រាជធានីភ្នំពេញ៖ ក្រុមព្រះសុរិយាបានចាត់ទុកការប្រមូលឯកសារភាពយន្តដែលបាត់បង់ក្នុងសម័យសង្គ្រាមប្រៀបដូចរាវមុជក្នុងបាតសមុទ្រ ខណៈពេលឯកសារភាពយន្តមុនឆ្នាំ១៩៧៥ទាំងអស់នោះបានបាត់បង់ស្ទើរគ្មានសស់ សូម្បីតែសិល្បករ ផលិតករក៏ត្រូវបាត់ជីវិតក្រោមបាតដៃខ្មៅនៃពួកខ្មែរក្រហមដែរ នៅសល់សិល្បករមួយចំនួនតូចបានរត់ភៀសខ្លួនទៅប្រទេសទី៣ ។
រយៈពេលជិត១០ឆ្នាំក្នុងបេសកកម្មដ៏លំបាកក្រុមព្រះសុរិយាបានកកាយស្រាវជ្រាវប្រមូលមរតកភាពយន្តក្នុងយុគមាសគឺមុនឆ្នាំ១៩៧៥នៅគ្រប់ទិសទីក្នុងប្រទេសកម្ពុជា និងនៅបរទេស ដោយចំណាយប្រាក់ផ្ទាល់ខ្លួន ។ ការតស៊ូពិតជាមិនឥតប្រយោជន៍ឡើយ ខ្សែភាពយន្តប្រមាណជាង១០ភាគនៃខ្សែភាពយន្តសរុបជាង៥០០រឿងត្រូវបានរកឃើញ និងបានដាក់បញ្ចាំងនៅក្នុងកម្មវិធី ធំៗរបស់ក្រុមព្រះសុរិយាដែលបានរៀបចំបន្តបន្ទាប់តាំងពីឆ្នាំ២០១២ ។
ក្នុងបំណងដាក់បង្ហាញភាពយន្តឡើងវិញ ដើម្បីជាការរំលឹកអនុស្សាវរីយ៍ ល្អៗនិងចែករំលែកស្នាដៃរៀមច្បងក្នុងយុគមាសជូនយុវជនជំនាន់ក្រោយ រួមទាំងលើកតម្កើងស្នាដៃសម្បត្តិបេតិកភណ្ឌជាតិ ក្រុមព្រះសុរិយាបានបង្កើតព្រឹត្តិការណ៍ដ៏ធំមួយឈ្មោះថា «មួយម៉ឺនអាល័យ» ។
កម្មវិធីមួយម៉ឺនអាល័យ នេះរៀបចំឡើងដោយក្រុមព្រះសុរិយា និងមានកិច្ចសហការគាំទ្រពីក្រសួងវប្បធម៌ និងវិចិត្រសិល្បៈ ស្ថាប័នព្រះមហាក្សត្រ ស្ថាប័នព្រឹទ្ធសភា និងស្ថាប័នរដ្ឋជាច្រើនទៀត ។
ជារៀងរាល់ឆ្នាំក្រៅពីការបញ្ចាំងខ្សែភាពយន្តដ៏កម្រដែលក្រុមព្រះសុរិយាបានរកឃើញ កម្មវិធីនេះក៏មានការបង្ហាញវត្ថមានដ៏ពិសេសនៃតារារៀមច្បងនាទសវត្សឆ្នាំ៦០និង៧០ដែលនៅរស់រានមានជីវិត ជាកិត្តិយសសម្រាប់មហាជនអ្នកចូលរួមក្នុងពិធីនេះ ដោយមានសំណាងបានជួបពួកគាត់ផ្ទាល់ រួមទាំងមានការសម្តែងផ្ទាំងទស្សនីយភាព និងការបង្ហាញម៉ូដដោយយុវជនជំនាន់ថ្មីនេះ ។ ព្រឹត្តិការណ៍ភាពយន្តជាប្រវត្តិសាស្ត្រនេះបានរៀបចំបួនលើក៤រួចមកហើយ ។
នៅឆ្នាំ២០១៩នេះ កម្មវិធីមួយម៉ឺនអាល័យលើកទី៥ បង្ហាញខ្សែភាពយន្តខ្មែរដ៏កម្រចំនួនបីរឿង ជាកាដូដ៏ពិសេសបំផុតដែលមហាជនជននិងអន្តរជាតិអាចចូលរួមទស្សនាដោយឥតគិតថ្លៃ។ លោកយាង វណ្ឌី ប្រធានក្រុមព្រះសុរិយា និងអ្នកដឹកនាំរៀបចំកម្មវិធីបានលើកឡើងថា៖ នៅក្នុងឆ្នាំនេះកម្មវិធីមួយម៉ឺនអាល័យលើកទី៥នាំនូវអ្វីដែលថ្មីនឹងពិសេសសម្រាប់ទស្សនិកជនអ្នកចូលរួម ដោយមានការដាក់បញ្ចាំងខ្សែភាពយន្តខ្មែរចំនួនបីរឿង ដែលខ្សែភាពយន្តខ្មែរទាំងបីនេះបានកប់ទុកអស់រយៈពេលជាង៤០ឆ្នាំមកហើយនៅក្នុងទឹកដីនៃប្រទេសថៃ ។
ខ្សែភាពយន្តទាំងបីនោះរួមមាន រឿងកាកី , រឿងពិជ័យវង្សា និងរឿងខ្យងស័ង្ខ។ កាលពីឆ្នាំ២០១៨ និងនៅខែមិថុនា ឆ្នាំ២០១៩កន្លងទៅថ្មីៗនេះ ក្រុមព្រះសុរិយាបានទិញខ្សែភាពយន្តទាំងនោះត្រឡប់មករក្សាជាមរតកដ៏មានតម្លៃ ហើយចែករំលែកខ្សែភាពយន្តទាំងនោះដោយដាក់បញ្ចាំងជូនសាធារណជនបានចូលរួមទស្សនាដោយឥតគិតថ្លៃ នៅក្នុងកម្មវិធីមួយម៉ឺនអាល័យប្រចាំឆ្នាំ២០១៩នេះ ។
លោកស្រីឌី សាវ៉េត តារាភាពយន្តខ្មែរទសវត្សឆ្នាំ៦០ និងជាតួឯកស្រី ក្នុងខ្សែភាពយន្តរឿងខ្យងស័ង្ខបានសម្តែងក្តីរំភើបឥតឧបមាដោយលោកស្រីមិននឹកស្មានថាលោកស្រីមានភ័ព្វវាសនាជាថ្មីម្តងទៀតបានទស្សនាខ្សែភាពយន្តរឿងខ្យងស័ង្ខ និងរឿងដទៃទៀតនៅក្នុងកម្មវិធីមួយម៉ឺនអាល័យលើកទី៥នេះឡើយ នៅក្រោយពេលដែលលោកស្រីពុំដែលបានឃើញខ្សែភាពយន្តទាំងនោះអស់រយៈពេលជាង៤០ឆ្នាំបន្ទាប់ពីរបបខ្មែរក្រហមនោះមក ។ លោកស្រីបានថ្លែងសរសើរដោយស្មោះពីទឹកចិត្តរបស់ក្រុមព្រះសុរិយាដែលព្យាយាមកកូរកាយស្រាវជ្រាវរកឯកសារភាពយន្តទាំងនោះមកគ្រប់ទីកន្លែង ។
លោកជំទាវសុខ ស៊ីថន ជំនួយការសម្តេចតេជោនាយករដ្ឋមន្ត្រី និងជាអនុប្រធានកិត្តិយសនៃក្រុមព្រះសុរិយា ដែលបានចូលរួមជួយស្វែងរកអ្នកឧបត្ថម្ភដល់កម្មវិធីនាឆ្នាំនេះ បានថ្លែងអំពាវនាវដល់មហាជនទាំងអស់ចូលរួមក្នុងកម្មវិធីមួយម៉ឺនអាល័យលើកទី៥នេះដើម្បីដកបទពិសោធន៍ និងផ្សាយពីគុណសម្បត្តិរបស់ភាពយន្តខ្មែរនាទសវត្សឆ្នាំ៦០ និង៧០ដែលជាមេរៀនដ៏ល្អសម្រាប់អភិវឌ្ឈន៍ វិស័យសិល្បៈភាពយន្ត និងផ្សព្វផ្សាយនូវវប្បធម៌ ល្អៗដែលខ្មែរធ្លាប់មានពីអតីតកាល ។
កម្មវិធីមួយម៉ឺនអាល័យ ជាព្រឹត្តិការណ៍រំលឹកមរតកស្នាដៃភាពយន្តខ្មែរដ៏ធំប្រចាំប្រទេសកម្ពុជា ដែលបានរៀបចំឡើងដោយ ក្រុមព្រះសុរិយា តាំងពីឆ្នាំ២០១៦ ដែលកម្មវិធីនេះបានប្រព្រឹត្តឡើងបួនដងរួចមកហើយ ដោយទទួលបានជោគជ័យគួរឲ្យកត់សម្គាល់។ សម្រាប់ឆ្នាំ២០១៩នេះ កម្មវិធីមួយម៉ឺនអាល័យលើកទី៥ ប្រព្រឹត្តទៅរយៈពេលបីថ្ងៃ ពីថ្ងៃទី២២ ដល់ ថ្ងៃទី២៤ ខែតុលា ឆ្នាំ២០១៩ នាមជ្ឈមណ្ឌលសហប្រតិបត្តិការកម្ពុជា-កូរ៉េ ក្នុងបរិវេណសាកលវិទ្យាល័យភូមិន្ទភ្នំពេញ ដោយមហាជនអ្នកចូលរួមទស្សនាដោយឥតគិតថ្លៃ ៕ (កែសម្រួលដោយ ៖ បុប្ផា)
ចែករំលែកព័តមាននេះ