏ល្អឯកសម្រាប់រៀបចំព្រឹត្តិការណ៍កីឡា និងទេសចរណ៍ ។ ដូច្នេះភ្ញៀវទេសចរទាំងជាតិនិងអន្ដរជាតិ នៅតែចាប់ អារម្មណ៍ចំពោះព្រឹត្តិការណ៍រត់ពាក់កណ្ដាលម៉ារ៉ាតុងនៅអង្គរវត្ត ខណៈបច្ចុប្បន្នមានអ្នកចុះឈ្មោះ ជិត៤០០នាក់ហើយ ។
កាលពីឆ្នាំ២០១៨ ដែលជាឆ្នាំដំបូងនៃព្រឹត្តិការណ៍នេះ មានអ្នករត់ជាង១០.៥០០នាក់។ ប៉ុន្ដែឆ្នាំនេះគណៈកម្មការមានការជឿជាក់ថា ក៏មិនក្រោម១ម៉ឺននាក់ដែរ តែគឺមានតែកើនជាងនេះ ។ ការអះអាងបែបនេះ ដោយសារសន្ទុះក្នុងការចុះឈ្មោះក្នុងរយៈពេលដូចគ្នាកាលពីឆ្នាំ២០១៨ និងឆ្នាំ២០១៩ គឺប្រហាក់ប្រហែលគ្នា ។ ហេតុនេះ លោកសូមអំពាវនាវដល់ភ្ញៀវជាតិនិងអន្ដរជាតិ ចុះឈ្មោះឲ្យបានរួសរាន់ ដើម្បីងាយស្រួលគណៈកម្មការរៀបចំ ។
ជាមួយគ្នានេះ លោក សែម ផល្លា នាយកប្រតិបត្តិព្រឹត្តិការណ៍កីឡានិងទេសចរណ៍បញ្ជាក់ថា ឆ្នាំនេះគណៈកម្មការបានត្រៀមរួចជាស្រេច ដើម្បីទទួលអ្នកចូលរួមលើសពី១ម៉ឺននាក់ ។ ប៉ុន្ដែបើផ្អែកលើចំនួនជាក់ស្ដែង អ្នកចុះឈ្មោះនៅមានកម្រិត ព្រោះភាគច្រើនអ្នកចូលរួមច្រើនសម្រុកចុះឈ្មោះអំឡុង១ខែមុនព្រឹត្តិការណ៍ ។ ដូច្នេះលោកសូមអំពាវនាវជាថ្មី ដោយស្នើឲ្យអ្នកមានបំណងចូលរួមទាំងខ្មែរនិងបរទេស រួសរាន់ចុះឈ្មោះព្រោះសម្ភារក៏មានកំណត់ដែរ ។
គួរបញ្ជាក់ថា ទិវារត់ពាក់កណ្ដាលម៉ារ៉ាតុងអង្គរនេះ ត្រូវបានជំរុញឲ្យបង្កើតដោយក្រសួង ទេសចរណ៍ ដោយមានការយកចិត្តទុកដាក់ជាខ្លាំងពីរាជរដ្ឋាភិបាលកម្ពុជា ហើយបានផ្ដល់សេចក្ដីទុកចិត្តឲ្យ NOCC ក្នុងការរៀបចំ ក្នុងគោលបំណងដើម្បីសកម្មភាពមនុស្សធម៌ ពោលគឺថវិកាទទួលបានពីការរៀបចំនឹងត្រូវបរិច្ចាគជួយដល់មន្ទីរពេទ្យកុមារ កុមារកំព្រា និងជនពិការដោយគ្រប់មីននៅកម្ពុជា ៕ (កែសម្រួលដោយ ៖ បុប្ផា)
ចែករំលែកព័តមាននេះ