ខេត្តកំពង់ចាម ៖ រាល់ថ្ងៃគេឃើញបុរសពិការជើងរួមនឹងកូនប្រុសពៅវ័យ១៣ឆ្នាំ មានរ៉ឺម៉កម៉ូតូកញ្ចាស់១គ្រឿងបានបើកចេញពីផ្ទះនៅភូមិបឹងស្នាយ សង្កាត់សំបួរមាស ក្រុងកំពង់ចាម នាព្រឹកព្រលឹមដើម្បីដើររើសអេតចាយនៅតាមផ្លូវនានា យកទៅលក់ឲ្យគេបានលុយគ្រាន់នឹងទិញអង្ករដាំបាយហូបទាំងលំបាក ពោលគឺរក១ថ្ងៃដោះស្រាយជីវភាព១ថ្ងៃ។ លោក…
ខេត្តកំពង់ចាម ៖ រាល់ថ្ងៃគេឃើញបុរសពិការជើងរួមនឹងកូនប្រុសពៅវ័យ១៣ឆ្នាំ មានរ៉ឺម៉កម៉ូតូកញ្ចាស់១គ្រឿងបានបើកចេញពីផ្ទះនៅភូមិបឹងស្នាយ សង្កាត់សំបួរមាស ក្រុងកំពង់ចាម នាព្រឹកព្រលឹមដើម្បីដើររើសអេតចាយនៅតាមផ្លូវនានា យកទៅលក់ឲ្យគេបានលុយគ្រាន់នឹងទិញអង្ករដាំបាយហូបទាំងលំបាក ពោលគឺរក១ថ្ងៃដោះស្រាយជីវភាព១ថ្ងៃ។
លោក ហេង ម៉ៃ វ័យ៥១ឆ្នាំ បានរៀបរាប់ប្រាប់ឲ្យដឹងនៅល្ងាចថ្ងៃទី១០ ខែតុនេះលាថា ជីវិតអតីតយុទ្ធជនពិការជើងឆ្វេងម្ខាង ដូចជារូបលោក មិនបានសុខស្រួលដូចគេឯងនោះទេ គឺរស់នៅដោយការលំបាករាល់ថ្ងៃប្រកបរបរដើររើសអេតចាយ ពឹងលើម៉ូតូកញ្ចាស់១គ្រឿងសណ្តោងរ៉ឺម៉កដើររើសសំបកដបទឹកបរិសុទ្ធ និងឡាំងក្រដាសដែលគេបោះចោល គ្រាន់នឹងលក់បានលុយទិញអង្ករច្រកឆ្នាំង ។
លោកហេង ម៉ៃ បានរំលឹកថា មានពេលមួយរូបលោកបានចុះយុទ្ធនាការនៅតាមបន្ទាត់ព្រំដែនក្នុងខេត្តបាត់ដំបង ជាប់ជាមួយនឹងថៃ ចៃដន្យអីដើរជាន់មីនរបស់ខ្មែរក្រហម បណ្តាលឲ្យដាច់ជើងខាងឆ្វេង ហើយត្រូវបានគេបញ្ជូនមកសង្គ្រោះនៅមន្ទីរពេទ្យខេត្តបាត់ដំបង ។ ហើយពេលជា គាត់ក៏មករស់នៅខេត្តកំពង់ចាមវិញ ដោយប្រកបរបរដើររើសអេតចាយជិត១៥ឆ្នាំមកហើយ រាល់ថ្ងៃរស់នៅលើផ្ទះឈើជញ្ជាំងបាំងដែក និងប្រក់ស័ង្កសីទំហំប្រមាណ៣គុណ៤ម៉ែត្រសង់នៅលើដីគេស្នាក់នៅបណ្តោះអាសន្ន ក្នុងភូមិបឹងស្នាយ សង្កាត់សំបួរមាស ។
លោកហេងម៉ៃ បន្តថា ព្រោះតែកត្តាជីវភាពក្រីក្រ ដោយប្រពន្ធបានចេញទៅស៊ីឈ្មួលគេនៅរាជធានីភ្នំពេញ ជួន២ទៅ៣ខែបានមកលេងផ្ទះម្តង ហើយរាល់ថ្ងៃនៅជាមួយនឹងកូនប្រុសពៅ ប្រសិនបើថ្ងៃណាមិនស្រួលខ្លួន គឺមិនបានដើររើសអេតចាយទេ ប្រាកដមិនមានអង្ករច្រកឆ្នាំងឡើយ។
ចំណែកក្មេងប្រុស ម៉ៃ វណ្ណី អាយុ១៣ឆ្នាំ ប្រាប់ទាំងចង់បង្ហូរទឹកភ្នែកថា ក្នុងពេលដែលចេញទៅរើសអេតចាយម្តងៗ ដោយរូបគេជាអ្នកបើកម៉ូតូកញ្ចាស់នោះ ហើយពេលទៅរៀនផ្លូវឆា្ងយគឺជួបការលំបាក ខណៈឪពុកជូនមករៀននៅសាលាបឋមសិក្សាអង្គរ ក្នុងស្រុកកំពង់សៀមនោះ ដូច្នេះរូបគេចង់បានកង់១គ្រឿងសម្រាប់ជិះទៅរៀនផងដែរ ហើយបានលើកដៃសំពះ សូមឱ្យពូៗ មីងៗ អ៊ុំ តា យាយ ដែលមានចិត្តធម៌មេត្តា សូមជួយដល់ផ្តល់កង់១គ្រឿងមករូបគេផង ហើយសន្យាថា នឹងខំប្រឹងរៀនសូត្រឱ្យល្អ ។
ក្រោយពីសារព័ត៌មានកោះសន្តិភាពចុះផ្សាយពីជីវភាពរបស់គាត់ ត្រូវបានសប្បុរសជនឈ្មោះ សេង គី ជាអ្នកលក់ទារខ្វៃនៅផ្សារច្បារអំពៅ ក្នុងរាជធានីភ្នំពេញ ដែលមានក្តីអាណិតមកលើរូបលោក ហេង ម៉ៃ និងកូនប្រុសពៅ ក៏បានឧបត្ថម្ភថវិកាចំនួន១០ម៉ឺនរៀលជូនដល់រូបលោកហេង ម៉ៃ តាមរយៈសហការីកោះសន្តិភាពនាល្ងាចថ្ងៃទី១០ ខែតុលា ដល់ផ្ទះដ៏កំសត់នោះតែម្តង។
ត្បិតតែអំណោយថវិការមិនបានច្រើនក៏ពិតមែន តែអាចជួយសំរាលជីវភាពរបស់លោក ហេង ម៉ៃ បានមួយកំរិត ដើម្បីឡីឡកចាយវាយឲ្យបានត្រឹមត្រូវសន្សំសំចៃ ។ ចុងក្រោយ លោកហេង ម៉ៃ ក៏សូមជូនពរដល់ម្ចាស់អំណោយឲ្យមានក្តីសុខសាន្ត មានសុខភាពល្អ និងលក់ទារខ្វៃឲ្យដាច់ច្រើនៗ ។
គួររំលឹកថា ៖ បុរសពិការថា ពេលមិនស្រួលខ្លួន រកអង្ករច្រកឆ្នាំងពុំបាន មានតែអង្គុយយំ (វីដេអូ)៕ (កែសម្រួលដោយ ៖ បុប្ផា)
ចែករំលែកព័តមាននេះ