ក្រុងព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីហិង្សាមួយកើតឡើង បណ្តាលឱ្យបុរសពីរនាក់ជាកម្មករសំណង់រងរបួសធ្ងន់ ដោយសារតែមើលមុខគ្នា ហើយឌឺដាក់គ្នាទៅវិញទៅមក បង្កឱ្យមានការភ្ញាក់ផ្អើលកាលពីម៉ោងជិត៩យប់ ថ្ងៃទី០៩ ខែតុលា ឆ្នាំ២០១៩ នៅចំណុចការដ្ឋានមួយកន្លែង ស្ថិតក្នុងភូមិ០៥ សង្កាត់០៤ ក្រុង/ខេត្តព្រះសីហនុ។
សេចក្តីរាយការណ៍បន្តថា ជនរងគ្រោះខាងលើនេះ ១-ឈ្មោះ ប៊ុន ណៃ ភេទប្រុស អាយុ៣៣ឆ្នាំ មុខរបរកម្មសំណង់ ស្នាក់នៅកន្លែងកើតហេតុខាងលើ ២-ឈ្មោះ ថន ទុងលេង អាយុ៣២ឆ្នាំ ភេទប្រុស អាយុ៣២ឆ្នាំ មុខរបរជាកម្មករសំណង់ដូចគ្នា ស្នាក់នៅកន្លែងកើតហេតុ ស្ថិតនៅភូមិ០៥ សង្កាត់០៤ ក្រុង/ខេត្តព្រះសីហនុ។
បើតាមប្រភពពីជនរងគ្រោះទាំង២នាក់បានឱ្យដឹងថា នៅមុនពេលកើតហេតុ ខ្លួនបាន អង្គុយស៊ីផឹកជាមួយមិត្តភក្តិធម្មតា និងមានកម្មករសំណង់មួយក្រុមទៀតក៏ផឹកស៊ីនៅជិតគ្នានោះដែរ ក្រោយមកបានមើលមុខគ្នា និងឌឺដាក់គ្នាទៅវិញទៅមក រហូតឈានដល់ការប្រើហិង្សាបែបនេះតែម្តង ក្រោយមកបង្កហិង្សាហើយ ជនសង្ស័យក៏រត់គេចខ្លួនបាត់ស្រមោលអស់បាត់ទៅ។
បើតាមសមត្ថកិច្ចបានឱ្យដឹងថា ខណៈពេលនេះសមត្ថកិច្ចកំពុងតែអន្តរាគមន៍តាមចាប់ជនសង្ស័យ ដើម្បីនាំមកសួរនាំ និងចាត់ការតាមនីតិវិធីច្បាប់។ ចំណែកជនរងគ្រោះទាំង២នាក់ត្រូវបានមិត្តភក្តិបញ្ជូនមកសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ ។ (កែសម្រួលដោយ ៖ បុប្ផា)
ចែករំលែកព័តមាននេះ