បំបែកសំណុំរឿងបានហើយ ករណីឃាតកម្មរំលោភសម្លាប់ស្ត្រីម្នាក់

ថ្ងៃទី ១១ ខែ តុលា ឆ្នាំ ២០១៩
ម៉ោង ១៧:០៣
ឃឹម ប៊ុនណាក់

ខេត្តព្រះសីហនុ ៖ យោងតាមរបាយការណ៍បឋមរបស់សមត្ថកិច្ចបានឱ្យដឹងថា ក្រោមការដឹកនាំចង្អុលបង្ហាញពីលោកឧត្ដមសេនីយ៍ទោ ជួន ណារិន្ទ ស្នងការនគរបាលខេត្ដ ដោយមានការដឹកនាំដោយផ្ទាល់ពីលោកឧត្ដមសេនីយ៍ត្រី កុល ផាលី ស្នងការរងទទួលផែននគរ បាលព្រហ្មទណ្ឌ និងដោយមានការសម្របសម្រួលនីតិវិធីពីលោក សៀង សុខ ព្រះរាជអាជ្ញា អមសាលាដំបូងខេត្ដព្រះសីហនុ កាលពីវេលាម៉ោង៣រសៀលថ្ងៃទី៩ តុលា ឆ្នាំ២០១៩ ការិយាល័យនគរបាលព្រហ្មទណ្ឌកម្រិតធ្ងន់ បានបំបែកសំណុំរឿងករណីឃាតកម្មរំលោភសម្លាប់ស្ត្រីម្នាក់កាលពីវេលាម៉ោង៦និង៣០នាទីថ្ងៃទី១៨ កក្កដា ២០១៩ នៅក្រុមទី១១ ភូមិ៣ សង្កាត់៣ ក្រុងព្រះសីហនុ ខេត្ដព្រះសីហនុ ដោយបានធ្វើការឃាត់ខ្លួនជនសង្ស័យម្នាក់ ។

ជនសង្ស័យម្នាក់ខាងលើឈ្មោះ សួង ភិន ហៅធួន ភេទប្រុស អាយុ៣០ឆ្នាំ មុខរបរជាងសំណង់ផ្នែករៀបឥដ្ឋ មានស្រុកកំណើត ភូមិស្វាយក្រោម ឃុំត្រដេស ស្រុកកំពង់ ត្រឡាច ខេត្ដកំពង់ឆ្នាំង ស្នាក់នៅមិនពិតប្រាកដ (ត្រូវជាសង្សាររបស់ស្ត្រីរងគ្រោះ) ។ ចំណែកស្ត្រីរងគ្រោះមានអាយុ២៩ឆ្នាំ មានស្រុកកំណើតនៅស្រុកព្រៃវែង ខេត្ដព្រៃវែង ស្នាក់នៅបណ្ដោះអាសន្នក្នុងការដ្ឋានសំណង់មួយកន្លែង ក្នុងក្រុងព្រះសីហនុ ខេត្ដព្រះសីហនុ ។

តាមការស្រាវជ្រាវ និងចម្លើយរបស់ជនសង្ស័យបានឱ្យដឹងថា ១-ជនសង្ស័យបានកុហកគេថាខ្លួនចេញពីការដ្ឋានសំណង់តាំងពីថ្ងៃទី៥ កក្កដា ឆ្នាំ២០១៩ ការពិតគឺចេញពីការដ្ឋានសំណង់ខេត្ដព្រះសីហនុទៅភ្នំពេញនៅថ្ងៃទី៨ កក្កដា ឆ្នាំ២០១៩ ។

២-ជនសង្ស័យឆ្លើយថា មិនដែលត្រឡប់មកខេត្ដព្រះសីហនុវិញទេ គឺខ្លួនមកនៅពេលដែលសមត្ថកិច្ចនគរបាលទូរស័ព្ទហៅអោយចូលបំភ្លឺតែប៉ុណ្ណោះ ការពិតជនសង្ស័យត្រឡប់មកខេត្ដព្រះសីហនុវិញកាលពីវេលាម៉ោង៩ ឬម៉ោង១០យប់ថ្ងៃទី១០ កក្កដា ឆ្នាំ២០១៩ ហើយនៅជាមួយនឹងស្ត្រីរងគ្រោះក្នុងការដ្ឋានសំណង់ ដោយស្ត្រីរងគ្រោះពាក់រ៉ូបព៌ណសទៀតផង ។

៣-ក្រោយពេលកើតហេតុ កាលពីវេលាម៉ោង៦និង៣០នាទីថ្ងៃទី២៣ កក្កដា ២០១៩ ជនសង្ស័យបានរៀបចំផែនការភូតកុហកសមត្ថកិច្ច ដោយខ្លួនបានទូរស័ព្ទមកប្អូនស្រីរបស់ខ្លួនឈ្មោះដានី ដោយខ្លួនចង់ជួបជាមួយមេកាសំណង់ ហើយបាននិយាយជាមួយមេកាថាបើសមត្ថកិច្ចសួរ ឲ្យប្រាប់ថា ខ្លួនឈប់ធ្វើការតាំងពីថ្ងៃទី៣០ ឧសភា ឆ្នាំ២០១៩ មកម្ល៉េះ ។ ៤-ចម្លើយរបស់ជនសង្ស័យមានការលាក់លៀមជាមួយនឹងសមត្ថកិច្ច ។

៥-នៅថ្ងៃទី១០ កក្កដា ឆ្នាំ២០១៩ គឺជាថ្ងៃដែលស្ត្រីរងគ្រោះមានជម្លោះក្នុងក្រុមគ្រួសារ បានប្រាប់ឈ្មោះ សួង ភិន ថា មានគេចូលមកស្ដីដណ្ដឹង ហើយចាកចេញពីកន្លែងស្នាក់ជាមួយបងស្រីក្នុងការដ្ឋានសំណង់ក្នុងក្រុងព្រះសីហនុ ។ តាមរយៈទិន្នន័យទូរស័ព្ទហៅចេញ-ចូលឃើញថាមានភាពមិនប្រក្រតី ដោយជនសង្ស័យបានទូរស័ព្ទទៅស្ត្រីរងគ្រោះចំនួន៩ដង(ចាប់ពីម៉ោង៥និង៣៩នាទី រហូតដល់ម៉ោង៧និង៥២នាទីយប់ថ្ងៃទី១០ កក្កដា ២០១៩ ) ។ រីឯស្ត្រីរងគ្រោះមិនបានហៅត្រឡប់ទៅវិញទេ គឺបានទូរស័ព្ទទៅប្អូនស្រីរបស់ជនសង្ស័យ ចំនួន២លើក តែគ្មានអ្នកទទួល ។

តាមការចង្អុលបង្ហាញរបស់សាក្សី និងភស្ដុតាងដែលសមត្ថកិច្ចបានដំណើរការនីតិវិធីប្រទល់មុខរវាងជនសង្ស័យ និងសាក្សី ពិនិត្យឃើញមានភាពមិនប្រក្រតីមួយចំនួនពាក់ព័ន្ធនឹងជនសង្ស័យឈ្មោះ សួង ភិន ហៅធួន ជុំវិញករណីឃាតកម្មរំលោភសម្លាប់ខាងលើ ។ សមត្ថកិច្ចអាចសន្និដ្ឋានបានថា ជនសង្ស័យមានគំនិតគិតទុកមុនក្នុងការរំលោភសម្លាប់ស្ត្រីរងគ្រោះខាងលើពិតប្រាកដមែន ។ ជនសង្ស័យជាជនរឹងរូសមិនព្រមសារភាពកំហុសដែលខ្លួនប្រព្រឹត្ដ ។ ជនសង្ស័យបានដឹងថាស្ត្រីរងគ្រោះដែលខ្លួនស្រឡាញ់ មានគេចូលស្ដីដណ្ដឹង ទើបបណ្ដាលឲ្យមានគំនុំ ។

បច្ចុប្បន្ន ជនសង្ស័យត្រូវបានកម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ បំពេញបែបបទតាមនីតិវិធីបញ្ជូនទៅកាន់សាលាដំបូងខេត្ដព្រះសីហនុ ផ្ដន្ទាទោសតាមផ្លូវច្បាប់ ៕ (កែសម្រួលដោយ ៖ ធីតា)