ខេត្តប៉ៃលិន ៖ បុរសម្នាក់ក្នុងទឹកមុខសប្បាយរីករាយ ពេលឃើញម៉ូយតាមផ្លូវហៅទិញធ្យូង ខណៈគាត់ដឹកធ្យូងតាមគោយន្តកន្ត្រៃលក់អស់ត្រឹមតែរយ:ពេលមិនដល់មួយព្រឹកផងនោះ ហើយប្រញាប់ប្រញាល់ត្រឡប់ទៅផ្ទះវិញ ដើម្បីបន្តដើររកទិញធ្យូងបន្ថែមទៀតពីឡរបស់ប្រជាពលរដ្ឋដែលប្រកបមុខរបរដុតធ្យូងលក់ ។ តែបុរសខាងលើបានត្អូញត្អែរថា ការរកស៊ីដឹកធ្យូងលក់នៅពេលនេះមានការលំបាកបន្តិច ដោយសារអត់សូវមានអុសសម្រាប់ធ្វើធ្យូង ពោលគឺប្រមូលឫសឈើនៅតាមចម្ការ ដើម្បីដាក់ចូលឡដុតលក់តែម្តង ។
ភ្នាក់ងារកោះសន្តិភាពបានជួបសម្ភាសន៍ជាមួយបុរសជាអ្នកដឹកធ្យូងលក់ខាងលើនេះកាលពីវលាម៉ោង១០និង១០នាទីព្រឹកថ្ងៃទី១១ ខែតុលា ឆ្នាំ២០១៩ ស្ថិតនៅក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន។
តាមប្រភពពីបុរសម្នាក់ដែលប្រកបមុខរបរបើកគោយន្តកន្ត្រៃដឹកធ្យូងលក់ខាងលើឈ្មោះ សុខ ភា អាយុ៣៦ឆ្នាំ រស់នៅភូមិភ្នំព្រាល ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានរៀបរាប់ឱ្យដឹងថា គាត់បានដើរទិញធ្យូងនៅតាមឡដែលប្រជាពលរដ្ឋដុតក្បែរផ្ទះ និងតាមចម្ការ រហូតដល់គ្រប់ចំនួន៦០ការ៉ុង ទើបដឹកតាមគោយន្តកន្ត្រៃយកទៅលក់ ហើយគាត់ងើបតាំងពីម៉ោង៤ទៀបភ្លឺ រួចបើកគោយន្តដឹកធ្យូងលក់តាមផ្លូវ រហូតដល់ក្រុងប៉ៃលិនក៏ភ្លឺល្មម ហើយពេលស្របពេលនោះ ប្រជាពលរដ្ឋក៏បើកតូបលក់ផងដែរ លុះឃើញគាត់ដឹកធ្យូងលក់ ក៏នាំគ្នាហៅទិញ ដោយអ្នកខ្លះទិញ១០ការ៉ុង និងអ្នកខ្លះទិញពី៥ទៅ៦ការ៉ុង ។
គាត់បន្តទៀតថា ការលក់ដូរធ្យូងនាពេលនេះកាក់កបជាងរាល់ឆ្នាំ ហើយធ្យូងក៏ឡើងថ្លៃដែរ ដោយកាលពីមុន តម្លៃធ្យូងក្នុង១ការ៉ុង លក់បានត្រឹមតែ១១០០០រៀល ទៅ១២០០០រៀលប៉ុណ្ណោះ ប៉ុន្តែពេលនេះ គាត់អាចលក់បាន១ការ៉ុងរហូតដល់១៤០០០រៀល ទៅ១៥០០០រៀលឯណោះ ហើយការលក់នេះមិនដល់មួយព្រឹកផង ស្រាប់តែអ្នកភូមិនាំគ្នាទិញធ្យូងអស់រលីង ។
គាត់បានបញ្ជាក់ថែមទៀតថា ការចូលទៅដឹកធ្យូងពី.ឡមានការលំបាក ដោយសារភ្លៀងធ្លាក់ជោកជាំខ្លាំង បណ្តាលឱ្យបែកភក់ ខូចផ្លូវ ដោយពេលខ្លះនាំគ្នាលីសែងចេញពីក្នុងចម្ការយកមកដាក់លើគោយន្តនៅឯផ្លូវ រួចរៀបចំដឹកយកទៅលក់ដូរតែម្តង ។ លើសពីនេះ ការលក់ដូរធ្យូងពេលនេះដាច់ខ្លាំង បើសិនជាមានធ្យូងលក់រាល់ថ្ងៃ អ្នកភូមិក៏ទិញរាល់ថ្ងៃផងដែរ ពោលគឺរកតែធ្យូងលក់ដូរសឹងមិនបានផង ហើយបើសិនជាគាត់ដើររកទិញបានឆាប់ៗនឹងបន្តយកមកលក់ដូរនៅក្រុងប៉ៃលិនជាបន្តទៀតផងដែរ ។ ចំពោះការដឹកធ្យូងលក់តាមផ្លូវ អត់មានខាងនគរបាល ឬសមត្ថកិច្ចណាកាក់ទារលុយដូចកាលពីមុននោះទេ ហើយលោកពិតជាសប្បាយចិត្តយ៉ាងខ្លាំង ហើយក៏មិនសូវមានអ្នកណាប្រកបរបរមួយនេះដែរ ព្រោះលំបាកដើររកទិញធ្យូងពីក្នុងឡ ។
ទោះបីជាប្រជាពលរដ្ឋភាគច្រើនរស់នៅក្នុងខេត្តប៉ៃលិន ប្រើចង្ក្រានអគ្គិសនី និងអ្នកខ្លះប្រើចង្ក្រានហ្គាសដាំបាយ ក៏ដោយ តែអ្នកខ្លះទៀតនិយមដាំបាយដោយប្រើចង្ក្រានធ្យូង ព្រោះបាយមានក្លិនឈ្ងុយ ហូបឆ្ងាញ់ ជាពិសេសមនុស្សវ័យចំណាស់បន្តិចចូលចិត្តហូបបាយដាំដោយចង្ក្រានធ្យូងខ្លាំងណាស់ ជាហេតុធ្វើឱ្យការលក់ធ្យូងនៅតែកាក់កប ជាពិសេសគឺអ្នកដាំបាយលក់តែម្តង៕ (កែសម្រួលដោយ ៖ ធីតា)
ចែករំលែកព័តមាននេះ