រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ល្បែងដាក់ ទណ្ឌកម្មរបស់បរទេសទៅលើបណ្តាប្រទេសមួយចំនួន មិនអាចឲ្យប្រទេសណាមួយស្លាប់បាននោះទេ ។ ការបញ្ជាក់ថា របស់សម្តេចតេជោ បន្ទាប់ពីសម្តេចអះអាងថា សេដ្ឋកិច្ចទីផ្សារកម្ពុជា បានដំណើរការមុនកិច្ចព្រមព្រៀងទីក្រុងប៉ារីស២៣ តុលា ឆ្នាំ១៩៩១ទៀតរាប់ទាំងសាលាឯកជនទៀតក៏បានកើតរួចហើយ ។
ជាងនេះការបញ្ជាក់របស់សម្តេចតេជោ ខណៈដែលសហភាពអឺរ៉ុបបាននឹងកំពុងធ្វើការសិក្សាពីរបាយការណ៍ ដើម្បីព្យួរការអនុគ្រោះពន្ធការនាំចេញមកលើកម្ពុជា ។ សម្តេចតេជោបានគូសបញ្ជាក់ក្នុងពិធីរំលឹកប្រារព្ធខួបអនុស្សាវរីយ៍លើកទី៤០នៃការបង្កើតធនាគារជាតិនៃកម្ពុជា (១០ តុលា ១៩៧៩-១០ តុលា ២០១៩) នៅសាលសន្និសីទចតុមុខថា ៖«សូមចាំដំណើរសេដ្ឋកិច្ចទីផ្សាររបស់កម្ពុជា មិនមែនក្រោយកិច្ចព្រមព្រៀងទីក្រុងប៉ារីសទេសុំចាំ ។ មុនកិច្ចសន្និសីទប៉ារីសបានសេចក្តីថា សេដ្ឋកិច្ចកម្ពុជាដំណើរការឡើងភាគច្រើនទៅហើយ រាប់ទាំងសាលាឯកជន ក៏បានចាប់ផ្តើមមុនទៀត ក្នុងការចូលរួមបណ្តុះបណ្តាលធនធានមនុស្ស ក្នុងនោះវិស័យកសិកម្ម សិប្បកម្ម …» ។
ជាមួយគ្នានោះដែរ សម្តេចតេជោក៏បានលើកឡើងថា ពេលនោះបណ្តាប្រទេសមួយចំនួនបានដាក់ទណ្ឌកម្មមកលើកម្ពុជាគ្រប់ទិសទី ប៉ុន្តែកម្ពុជាមិនស្លាប់ទេ ។ អ្នកដែលស្រែកដាក់ទណ្ឌកម្មមកលើកម្ពុជាក៏រកស៊ីច្រើនជាមួយកម្ពុជាដែរ ។ សម្តេចគូសបញ្ជាក់ថា ៖«ស្រែកនោះឮពេញផ្ទៃប្រទេសអាស៊ីអាគ្នេយក៏ប៉ុន្តែរកស៊ីជាមួយកម្ពុជាក៏ច្រើន ។ ព្រោះកម្ពុជាបានប្រើដៃវិស័យឯកជនទៅរកស៊ីគេដឹកទំនិញមក យើងដឹកទៅឲ្យគេ ហើយទូទាត់ឲ្យគេទៅ» ។
ប្រមុខរាជរដ្ឋាភិបាលកម្ពុជាបានអះអាងថា ល្បែងដាក់ទណ្ឌកម្មមិនអាចសម្លាប់ ប្រទេសណាបានមួយនោះទេ សូមកុំឆ្ងល់ពេក ។ យ៉ាងណាក្តីសម្តេចបានសង្កត់ធ្ងន់ថា សមទ្ធិផលដែលកម្ពុជាកសាងឡើង គឺមានភាពលំបាក ដូច្នេះត្រូវតែខិតខំការពារ ។ នៅប្រទេសមួយចំនួននាយក រដ្ឋមន្ត្រីឡើងកាន់អំណាចស្រួលតែម្តង ព្រោះថា អ្វីៗមានស្រាប់ ប៉ុន្តែកម្ពុជាវិញអ្វីៗសុទ្ធតែកើតឡើងថ្មី ៕ កែសម្រួលដោយ ៖ សុឃាក់
ចែករំលែកព័តមាននេះ