រាជធានីភ្នំពេញ ៖ បន្ទាប់ពីការសម្របសម្រួលមិនត្រូវរ៉ូវគ្នា នគរបាលក៏បានបញ្ជូនសំណុំរឿងនេះទៅកាន់អធិការដ្ឋាន ដើម្បីចាត់ការបន្តទៀត ។ សូមរំលឹកថា ស្ត្រីជាម្ចាស់បំណុលម្នាក់ត្រូវបានស្ត្រីថៅកែហាងយីហោយីអ៊ូរីករាយ វាយធាត់ធាក់ទ្រមខ្លួននៅចំពោះមុខនគរបាលមូលដ្ឋាន ខណៈពេលដែលទៅទារប្រាក់ ។
ហេតុការណ៍នេះ បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៩ព្រឹកថ្ងៃទី៩ តុលា នៅចំណុចហាងបាយនិងគុយទាវមួយកន្លែងយីហោយីអ៊ូរីករាយ ស្ថិតនៅតាមបណ្តោយមហាវិថីឈ្នះ ឈ្នះជាប់វត្តអង្គក្រពើ ក្នុងភូមិត្រពាំងវែង សង្កាត់គោករការ ខណ្ឌព្រែកព្នៅ ។
ជនដៃដល់ដែលប្រើហិង្សានោះត្រូវបាននគរបាលឱ្យដឹងថា ឈ្មោះ លីលី អាយុប្រមាណជាង៤០ឆ្នាំ ជាថៅកែហាង ស្នាក់នៅកន្លែងកើតហេតុខាងលើ(ជាកូនបំណុល)ជំពាក់ប្រាក់គេមិនព្រមសង ។ ចំណែកស្ត្រីរងគ្រោះឈ្មោះ ធា វី ភេទស្រី អាយុ៣០ឆ្នាំ ស្នាក់នៅម្តុំផ្សារឈូកមាស ក្នុងសង្កាត់ក្រាំងធ្នង់ ខណ្ឌសែនសុខជាម្ចាស់បំណុល រងគ្រោះដោយសារគេខឹង ព្រោះទារលុយមិនឈប់ ។
តាមសាក្សីបានឱ្យដឹងថា នៅមុនពេលកើតហេតុគេឃើញស្ត្រីម្ចាស់បំណុលបានជិះរថយន្តមួយគ្រឿង ទៅទារប្រាក់ពីថៅកែហាង ដែលបានជំពាក់១ពាន់ដុល្លារមិនព្រមសង ។ ខណៈនោះកកើតមានទំនាស់ពាក្យសម្តីគ្នា ហើយត្រូវបានស្ត្រីជាថៅកែហាង ដេញចេញនិងបានទាញកំប៉ុងដាក់ស្លាបព្រា សម និងចង្កឹះគប់ទៅលើស្ត្រីម្ចាស់បំណុល និងបានយកទឹកជះព្រមទាំងវាយទៅលើនារីជាម្ចាស់បំណុលទ្រមខ្លួន នៅចំពោះមុខនគរបាលប៉ុស្តិ៍ និងអ្នកព័ត៌មានដែលបានចុះទៅយកព័ត៌មានពីករណីចរាចរណ៍ ហើយបានចូលហូបបាយក្នុងហាងនោះក៏ថតបានជាក់ស្តែង ។
តាមសាក្សីបានឱ្យដឹងទៀតថា នៅក្នុងសកម្មភាពប្រើហិង្សានគរបាលប៉ុស្តិ៍ម្នាក់ក៏បានទៅឃាត់ តែថៅកែហាងរូបនោះនៅតែបន្តប្រើហិង្សា ដោយវាយទៅលើម្ចាស់បំណុលនិងចាប់បោកដួលបោចសក់ទាញទាត់ធាក់ ហើយត្រូវបាននគរបាលឃាត់ខ្លួន ។ តាមស្ត្រីជាកូនបំណុល បានឱ្យដឹងថា ដោយសាតែខឹងលុយ១ពាន់សោះតាមទាររហូត ។ ប្រាក់នោះនាងសង តែមិនទាន់មាន ព្រោះគេជំពាក់នាងដែរ ។ ចំណែកស្ត្រីជាម្ចាស់បំណុលបានឱ្យដឹងថា ឈ្មោះ លីលី បានខ្ចីប្រាក់ចងការចំនួន១ពាន់ដុល្លារ តាំងពីថ្ងៃទី៤ មីនា ដោយ១០០ការ៥ដុល្លារ ។
បន្ទាប់ពីខ្ចីប្រាក់ ការក៏មិនឱ្យដើមក៏មិនឱ្យ ហើយចេះតែសន្យាណាត់ថ្ងៃនេះថ្ងៃនោះរហូត ។ ស្ត្រីរូបនោះក៏បានឱ្យដឹងទៀតថា នៅព្រឹកថ្ងៃកើតហេតុដែលជាថ្ងៃណាត់នាងក៏បានធ្វើដំណើរទៅទារប្រាក់ក៏ត្រូវបានកូនបំណុលប្រើហិង្សាមកលើនាងតែម្តង ។ បន្ទាប់ពីមានអំពើហិង្សានារីរងគ្រោះក៏បានធ្វើដំណើរទៅដាក់ពាក្យបណ្តឹងនៅស្នាក់ការប៉ុស្តិ៍ដោយទារជំងឺចិត្ត៥ពាន់ដុល្លារ ។ ដោយឡែក ម្ចាស់ហាងក៏ត្រូវបាននគរបាលហៅទៅប៉ុស្តិ៍ដើម្បីសាកសួរដែរ ។
ចែករំលែកព័តមាននេះ